2

E^se^te Duqv Zoux Hungh Maac

¹Naaiv deix sic jiex liuz, nqa'haav Aa^haa^su^e^latv nyei ga'qiex fiu mingh, ninh jangx taux Watv^qaa^ti caux Watv^qaa^ti zoux nyei sic, yaac jangx taux ninh hnangv haaix nor dingc zoux bun Watv^qaa^ti. ²Fu-sux hungh diex wuov deix jien ziouc mbuox hungh diex, “Oix zuqc bun mienh lorz maiv gaengh nziaauc jiex dorn nyei sieqv-nzueic bun hungh diex. ³Hungh diex oix zuqc paaiv deix jien yiem meih gunv nyei norm-norm saengv, heuc ninh mbuo lorz maiv gaengh nziaauc jiex dorn nyei sieqv-nzueic dorh taux Susaax Domh Zingh nyei hungh dinc wuov norm m'sieqv dorn nyei biauv.⚓ Oix zuqc jiu bun hungh diex nyei jien,⚓ dongh goux m'sieqv dorn wuov dauh Hegai, bun ninh goux, aengx bun jienv nzaatv sin nyei youh ndaang ninh mbuo. ⁴Haaix dauh sieqv gauh horpc hungh diex nyei hnyouv, hungh diex gunv bun wuov dauh zoux hungh maac div Watv^qaa^ti.” Naaiv nyungc za'eix horpc hungh diex nyei hnyouv, ninh ziouc ei jienv zoux aqv.
⁵Yiem Susaax Zingh maaih dauh Yiutai Mienh, mbuox heuc Mo^nde^kai. Ninh se Mben^yaa^min Fingx. Ninh nyei die heuc Jaa^i. Ninh nyei ong heuc Si^me^i. Ninh nyei ong-taaix heuc Kitv. ⁶Mbaa^mbi^lon Guoqv nyei Ne^mbu^katv^netv^saa Hungh mingh Ye^lu^saa^lem Zingh caangv Yu^ndaa Deic nyei hungh, Ye^ko^ni^yaa,⚓ mingh wuov zanc, Mo^nde^kai yaac caux jienv mienh zuqc guaatv mingh.⚓ ⁷Mo^nde^kai nyei youz-diex maaih dauh sieqv, mbuox heuc Haa^ndaa^saa, aengx maaih norm mbuox heuc E^se^te. Naaiv dauh sieqv maiv maaih diex maac, Mo^nde^kai ziouc dorh ninh hlo daaih. E^se^te ziangh duqv longx yaac nzueic haic. Ninh nyei diex maac daic wuov zanc, Mo^nde^kai ziouc siou daaih zoux ganh nyei sieqv.
⁸Hungh diex njiec nyei lingc zunh gormx deic-bung wuov zanc ziouc maaih sieqv camv nyei zuqc gapv zunv dorh taux Susaax Domh Zingh, jiu bun Hegai goux. E^se^te yaac caux jienv zuqc fungx bieqc hungh dinc, jiu bun goux m'sieqv dorn wuov dauh Hegai goux. ⁹Hegai a'hneiv haic E^se^te, buatc E^se^te horpc ninh nyei hnyouv, ziouc gaanv jienv tengx lorz nzaatv sin nyei youh ndaang caux horpc zuqc duqv nyei buonc nyanc hopv. Ninh yaac paaiv siec dauh yiem hungh dinc ginv daaih nyei m'sieqv bou fu-sux E^se^te, yaac bun ninh caux ninh nyei bou yiem m'sieqv dorn nyei biauv gauh longx jiex nyei dorngx.
¹⁰E^se^te maiv bun haaix dauh hiuv duqv ninh zoux haaix fingx mienh, yaac maiv bun haaix dauh hiuv duqv ninh nyei cien-ceqv, weic zuqc Mo^nde^kai hatc ninh maiv dungx bun haaix dauh hiuv. ¹¹Mo^nde^kai hnoi-hnoi mingh taux wuov deix m'sieqv dorn yiem nyei biauv nyei laatc nza'hmien maengx. Ninh oix hiuv E^se^te hnangv haaix nor yaac mangc gaax ninh maaih haaix nyungc jauv cuotv.
¹²Dauh dauh sieqv maiv gaengh bieqc mingh buangh Aa^haa^su^e^latv Hungh nyei ziangh hoc, naaiv deix sieqv oix zuqc ei leiz-nyeic longc youh ndaang nzaatv sin buangv yietc hnyangx. Oix zuqc longc ⟨mu^yorc⟩ nomv sin juqv hlaax nyieqc, yaac longc youh ndaang nzaatv sin juqv hlaax. ¹³Sieqv bieqc mingh buangh hungh diex wuov zanc se hnangv naaiv. Sieqv oix longc yiem m'sieqv dorn nyei biauv nyei haaix nyungc dorh mingh, gunv bun ninh aqv. ¹⁴Lungh maanz-hmuangx, sieqv bieqc mingh buangh hungh diex, lungh ndorm cuotv daaih mingh yiem m'sieqv dorn nyei ganh norm biauv, maaih Saa^atc^gaatc goux. Saa^atc^gaatc se hungh diex nyei jien, goux hungh diex nyei jaav-zeih auv. Yiem wuov nyei m'sieqv dorn maiv duqv aengx nzuonx mingh buangh hungh diex, cuotv liuz ninh horpc hungh diex nyei hnyouv, hungh diex ziouc ziux ninh nyei mbuox heuc daaih.
¹⁵Taux Mo^nde^kai nyei domh nauz, Aa^mbi^haa^in nyei sieqv, se Mo^nde^kai siou daaih zoux ninh ganh nyei sieqv wuov dauh E^se^te, bieqc mingh buangh hungh diex nyei ziangh hoc, ninh maiv tov haaix nyungc cuotv liuz goux m'sieqv dorn wuov dauh hungh diex nyei jien, Hegai, paaiv bun ninh. Haaix dauh buatc E^se^te yaac a'hneiv haic ninh. ¹⁶Dorh E^se^te bieqc hungh dinc mingh buangh hungh diex wuov zanc, Aa^haa^su^e^latv zoux hungh da'cietv hnyangx wuov hnyangx, ziepc hlaax, se ⟨Te^mbetv hlaax.⟩
¹⁷Hungh diex hnamv E^se^te gauh camv wuov deix yietc zungv m'sieqv dorn. E^se^te horpc ninh nyei hnyouv haic, hungh diex ziouc a'hneiv E^se^te gauh camv maiv bueix jiex dorn nyei zuangx sieqv. Ninh ziouc zorqv hungh ningv ndongx jienv E^se^te nyei m'nqorngv, bun ninh zoux hungh maac div Watv^qaa^ti. ¹⁸Hungh diex weic E^se^te mbenc donx hnaangx hlo nyei yaac cingv ninh nyei zuangx jien caux zoux hlo nyei mienh. Ninh yaac zunh gormx ninh nyei guoqv heuc mienh dongh wuov hnoi dingh gong hitv kuonx⚓ yaac zoux hnyouv jangv nyei fungx zingh nyeic bun mienh.

