10

Brah Ndu Jêh Ri, Phung Rup Brah Nau Ƀư Rai Yêrusalem

¹Ơ ngih Israel, iăt hom nau Yêhôva lah ma khân may,
²Yêhôva lah pô aơ: "Lơi ta tĭng ôh trong nau vay bri bu êng,
mâu klach lĕ, tơlah saơ nau tâm mpơl kalơ trôk, nđâp lah phung bri êng rdja nuih yor nau nây.
³Yorlah nau vay mbên phung ƀon lan jêng mƀruh.
Bu kăl tơm si tâm krŏng, Jêh ri du huê n'hăk trah meh ma du n'gâr sung.
⁴Phung bunuyh mblum tơm si nây đah prăk, mah; sŏk kon nôp pâng kđĭn gay nâp, pônây păng mâu dơi chôt ôh.
⁵Rup brah khân păng jêng nâm bu pla mut nhhu bu, mâu gĭt ngơi ôh; bu tung khân păng yorlah mâu blau chuat.
Lơi ta klach ôh ma khân păng, yorlah khân păng mâu dơi ƀư nau mhĭk ôh, mâu lĕ khân păng dơi ƀư nau ueh."
⁶Mâu geh nơm tâm ban ma may! Ơ Yêhôva, may jêng toyh, amoh may jêng toyh jêh ri brah
⁷Ơ hađăch ma lam bri dak! Mbu moh mâu klach may?
Yorlah nau aơ jêng khư ma may.
Yorlah ta nklang lĕ rngôch phung blau mĭn tâm phung mpôl băl bunuyh, jêh ri lĕ rngôch ƀon bri hađăch khân păng, mâu geh ôh nơm tâm ban ma may.
⁸Khân păng jêng rluk mâl; rup trah tơm si dơm sâm nti khân păng.
⁹Bu djôt leo tă bơh ƀon Tarsis prăk ơm bu chiăr rlat, jêh ri mah bơh bri Uphas. Tă bơh ti phung njêh nkra, jêh ri kan ti nơm chiăr mah, bok khân păng geh bok ĭr bok sut ƀư ao, nây ăt kan phung n'hăk vay ƀư.
¹⁰Ƀiălah Yêhôva jêng Brah Ndu ngăn; Păng jêng Brah Ndu rêh, jêng hađăch n'ho ro. Tơlah Păng ji nuih; neh ntu n'găr da dê lĕ rngôch bri dak mâu dơi dơn ôh nau ji nuih Păng.
¹¹pô aơ may mra lah ma khân păng: 'Phung brah aơ mâu mâp njêng ôh phung trôk, jêh ri neh ntu, mra rai yot bơh neh ntu jêh ri bơh tâm dâng phung trôk.'"
¹²Yêhôva yơh hŏ rhăk jêh neh ntu ma nau brah Păng, hŏ ndâk jêh neh ntu ăn nâp ma nau blau mĭn Păng, jêh ri ma nau gĭt rbăng Păng lăk jêh trôk.
¹³Tơlah Păng ngơi, geh nâm bu nteh rbuh dak tâm phung trôk,
Păng ăn dak ngom hao lam ntŭk ta neh ntu. Păng ăn lơp nchrang dôl trôk mih, jêh ri Păng ăn Sial khôm tă luh bơh jay Păng; ¹⁴ăp nơm bunuyh jêng rluk jêh ri mâu geh nau blau mĭn ôh; ăp nơm bunuyh chiăr mah geh nau prêng yor rup brah chiăr jêh,
Yorlah rup brah păng jêng brah nklă dơm, jêh ri khân păng mâu blau nsôr n'hâm ôh.
¹⁵Khân păng jêng dơm dam, jêng kan nau ndơm; tât nar bu tâm rmal khân păng, khân păng mra rai yot.
¹⁶Drăp Brah Ndu nơm prăp ma phung Yakôp ndơn mâu jêng tâm ban pô nây ôh, yorlah Păng jêng nơm rhăk njêng lĕ rngôch mpa, jêh ri Israel jêng du ndŭl mpôl ndơn drăp Păng. Amoh Păng jêng Yêhôva ma phung tahan.

Nau Ƀư Rai Bri Yuda

¹⁷Ơ phung bu nchueng ŭch lơh, rgum hom ndô ndơ khân may,
¹⁸yorlah Yêhôva lah pô aơ:
"Aơ, nar aơ gâp mra mƀăr lơi bunuyh ƀon lan, gŭ tâm neh aơ, gâp mra ăn khân păng rêh ni, ăn khân păng kah gĭt.
¹⁹Rêh ni ngăn ma gâp yor ntŭk sôt gâp! ntŭk sôt mâu blau bah ôh. Ƀiălah gâp lah:
"Aơ yơh jêng ngăn nau nđêl nji, jêh ri gâp mra dơn nau nây."
²⁰Ngih bok gâp rai jêh, jêh ri lĕ rngôch rse kât hŏ tăch da dê, phung kon gâp chalơi gâp, mâu hôm saơ khân păng ôh; mâu hôm geh bunuyh ôh gay kơl rdâk tay ngih bok gâp, jêh ri kơl nching ntŭk gâp gŭ.
²¹Yorlah phung rmăk biăp jêng rluk; jêh ri mâu ôp ma Yêhôva ôh; yor nây khân păng mâu chăt jêng ôh, jêh ri lĕ rngôch biăp khân păng nkhah du êng êng.
²²Aơ, geh tâng bâr mbơh, du nau mhe mhan tât! Nau rŭng răng toyh luh bơh n'gor bri palơ, gay ƀư ăn lĕ rngôch ƀon n'gor Yuda jêng rngol, jêng ntŭk trôm so bri gŭ.
²³Ơ Yêhôva, gâp gĭt bunuyh mâu dơi jêng kôranh ma păng nơm ôh, bunuyh mâu dơi gai nhuat păng chuat ôh.
²⁴Nkra hom gâp, Ơ Yêhôva, ƀiălah tĭng nâm nau di, mâu di ôh ma nau may ji nuih, klach lah may ƀư rai lơi gâp.
²⁵Dăn nkhŭt hom nau may ji nuih ma mpôl băl bunuyh, phung mâu hŏ gĭt năl may ôh ma phung ƀon lan mâu kuăl mbơh sơm ma amoh may ôh.
Yorlah khân păng ƀư rai jêh phung Yakôp, jêh ri khân păng ƀư rai lĕ khân ôbăl, jêh ri ăn ntŭk khân ôbăl jêng rngol.