2

Tin-Hungh Caux Saadaan Caangh Laangh Yopv Nyei Jauv Da'nyeic Nzunc

1Aengx maaih norm hnoi fin-mienh daaih yiem Ziouv nyei nza'hmien, Saadaan yaac caux jienv ninh mbuo daaih yiem Ziouv nyei nza'hmien. 2Ziouv naaic Saadaan, “Meih yiem haaix daaih?”
 Saadaan dau Ziouv, “Yie youh lungh ndiev mingh mingh daaih daaih faaux-faaux njiec-njiec.”
3Ziouv naaic Saadaan, “Meih samx mangc yie nyei bou, Yopv, nyei fai? Yiem lungh ndiev maiv maaih yietc laanh mienh hnangv ninh zoux hnyouv zingx, maiv lamh nqemh dorngx. Ninh taaih Tin-Hungh yaac simv nqoi, maiv zoux haaix nyungc orqv sic. Meih gorngv gau taux yie nqoi nzuih bun meih zoux bun ninh, meih zungv oix mietc ninh yaac maiv maaih gorn-baengx, mv baac ninh corc ziepc zuoqv nyei.”
4Saadaan dau, “Ndopv div ndopv. Mienh maaih nyei yietc zungv ninh oix longc weic njoux ninh ganh nyei maengc. 5Mv baac ih zanc sung meih nyei buoz hoic ninh nyei sin, ninh zungv oix yiem meih nyei nza'hmien zioux meih.”
6Ziouv gorngv mbuox Saadaan, “Wuov nyungc, ninh yiem meih nyei buoz-ndiev, mv baac oix zuqc liouh ninh nyei maengc.”

Yopv Zuqc Seix Da'nyeic Nzunc

7Saadaan ziouc yiem Ziouv nyei nza'hmien cuotv mingh hoic Yopv bun Yopv ziangh doqc haic nyei zueih yiem zaux-ndoqv-nyeiz faaux taux m'nqorngv-baengh. 8Ninh ziouc zueiz jienv saaiv-ndui zorqv hlengx nie-mor huv guaaih ganh nyei sin.
9Ninh nyei auv gorngv, “Meih corc ziepc zuoqv nyei zoux? Gunv zioux Tin-Hungh yaac daic aqv maah!”
10Mv baac Yopv dau ninh, “Meih gorngv waac hnangv dauh hngongx nyei m'sieqv dorn gorngv nor. Mbuo yiem Tin-Hungh nyei buoz zipv longx nyei ga'naaiv. Mbuo maiv horpc zuqc zipv maiv benx nyei fai?”
 Yopv zuqc naaiv deix yietc zungv sic, yiem Yopv gorngv nyei waac ninh maiv baamz zuiz.

Yopv Nyei Buo Dauh Loz-Gaeng Doic Daaih Taux

11Yopv nyei buo dauh loz-gaeng doic, se Temaan Zingh nyei mienh, E^li^fatv, caux Quwaa Mienh, Mbin^ndatc, caux Naa^aa^me Mienh, Sofaa, haiz gorngv Yopv zuqc naaiv deix yietc zungv zeqc naanc, gorqv-mienh ziouc yiem gorqv-mienh nyei dorngx daaih gapv jienv doic. Ninh mbuo dunx ziangx doic yietc jauv daaih, weic tengx Yopv jaiv nzauh, orn ninh nyei hnyouv. 12Ninh mbuo yiem go nyei buatc ninh, mv baac zieqv maiv duqv ninh, ziouc bungx-sing bungx-qiex nyei nyiemv, yaac ⟨betv ninh mbuo nyei lui-ndaauv,⟩ aengx nyau nie-mbung faatv faaux lungh ndortv njiec ninh mbuo nyei m'nqorngv. 13Ninh mbuo caux Yopv zueiz jienv ndau siec hnoi siec muonz yaac maiv maaih haaix dauh caux ninh gorngv yietc joux waac, weic zuqc ninh mbuo buatc Yopv zuqc nyei zeqc naanc za'gengh hniev haic.