27
1Mas Yauj rov has lug zaaj lug zuag tas,
2“Vaajtswv yeej muaj txujsa nyob pum,
nwg yog tug kws qhau kuv cai,
tug kws muaj fwjchim luj kawg nkaus⚓
yog tug kws ua rua kuv ab sab.
3Thaus kuv tseed ua tau paa,
hab Vaajtswv tseed pub paa
rua huv kuv lub qhov ntswg,
4mas kuv daim tawv ncauj
yuav tsw has tej lug daag,
hab kuv tug nplaig yuav tsw has tej lug ntxag.
5Kuv yuav tsw leeg tas mej has tseeb hlo le,
hab kuv yuav tsw tso kuv lub sab ncaaj tseg
moog txug thaus kuv tuag.
6Kuv yuav tuav rawv kuv txujkev
ncaaj nceeg ca, tsw tso tseg le,
kuv lub sab tsw thuaj kuv
moog taag kuv swm neej.
7“Thov ca kuv cov yeeb ncuab
raug ib yaam le cov tuabneeg limham
hab thov ca tug kws sawv twv kuv
raug ib yaam le cov tuabneeg tsw ncaaj.
8Tug kws tsw fwm Vaajtswv
muaj chaw vaam daabtsw
rua thaus Vaajtswv muab nwg txav pov tseg,
hab thaus Vaajtswv muab nwg txujsa rhu lawm?
9Vaajtswv yuav noog nwg lub suab quaj hu
rua thaus nwg raug kev ceblaaj txom nyem lov?
10Nwg yuav zoo sab rua
tug kws muaj fwjchim luj kawg nkaus lov?
Nwg yuav quaj thov Vaajtswv
txhua lub swjhawm lov?
11Kuv yuav qha mej paub txug Vaajtswv txhais teg,
kuv yuav tsw npog tej kws
tug kws muaj fwjchim luj kawg nkaus yuav ua.
12Saib maj, mej txhua tug tub pum lawm,
ua caag mej yuav tsw paub qaabhau hlo le?
13“Nuav yog tug tuabneeg limham le feem
ntawm Vaajtswv,
hab yog tug kws quab yuam
luas le qub txeeg qub teg kws txais
ntawm tug muaj fwjchim luj kawg nkaus.
14Yog nwg le mivnyuas fuam vaam coob
los yuav raug nav ntaaj xwb,
hab nwg tej tub ki yuav nrhav tsw txaus noj.
15Cov kws tshuav dim
los mob kis yuav muab puab log,
hab puab tej puj ntsuag yuav tsw quaj ntsuag.
16Txawm yog nwg yuav sau tau nyaj ntau
yaam le tej moov aav,
hab tib tej nam pawg tsoog tsho ca
yaam le tej nam pawg aav,
17nwg yuav tib ca
los cov tuabneeg ua ncaaj yuav naav,
hab cov kws tsw txhum yuav muab tej nyaj faib.
18Lub tsev kws nwg ua zoo le
npauj npaim lub lwg kaab,⚓
hab zoo le lub tsev pheeb suav
kws tug zuv khuav ua.
19Thaus nwg moog pw nwg muaj nyaj txag,
tassws nwg yuav tsw rov moog
pw le hov dua le lawm.
Nwg qheb qhov muag
mas nwg tej nyaj txag tsw muaj taag lawm.
20Txujkev txhawj kev ntshai lug raug nwg
zoo le dej nyaab.
Thaus mo ntuj cua daaj cua dub
qhwv hlo nwg moog lawm.
21Cov cua saab nub tuaj muab nwg nqaa,
tes nwg txhad pluj lawm,
cua kuav hlo nwg tawm
ntawm nwg lub chaw moog.
22Cov cua muab nwg laim pov tseg tsw khuvleej,
nwg dha tswv hlo ntawm cua tug fwjchim sai kawg.
23Cua npuaj teg thuaj nwg,
hab luag ntab nwg tawm huv nwg lub chaw moog.”