48

Bun Nqoi Ndau Baqv Bung Nyei I^saa^laa^en Fingx

1“Yiem naaiv mingh se fingx-fingx I^saa^laa^en Mienh nyei mbuox. Yiem baqv bung maengx jiez gorn yiem koiv gan Hetv^lon wuov diuh jauv mingh taux Haamatv nyei jauv-kuv aengx mingh taux Haasaa Enon, (se yiem Ndaa^matv^gatc nyei baqv bung gapv-jaaix nitv jienv Haamatv) Ndaan Fingx duqv nyei buonc ndau yiem dong bung mingh taux fai bung.
2“Nitv jienv Ndaan nyei deic-jaaix, yiem dong bung taux fai bung benx Aa^se nyei buonc ndau.
3“Nitv jienv Aa^se nyei deic-jaaix, yiem dong bung taux fai bung benx Napv^taa^li nyei buonc ndau.
4“Nitv jienv Napv^taa^li nyei deic-jaaix, yiem dong bung taux fai bung benx Maa^natv^se nyei buonc ndau.
5“Nitv jienv Maa^natv^se nyei deic-jaaix, yiem dong bung taux fai bung benx E^faa^im nyei buonc ndau.
6“Nitv jienv E^faa^im nyei deic-jaaix, yiem dong bung taux fai bung benx Lu^mben nyei buonc ndau.
7“Nitv jienv Lu^mben nyei deic-jaaix, yiem dong bung taux fai bung benx Yu^ndaa nyei buonc ndau.

Ganh Ca'lengc Nyei Ndau

8“Nitv jienv Yu^ndaa Fingx nyei gapv-jaaix, yiem dong bung taux fai bung, oix zuqc zorqv cuotv deix benx ganh ca'lengc nyei ndau, jangv i waanc biaa cin ndorqc. Yiem dong bung taux fai bung yaac fih ndaau yietc fingx duqv nyei buonc ndau. Singx dinc yiem ziangx mbu'ndongx
9“Dongh meih mbuo zorqv cuotv benx Ziouv nyei ndau, ndaauv i waanc biaa cin ndorqc, jangv yietc waanc ndorqc. 10Naaiv deix cing-nzengc ndau oix zuqc hnangv naaiv bun nqoi. Sai mienh duqv nyei buonc yiem baqv bung maengx, ndaauv i waanc biaa cin ndorqc, fai bung jangv yietc waanc ndorqc, dong bung jangv yietc waanc ndorqc, naamh bung ndaauv i waanc biaa cin ndorqc. Ziouv nyei singx dinc yiem ziangx mbu'ndongx. 11Naaiv deix ndau benx saax cing-nzengc nyei sai mienh nyei buonc, se Saax^ndokc nyei zeiv-fun, dongh ei jienv yie hatc nyei waac. I^saa^laa^en Mienh zoux dorngc wuov zanc, ninh mbuo maiv gan jienv zoux dorngc hnangv Lewi Mienh zoux. 12Naaiv deix ndau yiem cing-nzengc nyei ndau gu'nyuoz benx ninh mbuo lengc jeiv nyei buonc, se gauh cing-nzengc jiex nyei buonc, yaac nitv jienv Lewi Mienh nyei buonc ndau.
13“Yiem sai mienh nyei ndau ga'hlen se Lewi Mienh duqv nyei buonc ndau, ndaauv i waanc biaa cin ndorqc, jangv yietc waanc ndorqc. Yietc zungv ziouc ndaauv i waanc biaa cin ndorqc, jangv yietc waanc ndorqc. 14Naaiv deix ndau maiv dungx zorqv haaix deix daaih maaic fai tiuv. Maiv dungx bun benx ganh dauh nzipc nyei buonc weic zuqc benx Ziouv nyei cing-nzengc ndau.
15“Zengc njiec nyei ndau jangv biaa cin ndorqc, ndaauv i waanc biaa cin ndorqc longc weic zingh qiemx zuqc longc nyei, se weic zoux biauv caux miev-ciangv. Zingh oix zuqc yiem mbu'ndongx. 16Zingh nyei ciqv-cunx se hnangv naaiv. Baqv bung biei cin hmz baeqv ndorqc, naamh bung biei cin hmz baeqv ndorqc, dong bung biei cin hmz baeqv ndorqc, fai bung biei cin hmz baeqv ndorqc. 17Zingh oix zuqc maaih miev-ciangv. Yiem baqv bung maengx maaih nyic baeqv hmz ziepc ndorqc, yiem naamh bung maaih nyic baeqv hmz ziepc ndorqc, dong bung maaih nyic baeqv hmz ziepc ndorqc, fai bung maaih nyic baeqv hmz ziepc ndorqc. 18Nitv jienv cing-nzengc nyei buonc zengc njiec nyei ndau, dong bung maengx ndaauv yietc waanc ndorqc, fai bung ndaauv yietc waanc ndorqc yaac yiem nitv jienv cing-nzengc nyei deic-jaaix. Yiem naaiv deix ndau gu'nyuoz duqv nyei gaeng-zuangx benx yiem zingh gu'nyuoz zoux gong wuov deix mienh nyei nyanc hopv. 19Yiem zingh gu'nyuoz zoux gong nyei fingx-fingx I^saa^laa^en Mienh oix zuqc laih naaiv deix ndau. 20Meih mbuo ganh ca'lengc zorqv cuotv nyei cing-nzengc ndau, liemh zingh nyei ndau, feix-bung jangv ndaauv i waanc biaa cin ndorqc.
21“Cing-nzengc nyei ndau caux zingh nyei ndau i bung ga'hlen zengc njiec nyei ndau oix zuqc benx hungh diex nyei. Yiem wuov deix i waanc biaa cin ndorqc nyei ga'hlen mingh taux dong bung nyei gapv-jaaix, aengx yiem wuov deix i waanc biaa cin ndorqc nyei ga'hlen mingh taux fai bung nyei gapv-jaaix caux fingx-fingx duqv nyei ndau fih ndongc. Naaiv deix ndau oix zuqc bun benx hungh diex nyei buonc. Cing-nzengc nyei ndau caux zaangc Tin-Hungh nyei biauv nyei singx dinc yiem mbu'ndongx. 22Lewi Mienh nyei ndau caux zingh nyei ndau oix zuqc yiem hungh diex nyei buonc mbu'ndongx. Yiem Yu^ndaa Fingx nyei gapv-jaaix caux Mben^yaa^min Fingx nyei gapv-jaaix mbu'ndongx benx hungh diex nyei buonc.

