14

Yopv Gorngv Mienh Yiem Seix Zaangc Maengc Nangv Nyei

  1“Mienh yiem m'sieqv dorn cuotv seix nyei hnoi-nyieqc zoqc nyei,
   kungx maaih kuonx naanh buangv nzengc.
  2Ninh cuotv daaih hnangv biangh nor, yaac ziec mi'aqv.
   Ninh hnangv dongh linh nor jiex, maiv yiem aqv.
  3Hnangv yie naaiv nyungc mienh meih bungx m'zing mangc jienv ninh
   aengx dorh ninh daaih yiem meih nyei nza'hmien zuqc siemv fai?
  4Haaix dauh haih dorh cing-nzengc nyei ga'naaiv yiem maiv cing-nzengc nyei ga'naaiv cuotv?
   Maiv maaih yietc dauh.
  5Ninh ziangh nyei hnoi-nyieqc jaa-ndaangc dingc ziangx aqv,
   ninh nyei hlaax-soux se yiem meih dingc.
   Meih dingc ziangx ninh ziangh nyei soux mouc, ninh yaac maiv haih jiex ndaangc.
  6Tov huin ganh bung, maiv dungx mangc ninh weic bun ninh duqv henh,
   bun ninh a'hneiv hnangv maaic gong mienh jiex yietc norm hnoi.

Yopv Gorngv Maaih Lamh Hnamv Caux Maiv Lamh Hnamv Nyei Jauv

  7“Se gorngv ndiangx zuqc goix, corc maaih lamh hnamv haih cuotv cunx.
   Cunx yaac ndaauv jienv mingh, maiv dingh aqv.
  8Maiv gunv ninh nyei nzungh yiem ndau-ndiev gox,
   ninh nyei gorn yiem ndau daic,
  9yietv duqv wuom nyei qiex ninh ziouc cuotv cunx,
   yaac cuotv nquaah hnangv ndiangx-lunx nor.
  10Mv baac mienh daic, bueix jienv zaqc nyei.
   Ninh dangx qiex ninh ziouc yiem haaix?
  11Hnangv koiv nyei wuom nqaai,
   ndaaih nyei wuom haapv yaac nqaai,
  12mienh daic mingh maiv aengx nangh daaih,
   taux lungh jiex nzengc ninh maiv nyie,
   nqamv ninh, ninh yaac maiv haih nyie.
  13“Feix duqv meih zorqv yie bingx jienv yiemh gen.
   Feix duqv meih torngv jienv yie, zuov meih nyei ga'qiex fiu.
   Feix duqv meih dingc ziangx ziangh hoc weic jangx yie.
  14Se gorngv mienh daic mingh, ninh aengx haih nangh daaih fai?
   Yie zuov jienv naaiv deix yietc zungv nyei hnoi-nyieqc jiex,
   taux yie duqv bungx nqoi nyei ziangh hoc.
  15Meih oix heuc, yie ziouc dau meih.
   Meih oix a'hneiv duqv buatc meih nyei buoz zoux daaih nyei ga'naaiv.
  16Taux wuov zanc meih oix saauv yie nyei zaux-mbiec,
   mv baac meih maiv zuov jienv zorqv yie zoux dorngc nyei zuiz.
  17Yie zoux dorngc nyei sic meih dapv jienv mbuoqc aengx mborqv jienv yienx.
   Meih yaac buang jienv yie nyei zuiz.
  18“Mv baac mbong mbaang huv mi'aqv.
   La'bieiv-zorng yaac suiv nqoi leih ninh nyei dorngx.
  19Wuom congx la'bieiv, la'bieiv ziouc jie nzengc,
   domh mbiungc yaac guaatv ndau-beih nyei nie mingh.
   Meih fih hnangv nyei mietc baamh mienh maaih lamh hnamv nyei dorngx.
  20Meih yietc liuz hingh jiex mienh, ninh ziouc guei seix mi'aqv.
   Meih tiuv ninh nyei hmien yaac bun ninh mingh mi'aqv.
  21Ninh nyei dorn mbuo duqv mienh taaih, ninh yaac maiv hiuv.
   Ninh mbuo ndortv njiec aiv, ninh yaac maiv buatc.
  22Ninh kungx haiz ninh ganh nyei sin zaangc mun,
   yaac weic ninh ganh nzauh nyiemv.”