32

Baengh Fim Nyei Hungh

  1Mangc maah! Maaih dauh hungh diex oix hnyouv zingx nyei gunv.
   Maaih domh jien oix baengh fim nyei gunv.
  2Dauh dauh mienh ziouc hnangv norm dorngx bingx nziaaux,
   yaac benx bingx mbiungc-nziaaux nyei dorngx,
  yaac hnangv ndoqv liouc ndau-nqaai,
   hnangv torngv laangh nyei la'bieiv yiem deic-bung-haanz.
  3Wuov zanc haih mangc duqv buatc nyei mienh nyei m'zing maiv njipv.
   Muangx duqv haiz nyei mienh nyei m'normh yaac muangx duqv haiz aqv.
  4Nzuih siepv nyei mienh haih hnamv duqv tong yaac bieqc hnyouv,
   a'lanh nyei mienh haih gorngv waac mbiaangc yaac mengh nyei.
  5Yiem naaiv mingh mienh maiv taaih mienh hngongx mienh zoux hlo,
   yaac maiv taaih zoux waaic sic nyei mienh,
  6weic zuqc hngongx nyei mienh gorngv hngongx nyei waac.
   Hnyouv kungx hnamv zoux orqv sic hnangv.
  Ninh zoux sic maiv horpc Tin-Hungh
   yaac gorngv dorngc Ziouv nyei jauv,
  weic bun hnyouv sie nyei mienh ngorc jienv yiem,
   bun jaang nqaatv nyei mienh maiv duqv wuom hopv.
  7Zoux waaic sic nyei mienh nyei za'eix se orqv haic,
   kungx daav cuotv orqv nyei za'eix hnangv
  weic longc gorngv-baeqc nyei jauv bun mienh jomc mienh zuqc mietc,
   maiv gunv dangx-donx nyei mienh tov nyei waac horpc.
  8Mienh longx mienh daav longx nyei za'eix,
   ninh kungx zoux jienv longx nyei sic mingh.

Donv Ye^lu^saa^lem Nyei M'sieqv Dorn

  9Meih mbuo kuh yiem kuh nyanc nyei m'sieqv dorn aac,
   jiez daaih muangx yie nyei qiex.
  Buangv eix nyei sieqv aac,
   baeng m'normh muangx yie oix gorngv nyei waac.
  10Buangv eix nyei m'sieqv dorn aac,
   aengx jiex yietc hnyangx lengh meih ziouc hnyouv huaang, sin zinx,
  weic zuqc a'ngunc huingx maiv maaih biouv.
   Siou biouv nyei ziangh hoc yaac maiv taux.
  11Meih mbuo kuh yiem kuh nyanc nyei m'sieqv dorn aac, oix zuqc sin zinx.
   Meih mbuo buangv eix nyei sieqv aac, oix zuqc hnyouv huaang nyanh nyanh nyei.
  Jaiv nqoi lui-houx,
   sai jienv la'maah ndie-cou.
  12Meih mbuo oix zuqc weic meih mbuo longx haic nyei lingh deic
   caux ziangh duqv gitv nyei a'ngunc hmei nzuei la'kuotv.
  13Oix zuqc weic yie nyei baeqc fingx nyei ndau
   kungx cuotv njimv-cou njimv-muonc,
  yaac weic njien-youh nyei zingh
   caux yietc zungv orn-lorqc nyei biauv nzauh nyiemv.
  14Hungh dinc oix zuqc guangc huaang,
   maaih baeqc fingx camv nyei zingh kungx nzengc mi'aqv.
  Mbong-aiv weih wuonv nyei dorngx caux laauh oix zuqc yietc liuz benx ndau-huaang,
   zoux hieh lorh a'hneiv nyei dorngx caux yungh guanh nyei miev-ciangv.
  15Zuov taux Singx Lingh yiem gu'nguaaic dox njiec yie mbuo,
   ndau-huaang ziouc tiuv benx ndau-longx,
   ndau-longx yaac buatc hnangv ndiangx-lomc.
  16Baengh fim nyei jauv ziouc yiem deic-bung-huaang,
   zoux horpc nyei jauv yaac yiem ndau-longx.
  17Zoux horpc nyei jauv bun mienh maaih baengh orn,
   zoux horpc nyei jauv cuotv taaix-baengh nyei sic
   caux maaih lamh kaux dorngx weic yietc liuz.
  18Yie nyei baeqc fingx duqv yiem baengh orn nyei dorngx,
   duqv yiem wuonv nyei biauv,
   sekv nzieqc nyei hitv kuonx dorngx.
  19Maiv gunv duih borqc njiec mborqv ndiangx-lomc mbaang,
   zingh yaac zuqc baaic nzengc,
  20meih mbuo yiem diuh diuh ndoqv-hlen zuangx ga'naaiv,
   bungx meih mbuo nyei ngongh caux lorh sueih jienv mingh nyanc miev,
   naaiv nyungc mienh ziouc maaih orn-lorqc.