27

Y-Yôp Tâm Mpơl Nau Di Ma Phung Ƀai

1Y-Yôp ngơi đŏng jêh ri lah: 2"Gâp sân săk jăn ma Brah Ndu, hŏ dun jêh nau di ma gâp.
  Nơm Geh Lĕ Nau Brah ƀư ăn huêng gâp rngot rvê hâu ngăn, jêh ri
 Kanŏng gâp ton sân săk jăn ma Păng:
3Lah nsôr n'hâm hôm e tâm gâp, jêh ri
 n'hâm Brah Ndu gŭ tâm trôm muh gâp,
4nanê̆ trôm mbung gâp mâu mra ngơi
 nau djơh ôh, jêh ri mpiăt gâp
 mâu mra ngơi nau ndơm lĕ.
5N'hêl nanê̆ gâp mâu dơi lah ma may jêng sŏng di ôh!
 Kŏ tât gâp khĭt, gâp mâu dơi lah ôh gâp jêng sŏng srăng ngăn.
6Gâp djôt nâp nau sŏng srăng gâp,
 jêh ri gâp mâu mra chalơi păng ôh;
 Du bông nau rêh gâp, nuih n'hâm
 gâp mâu mra nduyh gâp nơm ôh.
7"Gay ma nơm rlăng gâp jêng nâm bu bunuyh djơh mhĭk,
  jêh ri ăn ma nơm dâk ŭch ƀư ma gâp
 jêng nâm bu nơm mâu geh nau sŏng ôh.
8Nđâp tơlah nơm mhĭk geh drăp ndơ,
 Brah Ndu sŏk rhuăt lơi huêng păng.
 Pôri, nau kâp gân păng mâm mra jêng?
9Tơlah nau rêh ni tât ma păng,
 Brah Ndu mra iăt lĕ nau păng vơl?
10Păng mra joi lĕ ma Nơm Geh Lĕ Nau Brah?
  Păng mra kuăl mbơh sơm ƀa ƀơ lĕ ma Brah Ndu?
11Gâp mra nti ma may nau brah
 Brah Ndu; moh nau Nơm Geh Lĕ Nau Brah ŭch ƀư, gâp mâu mra mo ma may ôh.
12"Aơ, le rngôch khân may nơm hŏ saơ jêh nau nây,
 pôri mâm khân may hôm e rluk ngăn?
13Aơ jêng nau Brah Ndu prăp ma nơm mhĭk, jêh ri drăp ndơn
  ma phung tŭn jot sŏk dơn tă bơh Nơm Geh lĕ Nau Brah;
14tơlah kon păng hao bĭk rơ̆, nây
 jêng ndơ prăp ăn ma mpiăt đao nkhĭt;
 bi ma phung noi deh păng geh nau sa sât ji ngot mro.
15Phung hôm e rêh geh nau ji tưp mra khĭt roh.
 jêh ri phung bu ur ndrô khân păng mâu hôm nhĭm nhiăng ôh.
16Nđâp tơlah prăp mkrem prăk rêl
 nâm bu ndruyh neh, jêh ri ndrăp rơm kho ao nâm bu dak bŏk;
17n'hêl nanê̆ păng dơi prăp rơm,
 ƀiălah nkhơng ma phung sŏng mra
 nsoh n'gut ndơ nây,
 jêh ri prăk rêl phung sŏng srăng mra tâm pă ndrel.
18Ngih păng lĕ ndâk jêh jêng nâm bu ntêng vĭl pêng
 nâm bu ndưp bunuyh gŭ chăm mir vay ndâk.
19Păng gŭ bêch ma nau ndrŏng, ƀiălah mâu mra ƀư tâm ban pônây ôh,
 păng lin măt păng, nau ndrŏng păng lĕ roh jêh.
20Nau krit klach tât ndal ma păng nâm bu dak lip.
 Phŭt chuănh păng dôl bri măng đô̆ rdu păng.
21Sial tă palơ đô̆ rdu păng jêh ri
 n'ho roh hêng; sial khôm păng tă bơh ntŭk păng gŭ.
22Brah Ndu ntŭp nau rêh ni ta kalơ păng, mâu geh nau yô̆ klâng ôh
 păng ŭch ngăn gay nchuăt du klaih bơh ti Brah Ndu.
23Bu mra tap ti rhơn yor kan păng,
 jêh ri huăch gay mprơh du păng bơh ntŭk păng gŭ.