3

Haamaan Daav Za'eix Daix Yiutai Mienh

1Naaiv deix sic jiex liuz, Aa^haa^su^e^latv Hungh taaih Aagakc Mienh, Ham^me^ndaa^taa nyei dorn, Haamaan, yaac jaa ninh nyei jien-mengh hlo faaux, bun ninh zoux gauh hlo jiex caux ninh zoux jien nyei yietc zungv mienh. 2Yiem hungh dinc nyei laatc gaengh nyei zuangx jien gueic njiec baaix Haamaan, weic zuqc hungh diex hatc ninh mbuo hnangv naaiv nor zoux. Mv baac Mo^nde^kai maiv gueic yaac maiv baaix.
3Yiem hungh dinc fu-sux hungh diex nyei jien naaic Mo^nde^kai, “Meih weic haaix diuc ngaengc hungh diex nyei waac?” 4Wuov deix mienh hnoi-hnoi kuinx ninh, mv baac ninh maiv muangx. Ninh mbuo ziouc mingh mbuox Haamaan, oix mangc gaax Mo^nde^kai haih ngaengc duqv taux haaix zanc, weic zuqc Mo^nde^kai mbuox ninh mbuo ninh benx Yiutai Mienh.
5Haamaan buatc Mo^nde^kai maiv gueic maiv baaix, ninh ziouc qiex jiez! nziaamv mbueix haic. 6Mv baac Haamaan hiuv duqv Mo^nde^kai se Yiutai Mienh, ninh ziouc hnamv daaih kungx daix Mo^nde^kai ganh hnangv se maiv faaux duqv zoux. Ninh ziouc daav za'eix daix yiem gormx Aa^haa^su^e^latv Hungh nyei guoqv yietc zungv caux Mo^nde^kai juangc Yiutai Fingx nyei mienh.
7Aa^haa^su^e^latv zoux hungh ziepc nyeic hnyangx wuov hnyangx, zih hlaax, se ⟨Nisaanx hlaax,⟩ mienh yiem Haamaan nyei nza'hmien guaengx bu^aa lorz hlaax lorz hnoi, ndortv zuqc ziepc nyeic hlaax, se ⟨Nisaanx hlaax,⟩ ziepc faam wuov hnoi.
8Haamaan gorngv mbuox Aa^haa^su^e^latv Hungh, “Maaih fingx mienh faatv nzaanx zorpc jienv yiem meih gunv nyei guoqv nyei norm-norm saengv nyei baeqc fingx gu'nyuoz. Ninh mbuo nyei leiz caux maanc fingx mienh nyei leiz ganh nyungc. Ninh mbuo yaac maiv ei hungh diex nyei leiz-latc zoux. Se gorngv hungh diex liouh jienv ninh mbuo nor, se maiv lamh longc, tengx maiv duqv hungh diex. 9Hungh diex buatc horpc nor, tov njiec diuh lingc weic mietc ninh mbuo. Yie ziouc zorqv i sinx yietc waanc joih nyaanh fungx bieqc hungh diex nyei nyaanh lamz weic zoux hungh diex nyei guoqv gu'nyuoz nyei gong.”
10Hungh diex ziouc hlutv ninh nyei buoz-ndoqv-nzaeng yienx bun Yiutai Mienh nyei win-wangv, Aagakc Mienh, Ham^me^ndaa^taa nyei dorn, Haamaan. 11Hungh diex gorngv mbuox Haamaan, “Naaiv deix nyaanh caux naaiv fingx mienh yie jiu bun meih. Meih buatc horpc zuqc hnangv haaix nor zoux, sueih meih zoux aqv.”
12Zih hlaax ziepc faam wuov hnoi, Haamaan heuc hungh diex nyei sou-biuv gapv zunv fiev sou bun zoux hlo, tengx hungh diex gunv guoqv nyei yietc zungv jien, caux norm-norm saengv nyei saengv-ziouv, caux zuangx jien ziux norm-norm saengv nyei nzaangc caux fingx-fingx mienh nyei waac. Sou njiec Aa^haa^su^e^latv Hungh nyei mbuox yaac longc hungh diex nyei buoz-ndoqv-nzaeng nqaapv jienv yienx. 13Fungx fienx nyei mienh fungx sou mingh taux hungh diex gunv nyei norm-norm saengv. Sou gorngv, “Oix zuqc daix nzengc, mietc nzengc Yiutai Mienh, gox lunx, m'jangc m'sieqv caux fu'jueiv. Ziepc nyeic hlaax, se Aa^ndaa hlaax, ziepc faam wuov hnoi gu'nyuoz, oix zuqc daix taux nzengc, maiv dungx liouh yietc dauh cuotv singx maengc. Liemh ninh mbuo nyei jaa-dingh ga'naaiv oix zuqc luv nzengc.” 14Oix zuqc ceu naaiv diuh hungh lingc fungx mingh taux norm-norm saengv, zunh bun fingx-fingx mienh hiuv weic bun ninh mbuo liuc leiz ziangx zuov jienv wuov norm hnoi.
15Fungx fienx nyei mienh ziouc dengv hungh diex nyei lingc gaanv jienv cuotv mingh. Wuov diuh hungh lingc yaac yiem Susaax Domh Zingh zunh cuotv. Hungh diex caux Haamaan zueiz jienv hopv diuv, mv baac Susaax Zingh nyei baeqc fingx lunc nzengc aqv.