19

Tin-Hungh Oix Dingc I^yipv Nyei Zuiz

1Naaiv se gorngv taux I^yipv nyei waac.
  Mangc maah! Ziouv geh jienv siepv nyei mbuonx
   daaih taux I^yipv Deic-Bung.
  I^yipv nyei miuc-fangx yiem ninh nyei nza'hmien nyanh nyanh nyei dongz,
   I^yipv Mienh nyei mba'nziu yuqc nzengc.
  2“Yie oix coqv I^yipv Mienh mborqv I^yipv Mienh,
   gorx-youz oix mborqv gorx-youz,
  juangc laangz mienh oix mborqv ganh nyei juangc laangz mienh,
   zingh oix mborqv zingh,
   guoqv oix mborqv guoqv.
  3I^yipv Mienh ziouc faix hnyouv aqv.
   Yie oix bun ninh mbuo daav nyei za'eix zoux maiv cuotv haaix nyungc.
  Ninh mbuo ziouc naaic miuc-fangx caux mangc maengc mienh,
   aengx naaic gaanv hei caux mbouv guaax mienh.
  4Yie oix zorqv I^yipv Mienh jiu bun
   yiem dauh doqc nyei ziouv nyei buoz-ndiev.
  Maaih dauh ciouv haic nyei hungh diex oix gunv ninh mbuo.”
   Naaiv se Ziouv, Nernh Jiex nyei Ziouv, gorngv nyei waac.
  5Nai^aa Ndaaih nyei wuom oix nqaai,
   ndaaih nyei wuom yaac nqaai taux ndoqv nzengc.
  6Nai^aa nyei wuom-zuonx oix zueix,
   I^yipv nyei Nai^aa Ndaaih nyei ndoqv oix haapv njiec nqaai nzengc.
  Luoqc diqc caux dang-cov miev yaac huv nzengc.
  7Nai^aa Ndaaih hlen caux ndaaih kuv nyei mba'ndaauh njatv yaac nqaai nyaux,
   zuangx yiem Nai^aa Ndaaih hlen nyei yietc zungv ga'naaiv-zuangx yaac nqaai,
   zungv zuqc nziaaux buonc mingh, maiv maaih aqv.
  8Zorqv mbiauz nyei mienh oix nzauh nyiemv,
   yiem Nai^aa mbatc mbiauz nyei yietc zungv yaac nzauh haic.
  Borngz mungz wuov deix oix kouv jienv njiec.
  9Baic la'maah nyei gong-mienh
   caux ndatv la'maah ndie-muonc nyei mienh maiv lamh hnamv dorngx aqv.
  10Yiem deic-bung zoux hlo nyei mienh oix zuqc baaic,
   maaic gong nyei yietc zungv mienh hnyouv nzauh kouv aqv.
  11So^an Zingh nyei jien se hngongx haic aqv.
   Faalo maaih cong-mengh nyei caangh laangh mienh daav hngongx nyei za'eix.
  Meih mbuo fungc haih gorngv mbuox Faalo,
  “Yie se cong-mengh mienh nyei dorn,
   zoux loz-hnoi hungh diex nyei zeiv-fun”?
  12Meih nyei cong-mengh mienh yiem haaix?
   Bun ninh mbuo mbuox meih, tengx meih hiuv duqv,
  Nernh Jiex nyei Ziouv jiez hnyouv
   hnangv haaix nor zoux bun I^yipv.
  13So^an nyei jien benx ga'naaiv-hngongx mi'aqv.
   Memfitv nyei jien yaac zuqc nduov.
  Fingx-fingx I^yipv Mienh nyei bieiv zeiv
   dorh I^yipv Mienh yangh dorngc jauv.
  14Ziouv zoux bun ninh mbuo nyei hnyouv lunc,
   ninh mbuo zoux nyei yietc zungv sic
   bun I^yipv dorngc jauv.
  Hnangv hopv diuv nquin nyei mienh
   lingh lingh king-king nyei yiem ninh lov cuotv nyei ga'naaiv gu'nyuoz.
  15Maiv gunv m'nqorngv fai dueiv, daau-normh fai luoqc diqc guaengv,
   maiv maaih haaix nyungc haih tengx I^yipv.
16Taux wuov hnoi, Nernh Jiex nyei Ziouv oix fengx buoz yiem I^yipv Mienh gu'nguaaic. Ninh mbuo ziouc hnangv m'sieqv dorn gamh nziex, sin zinx. 17Yu^ndaa Deic-Bung yaac bun I^yipv Mienh gamh nziex haic. Haaix dauh haiz wuov norm mbuox ziouc gamh nziex haic weic Nernh Jiex nyei Ziouv dingc zoux bun I^yipv Mienh.
18Taux wuov hnoi I^yipv Deic-Bung maaih biaa norm zingh gorngv Kaa^naa^an waac, yaac dorng jienv Nernh Jiex nyei Ziouv ⟨laengz jiez ngaengc waac.⟩ Maaih norm wuov deix zingh ninh mbuo oix heuc “Mba'hnoi nyei Zingh.”
19Taux wuov hnoi yiem I^yipv Deic-Bung gu'nyuoz zungv maaih norm ziec-dorngh ceix daaih weic Ziouv. Yiem I^yipv nyei gapv-jaaix ga'hlen yaac maaih norm la'bieiv-dongc liepc daaih weic Ziouv. 20Naaiv norm dongc yiem deic-bung-huaang weic Nernh Jiex nyei Ziouv zoux jangx-hoc yaac zoux zorng-zengx. Se gorngv I^yipv Mienh zuqc mienh zeix ziouc heuc Ziouv, ninh ziouc paaiv dauh njoux ziouv daaih tengx yaac njoux ninh mbuo. 21Ziouv ziouc bun I^yipv Mienh hiuv duqv ninh. Taux wuov hnoi I^yipv Mienh oix nyiemc Ziouv yaac longc fongc horc caux ziec nyei ga'naaiv zaangc ninh. Ninh mbuo yaac oix laengz ngaengc waac bun Ziouv aengx ziux ninh mbuo laengz nyei waac jaauv sung. 22Ziouv oix mborqv I^yipv, mborqv aengx zorc longx. Ninh mbuo ziouc aengx nzuonx daaih lorz Ziouv. Ninh yaac muangx ninh mbuo jouh nyei waac aengx zorc ninh mbuo longx.
23Taux wuov hnoi maaih diuh domh jauv yiem I^yipv tong Atc^si^lie. Atc^si^lie Mienh ziouc mingh I^yipv, I^yipv Mienh yaac mingh Atc^si^lie. I^yipv Mienh yaac caux Atc^si^lie Mienh lomh nzoih zaangc Ziouv. 24Taux wuov hnoi, I^saa^laa^en caux I^yipv caux Atc^si^lie, naaiv deix buo norm guoqv, fih hnangv nyei bun gormx lungh ndiev nyei mienh duqv fuqv. 25Nernh Jiex nyei Ziouv oix ceix fuqv bun ninh mbuo. Ninh gorngv, “I^yipv Mienh se yie nyei baeqc fingx, Atc^si^lie se yie nyei buoz zeix daaih nyei mienh, I^saa^laa^en Mienh se yie nzipc nyei buonc, yie oix ceix fuqv bun ninh mbuo.”