3

Tin-Hungh Oix Siemv Maanc Guoqv Mienh

  1Ziouv gorngv, “Taux wuov deix hnoi, wuov deix ziangh hoc,
   dongh yie bun Yu^ndaa caux Ye^lu^saa^lem duqv longx hnangv loz wuov nor,
  2yie oix zorqv maanc guoqv mienh gapv zunv daaih, dorh ninh mbuo taux Ye^ho^saa^fatv Horngz, yiem naaic siemv ninh mbuo,
  weic zuqc ninh mbuo zorqv yie nyei baeqc fingx,
   se yie nzipc nyei I^saa^laa^en Mienh.
  Ninh mbuo bun yie nyei baeqc fingx nzaanx mingh yiem ziex guoqv mbu'ndongx,
   yaac zorqv yie nyei deic-bung bun nqoi.
  3Ninh mbuo dingc maengc mangc, zorqv yie nyei baeqc fingx bun nqoi,
   yaac zorqv dorn yienc maaic sin nyei m'sieqv dorn,
   aengx maaic sieqv weic duqv nyaanh maaiz diuv hopv.
4“O Tailaqv, Sai^ndorn caux Fi^li^saa^die Guoqv nyei norm-norm dorngx aah! Yie zoux haaix nyungc meih mbuo cingx daaih oix jaauv win bun yie fai? Meih mbuo jaauv win bun yie nor, yie ziouc siepv-siepv nyei winh nzuonx bun meih mbuo. 5Meih mbuo zorqv yie nyei jiem nyaanh yaac dorh yie jaaix jiex nyei ga'naaiv mingh an meih mbuo nyei zienh nyei miuc-biauv. 6Meih mbuo zorqv Yu^ndaa caux Ye^lu^saa^lem nyei mienh maaic bun Janx-Gikc, ziouc bun ninh mbuo leih ninh mbuo ganh nyei gapv-jaaix go.
7“Mangc maah! Yie ih zanc oix yiem ninh mbuo zuqc maaic mingh nyei dorngx dorh ninh mbuo nzuonx daaih. Ziux meih mbuo zoux nyei yie oix winh bun meih mbuo. 8Yie oix bun meih mbuo nyei dorn, meih mbuo nyei sieqv zuqc maaic bun yiem Yu^ndaa Mienh nyei buoz-ndiev. Ninh mbuo aengx dorh mingh maaic bun Se^mbaa Mienh, se maaic bun yiem go nyei yietc guoqv mienh.” Ziouv hnangv naaiv gorngv.
  9Oix zuqc yiem maanc guoqv mienh mbu'ndongx zunh gorngv,
   oix zuqc mbenc ziangx mborqv jaax.
  Heuc mborqv jaax nyei baeng daaih.
   Bun yietc zungv jun-baeng daaih fatv,
   bun ninh mbuo faaux daaih maah!
  10Zorqv laih bieiv daav benx nzuqc ndaauv,
   zorqv nzuqc limh daav benx cang.
  Bun mau nyei mienh gorngv,
   “Yie maaih qaqv henv.”
  11Meih mbuo weih gormx nyei maanc guoqv mienh aah!
   Siepv-siepv nyei daaih gapv zunv yiem wuov.
   “O Ziouv aac, tov dorh meih mborqv jaax nyei jun-baeng njiec daaih.
  12“Maanc guoqv oix zuqc jiez daaih.
   Oix zuqc mingh Ye^ho^saa^fatv Horngz,
  weic zuqc yie oix zueiz jienv wuov,
   siemv weih gormx nyei maanc guoqv.
  13Longc limh gaatv maah!
   Gaeng-zuangx zuoqc aqv.
  Daaih maah! Daaih nyueih a'ngunc biouv,
   weic zuqc a'ngunc diuv nyei zorngh aav lamh buangv aqv.
   Siou nyei dorngx zungv mienz cuotv,
  weic zuqc ninh mbuo zoux nyei orqv sic camv haic.”
  14Cin-cin waanc-waanc laanh mienh
   yiem siemv dingc nyei horngz,
  weic zuqc Ziouv nyei hnoi taux fatv
   yiem siemv dingc nyei horngz.
  15Mba'hnoi caux hlaax oix hmuangx mingh,
   hleix yaac maiv ziux njang.

Tin-Hungh Oix Ceix Fuqv Bun Ninh Nyei Baeqc Fingx

  16Ziouv yiem ⟨Si^on⟩ njunh njunh nyei heuc,
   yiem Ye^lu^saa^lem heuc cuotv mbui,
   lungh caux ndau dongz nzengc.
  Mv baac Ziouv benx ninh nyei baeqc fingx ndaauh kaux nyei dorngx,
   weic I^saa^laa^en Mienh benx wuonv nyei dorngx.
  17“Hnangv naaic meih mbuo ziouc hiuv duqv yie se Ziouv, meih mbuo nyei Tin-Hungh,
   yiem yie nyei cing-nzengc mbong, Si^on.
  Ye^lu^saa^lem ziouc benx cing-nzengc zingh,
   ganh fingx mienh yietc liuz maiv duqv aengx daaih caangv bieqc.
  18“Taux wuov hnoi domh mbong maaih a'ngunc huingx buangv nzengc.
   Fiuv-mbong yaac maaih ngongh guanh.
   Yu^ndaa nyei diuh diuh ndoqv maaih wuom liouc,
  yaac maaih zingv wuom yiem zaangc Ziouv nyei biauv liouc cuotv,
   yungz Sitv^tim Horngz.
  19I^yipv oix zuqc benx baaic huaang nyei dorngx,
   E^ndom oix zuqc benx baaic waaic nyei deic-bung-huaang,
  laaix ninh mbuo zoux doqc bun Yu^ndaa Mienh
   aengx yiem wuov deic-bung daix maiv zoux dorngc nyei mienh,
   bun nziaamv liouc cuotv.
  20Mv baac Yu^ndaa zungv yietc liuz maaih mienh yiem,
   Ye^lu^saa^lem yaac maaih mienh yiem taux maanc gouv maanc doic.
  21Ninh mbuo zuqc daix, nziaamv liouc cuotv nyei zuiz
   yie oix jaauv win,
   yaac maiv guangc bun zoux dorngc nyei mienh,
   weic zuqc Ziouv yiem jienv Si^on.”