1-2Elihus hais ntxiv tias: “Yauj koj hais tias, koj tsis tau ua txhaum tabmeeg Vajtswv, koj hais li ntawd tsis yog lawm, 3lossis koj nug Vajtswv hais tias, ‘Kuv tej kev txhaum ua li cas rau koj? Yog kuv tsis ua txhaum, kuv ho tau dabtsi?’ 4Kuv yuav teb koj thiab koj cov phoojywg tej lus huv tibsi.
5“Cia li saib saum nruab ntug! Saib tej huab nyob siab npaum li cas! 6Txawm yog koj ua txhaum los yeej tsis mob Vajtswv li. Yog koj ua txhaum ntau zaus puas ua li cas rau Vajtswv? 7Yog koj ua ncaj ncees puas pab tau Vajtswv dabtsi? Tsis muaj ib yam dabtsi uas Vajtswv xav tau ntawm koj li. 8Koj tej kev txhaum yuav raug lwm tus uas zoo li koj, thiab koj txojkev ua zoo yuav pab tau lwm tus.