23

I Muoz-Sieqv Maaic Sin

1Yie aengx duqv zipv Ziouv nyei waac gorngv, 2“Baamh mienh aah! Maaih i dauh m'sieqv dorn, benx i muoz-sieqv juangc maa. 3Ninh mbuo yiem I^yipv maaic sin. Yiem hnyangx-jeiv lunx nyei ziangh hoc ninh mbuo zungv maaic sin aqv. Yiem naaic maaih mienh qam ninh mbuo nyei la'kuotv. Sieqv-lunx nyei ziangh hoc mienh muoqv ninh mbuo nyei nyorx. 4Dorc nyei mbuox heuc O^ho^laa, nziez nyei mbuox heuc O^ho^li^mbaa. Ninh mbuo i dauh daaih benx yie nyei. I dauh zungv yungz dorn yungz sieqv. Gorngv taux ninh mbuo nyei mbuox, O^ho^laa beiv Saa^maa^lie Zingh, O^ho^li^mbaa beiv Ye^lu^saa^lem Zingh.
5“O^ho^laa benx yie nyei wuov zanc ninh zoux buangh liouh nyei sic. Ninh oix haic hnamv ninh wuov deix Atc^si^lie Mienh, 6se zuqv lui-houx luoqc mborqv jaax henv nyei baeng caux zoux saengv-ziouv caux domh baeng-bieiv, yietc zungv hnyangx-jeiv lunx, se mienh oix nyei mienh, caux geh maaz nyei baeng. 7O^ho^laa ziouc hienx ninh mbuo, hienx yietc zungv gauh longx jiex nyei Atc^si^lie Mienh. Ninh longc dongh ninh oix haic naaiv deix mienh nyei yietc zungv miuc-fangx ziouc bun ganh maaih uix. 8Ninh maiv guangc ninh yiem I^yipv nyei ziangh hoc maaic sin nyei jauv, weic zuqc ninh hnyangx-jeiv lunx wuov zanc maaih mienh caux ninh bueix yaac muoqv ninh nyei nyorx yaac ziux ninh mbuo hanc nyei jauv hienx.
9“Weic naaiv yie zorqv ninh jiu bun hnamv ninh wuov deix mienh nyei buoz-ndiev, se jiu bun Atc^si^lie Mienh, dongh ninh oix haic nyei mienh. 10Naaiv deix mienh ciev njang ninh nyei lui-houx, caangv ninh nyei naamh nyouz mingh, yaac longc nzuqc ndaauv daix ninh. Ninh zuqc dingc liuz zuiz, nqa'haav yiem m'sieqv dorn mbu'ndongx ninh benx gouv gorngv.
11“Ninh nyei nziez, O^ho^li^mbaa, buatc liuz, mv baac ninh corc zoux gauh waaic jiex ninh nyei dorc aqv. Yiem ninh ba'laqc saeng hienx nyei jauv ninh zungv zoux jiex ninh nyei dorc. 12Ninh oix haic Atc^si^lie Mienh, se saengv-ziouv, domh baeng-bieiv, zuqv lui-houx nzueic mborqv jaax henv nyei baeng, caux geh maaz nyei baeng, yietc zungv hnyangx-jeiv lunx, se mienh oix nyei mienh. 13Yie yaac buatc ninh zuqc maaih uix mi'aqv. Ninh mbuo i muoz-sieqv juangc diuh jauv yangh.
14“Mv baac O^ho^li^mbaa jaa zoux ninh hienx nyei jauv camv jienv faaux. Ninh buatc mienh nyei fangx waaz jienv wuov njongc, se longc setv siqv waaz Ken^ndie Mienh nyei fangx. 15Jaaiv sai jienv houx-hlaang, m'nqorngv nyatv jienv ndie aengx hnaeng njiec. Dauh dauh hnangv baeng-bieiv. Fangx zeiv buatc hnangv Mbaa^mbi^lon Mienh, se Ken^ndie Deic-Bung nyei mienh. 16O^ho^li^mbaa buatc liuz, haiz oix haic ninh mbuo, ziouc paaiv mienh mingh Ken^ndie lorz ninh mbuo. 17Mbaa^mbi^lon Mienh ziouc daaih caux ninh bueix, ziux ninh mbuo hanc nyei jauv zoux, ziouc bun ninh maaih uix. Zuqc maaih uix liuz, ninh youx mi'aqv, maiv mangc ninh mbuo aqv. 18Ninh hienx nyei jauv ninh zoux duqv nqaengc, sueih mienh mangc ninh laengh gaengv nyei sin. Yie ziouc youx ninh hnangv zinh ndaangc yie youx ninh nyei dorc nor. 19Mv baac ninh corc jaa hienx camv jienv faaux, jangx taux ninh hnyangx-jeiv lunx nyei ziangh hoc yiem I^yipv Deic-Bung maaic sin wuov zanc aqv. 20Yiem wuov ninh oix haic hnamv ninh wuov deix. Ninh mbuo hienx nyei jauv henv hnangv lorh gouv maaz-gouv saeng nor. 21Hnangv naaic meih haiz feix duqv hnangv meih hnyangx-jeiv lunx nyei ziangh hoc meih yiem I^yipv maaic sin. Maaih mienh qam meih nyei la'kuotv. Sieqv-lunx nyei ziangh hoc yaac muoqv meih nyei nyorx.