Mo^nde^kai Njoux Hungh Diex

¹⁹Maiv nziaauc jiex dorn nyei sieqv zuqc gapv zunv da'nyeic nzunc wuov zanc, Mo^nde^kai zueiz jienv hungh dinc nyei laatc gaengh ndaangc. ²⁰E^se^te maiv bun haaix dauh hiuv duqv ninh zoux haaix fingx mienh yaac maiv bun haaix dauh hiuv duqv ninh nyei cien-ceqv, hnangv Mo^nde^kai hatc ninh wuov nor, weic zuqc ninh corc muangx Mo^nde^kai nyei waac hnangv zinh ndaangc Mo^nde^kai dorh ninh hlo nyei ziangh hoc.
²¹Mo^nde^kai zueiz jienv hungh dinc nyei laatc gaengh nyei ziangh hoc, zuov hungh nyei gaengh wuov deix i dauh jien, Mbikc^taan caux Teletv, qiex jiez haic Aa^haa^su^e^latv Hungh, beic ndiev daav za'eix daix ninh. ²²Mo^nde^kai hiuv duqv naaiv deix sic, ninh mbuox E^se^te. E^se^te ziouc dorh Mo^nde^kai nyei waac mingh mbuox hungh diex. ²³Mienh zaah mangc naaiv deix sic, buatc za'gengh zien nyei, ziouc zorqv naaiv deix i dauh mienh mingh ndiux jaang nyei dorngx ndiux jaang daic. Naaiv deix yietc zungv sic dorng jienv hungh diex fiev jienv hungh douh sou.