12

Cansái Ũat Khễn

1Tữ tangái ki toâq, máh cũai ễ ũat khễn neq:
  “Cứq khễn anhia la Yiang Sursĩ!
   Bo nhũang anhia cutâu mứt chóq cứq,
   ma sanua anhia aliam cớp tỡ bữn nhôp cứq noâng.
  2Yiang Sursĩ la Ncháu ca chuai amoong cứq.
   Cứq ễ sa‑âm án, cớp tỡ bữn ngcŏh ntrớu.
  Yiang Sursĩ yỗn cứq bữn chớc cớp bán rêng;
   án la Yiang ca chuai amoong cứq.
  3Dỡq raloang táq yỗn cũai khlac dỡq sâng bũi hỡr;
   lứq ngkíq tê máh cũai sâng bũi toâq Yiang Sursĩ chuai amoong alới.”
4Tữ tangái ki toâq, máh cũai ũat khễn neq:

  “Cóq anhia sa‑ỡn Yiang Sursĩ!
  Tỗp anhia cóq arô sễq án chuai anhia.
   Cóq atỡng yỗn dũ cruang dáng tễ dũ ranáq án khoiq táq.
   Cóq atỡng yỗn tỗp alới dáng án sốt toâr lứq.
  5Cóq ũat khễn Yiang Sursĩ, yuaq án khoiq táq ramứh toâr lứq.
   Cóq nheq cốc cutễq nâi bữn sâng tễ máh ranáq án táq.
  6Cóq dũ náq cũai tâng cóh Si-ôn triau cupo cớp ũat.
   Yiang Sursĩ tỗp I-sarel sang, án la sốt toâr cớp bráh o lứq.
   Án ỡt níc cớp proai án.”