Tin-Hungh Dingc O^ho^li^mbaa Nyei Zuiz

22“O^ho^li^mbaa aah! Weic naaiv Ziouv Tin-Hungh gorngv, ‘Yie oix bun zinh ndaangc hnamv meih mv baac nqa'haav meih youx wuov deix mienh daaih mborqv meih. Yie oix dorh ninh mbuo yiem biei bung daaih caux meih doix-dekc. 23Yie dorh Mbaa^mbi^lon Mienh, Ken^ndie nyei zuangx mienh, Bekotc Mienh, Qo^aa Mienh, Ko^aa Mienh, liemh Atc^si^lie nyei zuangx mienh, se hnyangx-jeiv lunx, dongh mienh oix nyei mienh. Yietc zungv benx saengv-ziouv caux domh baeng-bieiv fiuv-baeng-bieiv caux mborqv jaax henv nyei baeng, yietc zungv geh jienv maaz. 24Ninh mbuo ziouc yiem baqv bung daaih caux meih mborqv jaax, yaac dorh jienv mborqv jaax nyei maaz-cie, tor ga'naaiv nyei cie, caux ziex fingx mienh camv. Ninh mbuo ndongx jienv hlieqv-muoc, nanv jienv domh torngv-baaih fiuv-torngv-baaih mbaih jienv yiem meih nyei biei bung mborqv meih. Yie oix zorqv meih jiu bun ninh mbuo siemv, ninh mbuo ziouc ziux ninh mbuo siemv nyei leiz dingc meih nyei zuiz. 25Yie nouz haic meih, oix bun ninh mbuo qiex jiez jienv zoux bun meih. Ninh mbuo oix gaatv meih nyei mba'zorng caux meih nyei m'normh guangc. Yiem meih zengc njiec nyei mienh oix zuqc nzuqc ndaauv daix. Ninh mbuo oix zorqv meih nyei dorn caux meih nyei sieqv. Liouh njiec nyei mienh oix zuqc douz buov qui. 26Ninh mbuo oix ciev nzengc meih nyei lui-houx yaac zorqv meih nzueic haic nyei siou-setv. 27Hnangv naaic yie ziouc bun meih yiem I^yipv dorh daaih wuov deix hienx nyei, maaic sin nyei jauv dangx, weic bun meih maiv aengx cau hmien mangc I^yipv Mienh. Yiem naaiv mingh yaac maiv jangx ninh mbuo.’
28“Weic zuqc Ziouv Tin-Hungh gorngv, ‘Yie oix zorqv meih jiu bun yiem meih nzorng wuov deix mienh nyei buoz-ndiev, se meih youx wuov deix mienh nyei buoz-ndiev. 29Ninh mbuo ziouc nzorng jienv zoux bun meih, zorqv nzengc meih laauh luic duqv daaih nyei yietc zungv ga'naaiv bun meih njang sin laengh gaengv nyei yiem. Maaic sin caux buangh liouh nyei jauv ziouc cuotv daaih nqaengc nyei. 30Meih hienx nyei, maaic sin nyei jauv bun meih zuqc naaiv deix sic, weic zuqc meih maaic sin bun maanc guoqv mienh, yaac laaix ninh mbuo nyei miuc-fangx bun ganh maaih uix aqv. 31Meih yangh meih nyei dorc yangh nyei jauv. Weic naaiv yie zorqv ninh nyei zaanv jiu bun yiem meih nyei buoz.’
32“Ziouv Tin-Hungh hnangv naaiv gorngv,
  “+‘Meih oix zuqc hopv meih nyei dorc hopv nyei zaanv.
   Naaiv norm zaanv youc ndo youc hlo.
  Meih oix zuqc mienh jatv, zuqc mienh huotv,
   weic zuqc naaiv norm zaanv dapv duqv camv.
  33Meih zungv hopv nquin yaac zuqc nzauh kouv,
   naaiv norm zaanv bun mienh gamh nziex yaac zuqc baaic huaang.
   Se meih nyei dorc, Saa^maa^lie, nyei zaanv.
  34Meih oix zuqc hopv naaiv norm zaanv yaac hopv taux nzengc.
   Zorqv zaanv mborqv huv,
   longc yietc hlengx yietc hlengx guetv ganh nyei nyorx.’
Naaiv se yie, Ziouv Tin-Hungh, gorngv liuz aqv.
35“Weic naaiv Ziouv Tin-Hungh gorngv, ‘Weic zuqc meih la'kuqv yie, zorqv yie zoi guangc meih nyei nqa'haav nqaang, meih ziouc oix zuqc ndaam-dorng meih hienx nyei, maaic sin nyei sic.’+”

