3

Yopv Gorngv Da'yietv Nzunc Waac

(Yopv 3:1-26)

Yopv Nqemh Ninh Cuotv Seix

1Nqa'haav Yopv nqoi nzuih zioux ninh nyei cuotv seix hnoi. 2Yopv gorngv,
  3“Tov bun yie cuotv seix nyei hnoi
   caux ninh mbuo gorngv, ‘Maaih gu'nguaaz-dorn cuotv seix’ wuov muonz zuqc mietc.
  4Tov bun wuov hnoi hmuangx mingh.
   Tov bun gu'nguaaic nyei Tin-Hungh maiv lorz wuov norm hnoi,
   yaac maiv dungx bun njang ziux zuqc.
  5Tov bun wuov hnoi mapv maengh mapv hmuangx,
   bun mbuonx-hoz torngv jienv,
   tov bun wuov norm hnoi mapv maengh nyei ziouc hingh nzengc njang.
  6Tov bun wuov muonz mapv maengh mapv hmuangx nyei,
   zorqv nqoi, maiv dungx bun hnyangx maaih wuov norm hnoi,
   yaac maiv dungx bun wuov norm hnoi bieqc hlaax nyei soux mouc.
  7Tov bun wuov muonz maiv maaih saeng-yungz,
   bun wuov muonz nyei ziangh hoc yaac maiv haiz njien-youh heuc nyei qiex mbui.
  8Tov bun haih zioux hnoi nyei mienh zioux wuov hnoi,
   se maaih banh zeic dongz ⟨Le^wi^aa^taan⟩ jiez daaih wuov deix.
  9Tov bun wuov ndorm nyei Taaix-Baeqc Fing hmuangx mingh,
   bun wuov muonz hnamv jienv haih njang mv baac maiv njang,
   maiv duqv buatc lungh ndorm nziouv nyei njang,
  10weic zuqc wuov muonz bun yie cuotv seix
   bun yie zuqc ziex nyungc kouv naanc hoic.

Yopv Ngopv Yiem Seix Zaangc Ninh Kouv Jiex Jaax

  11“Yie cuotv seix wuov zanc, yie weic haaix diuc maiv daic?
   Yie cuotv maa nyei ga'sie, weic haaix diuc maiv dangx qiex?
  12Weic haaix diuc maaih cingh mborqc zipv yie?
   Fai maa bun ninh nyei nyorx yie hopv?
  13Maiv hnangv naaic yie duqv bueix njiec sekv zieqc.
   Yie daic ziouc duqv hitv kuonx,
  14caux lungh ndiev nyei hungh diex caux caangh laangh nyei mienh yiem,
   dongh weic ganh ceix jiez ih zanc mbaang waaic nyei dorngx,
  15fai caux zoux hlo nyei mienh yiem,
   dongh bun ninh mbuo nyei biauv maaih jiem nyaanh buangv.
  16Fai yie weic haaix diuc maiv hnangv mbaang waaic nyei gu'nguaaz biopv jienv,
   se hnangv maiv buatc jiex njang nyei gu'nguaaz.
  17Yiem naaic orqv mienh dingh njiec, maiv zoux orqv,
   kouv nyei mienh duqv hitv kuonx.
  18Yiem wuov zuqc wuonx nyei mienh duqv lomh nzoih henh,
   muangx maiv haiz aapv ninh mbuo zoux gong wuov deix nyei qiex mbui.
  19Hlo-hlo faix-faix nyei mienh yiem naaic,
   zoux nouh nyei mienh biaux ndutv ninh nyei ziouv.
  20“Weic haaix diuc ceix njang bun zuqc siouc kouv nyei mienh?
   Weic haaix diuc bun nzauh kouv nyei mienh maaih maengc ziangh?
  21Ninh mbuo zuov jienv daic, mv baac maiv duqv daic.
   Ninh mbuo lorz daic nyei jauv gauh camv lorz bingx jienv nyei zinh zoih.
  22Ninh mbuo zuov jienv daic bieqc zouv ziouc a'hneiv,
   za'gengh! njien-youh taux daauh.
  23Tin-Hungh bingx jienv mienh hoz nqaang nyei jauv,
   bung-bung weih jienv ninh mbuo.
  24Yie tauv qiex-ndoqc dorngx nyanc hnaangx,
   yie njunh nyei qiex dox cuotv hnangv wuom nor.
  25Weic zuqc yie gamh nziex nyei sic zungv zuqc yie mi'aqv.
   Dongh yie gamh nziex jiex nyei sic ndortv zuqc yie.
  26Yie maiv maaih baengh orn, yaac maiv duqv sekv.
   Yie maiv duqv hitv kuonx, mv baac kouv naanc daaih lorz yie.”