34

Ye^le^mi Donv Se^nde^ki^yaa

1Mbaa^mbi^lon hungh, Ne^mbu^katv^netv^saa, caux ninh nyei yietc zungv jun-baeng, caux yiem lungh ndiev ninh gunv nyei norm-norm guoqv caux fingx-fingx mienh mborqv Ye^lu^saa^lem caux weih gormx nyei norm-norm zingh wuov zanc, Ye^le^mi duqv zipv Ziouv nyei waac gorngv, 2“Ziouv, I^saa^laa^en nyei Tin-Hungh, hnangv naaiv gorngv, ‘Meih oix zuqc mingh caux Yu^ndaa hungh, Se^nde^ki^yaa, gorngv yaac gorngv mbuox ninh, “Ziouv hnangv naaiv gorngv, mangc maah! Yie zorqv naaiv norm zingh jiu yiem Mbaa^mbi^lon hungh nyei buoz-ndiev. Ninh yaac oix longc douz buov. 3Meih biaux maiv ndutv ninh nyei buoz, zungv zuqc zorqv jiu bun yiem ninh nyei buoz-ndiev. Meih duqv buatc Mbaa^mbi^lon hungh m'zing doix m'zing, yaac duqv caux ninh hmien doix hmien gorngv waac. Meih yaac oix zuqc mingh Mbaa^mbi^lon.”
4“ ‘Mv baac Yu^ndaa hungh, Se^nde^ki^yaa aah! Muangx Ziouv nyei waac. Ziouv hnangv naaiv gorngv taux meih, “Meih maiv zuqc nzuqc ndaauv daix. 5Meih duqv baengh orn nyei guei seix. Mienh hnangv haaix nor weic taaih meih nyei ong-taaix buov ndaang nyei ga'naaiv, se weic yiem ndaangc meih wuov deix hungh diex, ninh mbuo oix hnangv wuov nor weic meih buov ndaang nyei ga'naaiv yaac weic meih nzauh nyiemv gorngv, ‘Ziouv aah! Kouv aqv.’ Weic zuqc yie gorngv liuz naaiv deix waac aqv.”+’+” Ziouv hnangv naaiv gorngv.
6⟨Douc waac mienh,⟩ Ye^le^mi, ziouc yiem Ye^lu^saa^lem zorqv naaiv deix yietc zungv waac gorngv mbuox Yu^ndaa hungh, Se^nde^ki^yaa. 7Wuov zanc Mbaa^mbi^lon hungh nyei jun-baeng mborqv jienv Ye^lu^saa^lem yaac mborqv Yu^ndaa zengc njiec nyei yietc zungv zingh, se Laakitv Zingh caux Aa^se^kaa Zingh, weic zuqc yiem Yu^ndaa kungx zengc naaiv deix i norm weih wuonv nyei zingh hnangv.

