33
Y-Êtihu Mpơl Lĕ Nau Ueh Mâu Lah Ma Nuih N'hâm Rŏng Bơh Brah Ndu
1Ƀiălah pônây, aƀaơ ri hơi Y-Yôp, ăn may iăt hom lĕ nau gâp nkoch. Jêh ri rkêng tôr iăt lĕ nau gâp lah.
2Aơ, gâp hŏ hă trôm mbung ngơi,
mpiăt gâp ngơi tâm trôm khay dơ̆.
3Lĕ nau gâp ngơi mra tĭng kơt nau di tâm nuih n'hâm gâp jêng nau sŏng srăng.
Nau gâp gĭt trôm mbung gâp ngơi ma nau n'hêl nanê̆.
4Huêng Brah Brah Ndu rhăk njêng gâp,
n'hâm gâp nsôr tă bơh Nơm Geh Lĕ Nau Brah ăn ma gâp nau rêh.
5Tơlah dơi plơ̆ lah, plơ̆ sĭt lah hom ma gâp,
dâk hom, ngơi hom ăn tâm di
mbor lĕ nau may ngơi tra năp gâp!
6Uănh hom, tâm rđĭl đah Brah Ndu
gâp nâm bu may lĕ mâu geh êng ôh,
Gâp tâm ban lĕ bu njêng luh du tă bơh neh.
7Aơ, lơi ta may rnam klach ma gâp ôh;
jêh nau dơi gâp ƀư khưm mâu mra n'grŭn mpet may ôh.
8"N'hêl nanê̆ gâp hŏ tăng jêh nau may ngơi,
tât ma tôr gâp lah pô aơ:
9Gâp lĕ kloh ueh mâu geh nau tih ôh."
Gâp jêng rsang, jêh ri tâm nuih n'hâm
mâu geh nau tih mhĭk ôh.
10Nđâp tơlah pônây, Brah Ndu joi nau
đah gâp ŭch kơp gâp jêng bunuyh rlăng đah Păng;
11Păng nkông lơi jâng gâp
jêh ri uănh rmiăng lĕ trong gâp hăn.
12Aơ, nau gâp ŭch plơng đah may tâm lĕ
nau nây may lah jêng mâu di ôh;
yorlah Brah Ndu jêng toyh lơn kon bunuyh.
13Mâm ƀư may tâm rlăch đah Păng?
Jêh ri lah, 'Păng mâu ŭch rblang ôh lĕ nau
Păng ƀư ma gâp?
14Yorlah Brah Ndu ngơi tâm du tơ̆ mâu lah
bar tơ̆, ƀiălah bunuyh mâu ŭch' nklân ôh nau nây kađôi.
15Păng ngơi tâm nau mbơi, tâm nau tâm saơ
dôl măng, dôl khân păng lêt bêch
ta kalơ sưng bêch khân păng;
16rnôk nây Păng pơk trôm tôr kon bunuyh,
jêh ri nhhu khân păng ma nau Păng đă njrăng.
17Gay ma păng dơi ăn bunuyh der bơh
nau khân păng ƀư, jêh ri ngroh lơi nau khân păng sưr rlau.
18Gay rklaih huêng khân păng klaih bơh
Ntu Jru (ntu môch), jêh ri nau rêh
khân păng bơh nau rai yot yor ma đao khĭt.
19"Tâm ban lĕ Brah Ndu nkra bunuyh ma
nau ji kuet, jêh ri ma nau ji nting mro mrăng.
20Pôri trôm mbung păng tâm rmot ma
ndơ sông sa, jêh ri mâu kơnh sa ôh ndơ sa kah.
21Nglay săk păng rgay kŏ tât nting dop
ntâu mâu hôm saơ đŏng ôh, jêh ri
nting păng, saơm ri mâu mpơl ôh
ƀiălah aƀaơ knŏng mpơl nting nđăng.
22Huêng păng lĕ dăch tât ma Ntu Jru,
jêh ri săk jăn păng văch êp ma phung khĭt.
23Tơlah tâm du rbăn tông păr ueh, geh
du huê tông păr ueh jêng nơm nti rblang
ma bunuyh, gay ntĭm nti păng gĭt
nau sŏng srăng ăn păng.
24Brah Ndu yô̆ lĕ ma păng jêh ri lah:
"Tâm rklaih hom păng gay dơi klaih
lơi ăn tŭp tâm Ntu Jru ôh;
Gâp hŏ joi jêh trong tâm chuai."
25Păng mra dơi sĭt nse tay ntâu săk
nâm bu hôm kon se jê̆ saơm.
26Păng mbơh sơm ma Brah Ndu, pôri
Brah Ndu mra uănh treng păng,
ăn păng răm rhơn saơ muh măt Păng.
jêh ri Brah Ndu mplơ̆ tay nau sŏng srăng ma păng.
27Pônây, bunuyh nây mra mprơ ta năp bunuyh, pôaơ:
"Gâp hŏ ƀư tih jêh, ƀư djơh lơi
nau sŏng srăng, ƀiălah mâu geh nau khlay ăn ma gâp ôh.
28Brah Ndu tâm rklaih jêh huêng gâp dơi
klaih bơh Ntu Jru, jêh ri nau rêh gâp mra saơ nau ang."
29Aơ, Brah Ndu ƀư lĕ nau nây ăn
ma kon bunuyh; du tơ̆ mâu lah bar tơ̆,
30Gay mphâk huêng păng lơi ăn tô̆p tâm
Ntu Jru ôh, gay ma păng dơi saơ
nau ang sol ang ma nau rêh.
31Hơi Y-Yôp, may iăt hom nau gâp; gŭ klêm jêh ri iăt nau gâp ngơi.
32Tơlah may geh nau ŭch lah, plơ̆ sĭt
lah hom ma gâp; ngơi hom,
yorlah gâp ŭch mpơl may jêng sŏng.
33Tơlah mâu di ôh pônây, iăt hom nau
gâp, gŭ klêm hom, pôri gâp mra nti
ma may nau blau mĭn.