26

Yawmsaub haiv tuabneeg yuav kov yeej

¹Nub ntawd puab yuav hu zaaj nkauj nuav huv Yuta tebchaws.
“Peb muaj ib lub nroog kws ruaj khov.
Vaajtswv rhawv txujkev cawm dim ua ntsaa loog hab chaw faaj xwm.
²Ca le qheb rooj loog sub lub tebchaws kws ncaaj nceeg
hab pheej ua lawv le puab tub cog lug tseg lawm txhad tau nkaag lug.
³Au Vaajtswv, koj yuav pub lub sab tug yeeg puv npo
rua tug kws lub sab ruaj nreeg rua koj, vem nwg tso sab rua koj.
⁴Ca le tso sab rua Yawmsaub moog ib txhws
tsua qhov Vaajtswv Yawmsaub yog txhwb zeb
kws nyob moog ib txhws tsw kawg.
⁵Nwg tub txu cov tuabneeg kws nyob lub chaw sab,
hab muab lub moos kws sab txu nqeg lug.
Nwg muab tsoo kuas pob taag rua huv peg teb xyaw moov aav.
⁶Mas txhua txhais kwtaw tsuj, yog cov tuabneeg pluag le kwtaw
hab cov tuabneeg txom nyem le kwtaw tsuj.”

⁷Cov tuabneeg ncaaj nceeg txujkev taj tug.
Au tug kws ncaaj nceeg, koj ua rua cov ncaaj nceeg txujkev taj du quas lug.
⁸Au Yawmsaub, peb ua lawv le koj txuj kevcai tog rawv koj.
Koj lub npe kws muaj koob meej
yog qhov kws peb tug ntsuj plig ntshaw heev.
⁹Mo ntuj los kuv lub sab dai quas dhuas koj,
kuv tug ntsuj plig kub quas lug nrhav ntshws koj,
tsua qhov thaus koj txav txem rua tuabneeg nplajteb,
tej tuabneeg huv qaab ntuj kuj kawm paub koj txujkev ncaaj nceeg.
¹⁰Yog hlub cov tuabneeg limham
mas puab yuav tsw kawm paub txujkev ncaaj nceeg.
Puab nyob huv lub tebchaws ncaaj nceeg
los puab tseed ua phem
hab puab tsw quav ntsej Yawmsaub tug fwjchim meej mom.
¹¹Au Yawmsaub, koj tub tsaa koj txhais teg tassws puab pheej tsw pum.
Thov ca puab pum qhov kws koj kub sab quas lug rua koj haiv tuabneeg
hab ca puab txaaj muag.
Thov ca cov suavtawg kws koj yuav hlawv koj cov yeeb ncuab,
hlawv puab hab.
¹²Au Yawmsaub, koj pub kuas peb tau txujkev thaaj yeeb.
Ib puas tsaav yaam kws peb ua tau lawm tub yog koj ua paab peb.
¹³Au Yawmsaub, kws yog peb tug Vaajtswv,
dhau ntawm koj lawm tseed muaj luas lwm tug num tswv tau kaav peb hab,
tassws peb tsuas leeg paub koj tuab leeg lub npe xwb.
¹⁴Puab tub tuag lawm, puab yuav tsw muaj txujsa nyob.
Puab nyob tub tuag teb xwb, puab yuav tsw sawv rov lug.
Vem yog koj tau lug ua kuas puab puam tsuaj
hab tau rhuav tej chaw kws ncu txug puab huvsw.

¹⁵Au Yawmsaub, koj tau ua rua haiv tuabneeg nuav fuam vaam coob,
ua rua haiv tuabneeg nuav fuam vaam tuaj.
Koj tau txais lub koob meej zoo kawg nkaus,
koj tau nthuav lub tebchaws kuas daav ntxwv moog.

¹⁶Au Yawmsaub, thaus puab raug txom nyem lwj sab puab tau nrhav koj,
thaus puab raug nplawm qhuab qha, puab tsaa ncauj thov koj tsw tu le.⚓
¹⁷Ib yaam le tug quaspuj suab mivnyuas kws ntswj cev qw
vem yog ua mob teb, yog thaus kws tub yuav txug caij yug,
au Yawmsaub, peb zoo ib yaam le ntawd rua ntawm koj xubndag.
¹⁸Peb suab mivnyuas, peb ntswj cev,
tassws peb tsuas yug tau cua xwb.
Peb tsw tau rhawv kev cawm dim
rua huv lub nplajteb hab tsw tau yug tuabneeg nplajteb.
¹⁹Koj cov tuabneeg kws tuag lawm yuav rov caj sa,
puab tej cev tuag yuav sawv rov lug.
Mej cov kws nyob huv moov aav 'e,
ca le tswm dheev hab hu nkauj vem mej zoo sab.
Yawmsaub, koj cov dej lwg zoo yaam nkaus le tej dej lwg thaus sawv ntxuv
mas lub nplajteb yuav yug cov kws nyob huv tub tuag teb rov lug.

²⁰Kuv cov tuabneeg, ca le lug,
ca le nkaag rua huv mej chaav tsev hab kaw qhov rooj rua.
Mej ca le moog nraim cev ib ntus
moog txug thaus Yawmsaub kev npau tawg dhau lawm.
²¹Vem yog Yawmsaub saamswm tawm ntawm nwg lub chaw tuaj
yuav rau txem rua tuabneeg nplajteb
vem yog puab tej kev txhum txem.
Mas lub nplajteb yuav qha tej ntshaav kws lug rua sau nwg lawm
hab yuav tsw npog cov kws raug tua tuag ntxwv moog lawm.