Bun Nqoi Ndau Naamh Bung Nyei Fingx

23“Zengc njiec nyei fingx, yiem dong bung taux fai bung benx Mben^yaa^min Fingx nyei buonc ndau.
24“Nitv jienv Mben^yaa^min Fingx nyei gapv-jaaix, yiem dong bung taux fai bung benx Si^me^on Fingx nyei buonc ndau.
25“Nitv jienv Si^me^on nyei gapv-jaaix yiem dong bung taux fai bung benx Itc^saax^kaa Fingx nyei buonc ndau.
26“Nitv jienv Itc^saax^kaa Fingx nyei gapv-jaaix, yiem dong bung taux fai bung benx Se^mbu^lun Fingx nyei buonc ndau.
27“Nitv jienv Se^mbu^lun Fingx nyei gapv-jaaix, yiem dong bung taux fai bung benx Gaatc Fingx nyei buonc ndau.
28“Gaatc Fingx nyei naamh bung gapv-jaaix yiem Taamaa mingh taux Me^li^mbatc Kaa^ndetc nyei wuom, gan I^yipv nyei ndoqv-dorn mingh taux Domh Koiv.
29“Naaiv deix ndau se meih mbuo oix zuqc paaiv bun nqoi fingx-fingx I^saa^laa^en Mienh benx ninh mbuo nzipc nyei buonc. Naaiv ziouc benx ninh mbuo duqv nyei buonc ndau.” Ziouv Tin-Hungh hnangv naaiv gorngv.

Zingh Nyei Laatc Gaengh

30“Yiem naaiv mingh gorngv cuotv zingh nyei laatc gaengh. Zingh nyei baqv bung biei cin hmz baeqv ndorqc. 31Dauh dauh laatc gaengh gan I^saa^laa^en Fingx nyei mbuox heuc. Baqv bung maaih buo dauh laatc gaengh. Maaih Lu^mben nyei laatc gaengh, Yu^ndaa nyei laatc gaengh caux Lewi nyei laatc gaengh.
32“Dong bung biei cin hmz baeqv ndorqc. Maaih buo dauh laatc gaengh. Maaih Yosepv nyei laatc gaengh, Mben^yaa^min nyei laatc gaengh caux Ndaan nyei laatc gaengh.
33“Naamh bung biei cin hmz baeqv ndorqc. Maaih buo dauh laatc gaengh. Maaih Si^me^on nyei laatc gaengh, Itc^saax^kaa nyei laatc gaengh caux Se^mbu^lun nyei laatc gaengh.
34“Fai bung biei cin hmz baeqv ndorqc. Maaih buo dauh laatc gaengh. Maaih Gaatc nyei laatc gaengh, Aa^se nyei laatc gaengh caux Napv^taa^li nyei laatc gaengh.
35“Ndorqc huing gormx zingh maaih yietc waanc hietc cin ndorqc.
 “Yiem naaiv mingh naaiv norm zingh nyei mbuox heuc,
  ‘Ziouv Yiem Naaiv.’+”