6

Nau Srôih Jêh Ri Nau Tông Bâr

1Hơi oh nâu, tơlah du huê rhuh tâm nau tih, khân may nơm jêng phung hăn tĭng nâm Brah Huêng Ueh, ăn khân may nkra păng ma nau rdơ̆ rbăn. Bi khân may nơm njrăng lĕ, klach lah geh nau ndơm tât ma khân may tâm ban lĕ.
2Kơl tâm anh nau jâk ndrăng khân may, pôri khân may ăn tâm di nanê̆ jêh nau vay bơh Brah Krist. 3Yorlah tơlah du huê bunuyh mĭn păng nơm geh nau khư, ƀiălah mâu, păng mâu khư ôh, pôri, păng ndơm păng nơm yơh. 4Ƀiălah ăn ăp nơm sek uănh ma kan păng nơm pôri păng mra geh nau tâm rnê knŏng êng tâm păng nơm, mâu di tă bơh bu êng ôh. 5Yorlah ăp nơm mra anh nau jâk păng nơm.

Nau Srih Jêh Ri Nau Rek

6Mbu nơm tăng bu nti nau ngơi, ăn khân păng sŏk bơh lĕ ndơ khân păng geh tâm pă ăn ma nơm nti lah ma khân păng.
7Lơi ta ndơm khân may nơm ôh; Brah Ndu mâu dơn nau bu mưch ôh, yorlah moh ntil găr bu srih jêh, bu mra rek play păng. 8Mbu nơm srih ma nglay săk mra rek bơh nglay săk nau rai yot, ƀiălah mbu nơm srih ma Brah Huêng Ueh mra rek bơh Brah Huêng Ueh nau rêh ƀaƀơ n'ho ro. 9Lơi ăn he jêng rgănh tâm nau ƀư ueh, yorlah tơlah he mâu rdja nuih n'hâm ôh, he mra rek tât ta yan găl. 10Pôri dôl nar găl, ăn he ƀư nau ueh ma lĕ rngôch bunuyh, play nanê̆ ngăn ma phung oh nâu tâm nau chroh.

Nau Koh Ntâu Si Tâm Rkăng Brah Krist

11Uănh hom samƀŭt aơ ti gâp nơm nchih ma khân may, rplay samƀŭt rhêh rhênh.
12Lĕ rngôch mbu nơm ŭch ƀư maak ma bunuyh tĭng nâm nglay săk, khân păng nchâp khân may ƀư nau koh ntâu, gay ma khân păng mâu dơn nau bu ƀư mhĭk yor si tâm rkăng Brah Krist yơh. 13Yorlah phung nây ƀư nau koh ntâu jêh ƀiălah mâu tông nau vay ôh. Khân păng ŭch ma khân may ƀư nau koh ntâu gay geh nau tâm rnê tâm nglay săk khân may. 14Bi ma gâp, gâp mâu tâm rnê ma gâp nơm ôh, knŏng tâm rnê ma si tâm rkăng Kôranh Brah he, Yêsu Krist. Yor si tâm rkăng nây neh ntu jêng khĭt jêh ma gâp tâm ban lĕ. 15Yorlah nau khlay mâu di nau koh ntâu, mâu di lĕ yor nau mâu koh ntâu, ƀiălah nau jêng bunuyh mhe.
16Ăn nau đăp mpăn jêh ri nau yô̆ jŭr ta phung hăn tâm nau aơ, jêh ri ta phung Israel tă bơh Brah Ndu.
17Ntơm bơh aƀaơ rlet panăp lơi ăn du huê bunuyh ƀư rsuak gâp ôh; yorlah gâp djôt ta săk jăn gâp nơm têl Brah Yêsu.
18Hơi phung oh nâu, ăn nau yô̆ bơh Kôranh Brah he, Yêsu Krist, gŭ ndrel ma huêng khân may. Amen.