Bungx Nqoi Nouh Nyei Jauv

8Se^nde^ki^yaa Hungh caux Ye^lu^saa^lem Zingh nyei zuangx baeqc fingx liepc ngaengc waac gorngv mbuox ninh mbuo zunh bungx nqoi nyei leiz gorngv, 9gorqv-mienh oix zuqc bungx nqoi gorqv-mienh nyei Hipv^lu nouh maiv gunv m'jangc m'sieqv, weic bun ninh mbuo maiv longc haaix dauh Yiutai Mienh gorx-youz zoux nouh. 10Ninh mbuo ziouc muangx, liemh yietc zungv jien caux zuangx baeqc fingx, da'faanh juangc liepc ngaengc waac laengz ganh oix bungx ganh nyei nouh, liemh nouh gauv nouh beiz, weic bun ninh mbuo maiv zuqc aengx zoux nouh aqv. Ninh mbuo ziouc ei jienv zoux, bungx ninh mbuo nyei nouh cuotv. 11Mv baac nqa'haav ninh mbuo hnamv-nzuonx aengx zorqv dongh ninh mbuo bungx nqoi wuov deix nouh gauv nouh beiz nzuonx, bun naaiv deix mienh aengx zuqc ninh mbuo aapv zoux nouh.”
12Ye^le^mi aengx duqv zipv Ziouv nyei waac gorngv, 13“Ziouv, I^saa^laa^en Mienh nyei Tin-Hungh, hnangv naaiv gorngv, ‘Yie dorh meih mbuo nyei ong-taaix cuotv I^yipv Deic-Bung zuqc zoux nouh nyei dorngx wuov zanc, yie caux ninh mbuo liepc ngaengc waac gorngv, 14“Taux da'cietv hnyangx gorqv-mienh oix zuqc bungx zuqc maaic bun meih longc zoux nouh nyei juangc Hipv^lu fingx nyei mienh, dongh fu-sux meih juqv hnyangx nyei mienh.” Mv baac meih mbuo nyei ong-taaix maiv muangx yie yaac maiv baeng m'normh muangx yie. 15Jiex daaih maiv lauh meih mbuo goiv hnyouv zoux ziux yie nyei m'zing mangc buatc horpc nyei, weic zuqc meih mbuo zunh gorngv bungx nqoi nyei leiz, gorqv-mienh mbuox gorqv-mienh nyei juangc laangz mienh. Meih mbuo yiem dongh gan yie nyei Mbuox heuc wuov norm biauv, dorng jienv yie liepc jiez ngaengc waac. 16Mv baac meih mbuo aengx mbienv hnyouv bun yie nyei mbuox maaih uix weic zuqc meih mbuo zorqv meih mbuo nyei nouh gauv nouh beiz nzuonx daaih, dongh meih mbuo ziux ninh mbuo nyei hnyouv oix nyei bungx nqoi wuov deix, aengx zuqc meih mbuo aapv zoux nouh.’
17“Weic naaiv, Ziouv hnangv naaiv gorngv, ‘Meih mbuo maiv muangx yie weic zuqc meih mbuo gorqv-mienh maiv zunh bungx nqoi nyei leiz bun ganh nyei gorx-youz caux juangc laangz mienh. Mangc maah! Yie zunh mbuox meih mbuo, “Meih mbuo duqv bungx nqoi” weic bun meih mbuo zuqc nzuqc ndaauv, zuqc ngorc hnaangx, zuqc wuon-baengc. Yie aengx bun meih mbuo weic lungh ndiev maanc guoqv benx haeqv mienh gamh nziex nyei ga'naaiv. 18-19Yu^ndaa nyei jien, Ye^lu^saa^lem nyei jien, caux im dov nyei mienh, sai mienh, caux deic-bung nyei zuangx baeqc fingx, dongh yangh piqv zoux i maengx wuov dauh ngongh dorn mbu'ndongx jiex caux yie liepc jiez ngaengc waac. Mv baac ninh mbuo dorngc yie nyei ngaengc waac, maiv ei wuov deix ngaengc waac zoux. Yie ziouc oix zoux bun ninh mbuo hnangv ninh mbuo zoux bun wuov dauh ngongh dorn nor. 20Yie oix zorqv ninh mbuo jiu bun yiem ninh mbuo nyei win-wangv nyei buoz-ndiev yaac jiu bun yiem lorz ninh mbuo nyei maengc wuov deix mienh nyei buoz-ndiev. Ninh mbuo nyei sei ziouc benx ndaamv-lungh nyei norqc caux ndau-beih nyei hieh zoih nyei nyanc hopv.
21“ ‘Yu^ndaa nyei hungh, Se^nde^ki^yaa, caux ninh nyei jien yie oix jiu bun yiem ninh mbuo nyei win-wangv nyei buoz-ndiev caux lorz ninh mbuo nyei maengc wuov deix nyei buoz-ndiev, yaac jiu bun tuix leih nqoi ninh mbuo mingh wuov deix Mbaa^mbi^lon Hungh nyei jun-baeng nyei buoz-ndiev.’ 22Ziouv gorngv, ‘Yie oix hatc ninh mbuo, dorh ninh mbuo nzuonx daaih taux naaiv norm zingh. Ninh mbuo oix mborqv naaiv norm zingh yaac caangv duqv ziouc longc douz buov qui. Yie oix bun Yu^ndaa nyei zingh benx baaic huaang nyei dorngx, maiv maaih mienh yiem.”