Tin-Hungh Dingc I Muoz-Sieqv Nyei Zuiz

36Ziouv aengx gorngv mbuox yie, “Baamh mienh aah! Meih oix siemv O^ho^laa caux O^ho^li^mbaa fai? Hnangv naaic oix zuqc zorqv ninh mbuo zoux gamh nziev nyei sic gorngv mbuox ninh mbuo, 37weic zuqc ninh mbuo hienx nqox, buoz yaac maaih daix mienh nyei nziaamv guoqv jienv. Ninh mbuo baaix miuc-fangx, liemh ninh mbuo yungz bun yie nyei fu'jueiv longc douz buov ziec zoux miuc-fangx nyei nyanc hopv. 38Maiv daan mbuoqc naaiv. Ninh mbuo hnangv naaiv nor zoux bun yie. Dongh wuov hnoi ninh mbuo zoux bun yie nyei singx dinc maaih uix yaac bun yie nyei Dingh Gong Hnoi maiv cing-nzengc. 39Se ninh mbuo daix ninh mbuo nyei naamh nyouz fongc horc ziec miuc-fangx, dongh wuov hnoi ninh mbuo bieqc yie nyei singx dinc, bun yie nyei singx dinc maaih uix. Ninh mbuo yiem yie nyei biauv hnangv naaiv nor zoux.
40“Maiv daan mbuoqc naaiv. Ninh mbuo paaiv douc fienx mienh mingh go nyei dorngx lorz mienh daaih. Wuov deix mienh yaac za'gengh daaih aqv. Meih ziouc nzaaux sin, longc setv nzaatv m'zing, zorng nzueic nyei siou-setv zipv ninh mbuo. 41Meih zueiz jienv nzueic nyei coux yaac maaih dieh don jienv meih nyei nza'hmien. Dieh gu'nguaaic maaih yie nyei hung caux yie nyei ga'lanv youh.
42“Caux ninh yiem wuov maaih yietc domh guanh maiv hiuv duqv you-nzauh nyei mienh nyei qiex mbui. Aengx maaih mienh yiem deic-bung-huaang dorh diuv nquin nyei mienh caux jienv pou-tong nyei mienh daaih. Wuov deix mienh zorqv jiemh bun wuov deix m'sieqv dorn dangh jienv yaac zorqv nzueic haic nyei ningv bun ninh mbuo ndongx jienv. 43Yie ziouc gorngv taux naaiv dauh laaix hienx nyei jauv ndortv jaax nyei m'sieqv dorn, ‘Mienh corc hienx ninh nyei fai?’ 44Weic zuqc mienh corc bieqc mingh lorz ninh hnangv bieqc mingh lorz maaic sin nyei m'sieqv dorn nor. Ninh mbuo ziouc bieqc mingh lorz O^ho^li caux O^ho^li^mbaa hienx. 45Mv baac kuv mienh oix dingc ninh mbuo nyei zuiz ziux dingc hienx nqox nyei m'sieqv dorn nyei zuiz, caux daix mienh bun nziaamv liouc cuotv nyei m'sieqv dorn nyei zuiz, weic zuqc ninh mbuo benx hienx nqox nyei m'sieqv dorn. Buoz yaac guoqv jienv daix mienh nyei nziaamv.
46“Ziouv Tin-Hungh hnangv naaiv gorngv, ‘Dorh mienh camv daaih mborqv ninh mbuo, haeqv ninh mbuo gamh nziex yaac zuqc mienh luv. 47Naaiv deix mienh oix zorqv la'bieiv zong ninh mbuo yaac longc nzuqc ndaauv daix. Liemh ninh mbuo nyei naamh nyouz yaac daix yaac bungx douz buov ninh mbuo nyei biauv.
48“ ‘Hnangv naaic, yie ziouc yiem naaiv norm deic-bung bun hienx nyei jauv dangx, weic donv yietc zungv m'sieqv dorn maiv dungx zuotc meih mbuo hienx nyei jauv. 49Ziux meih mbuo hienx nyei jauv yie oix winh bun meih mbuo. Meih mbuo yaac oix zuqc ndaam-dorng baaix miuc-fangx nyei zuiz. Wuov zanc meih mbuo ziouc hiuv duqv yie se Ziouv Tin-Hungh. ’+”