41

1Mâu geh nuyh dơi janh gay ŭch lôr păng ôh;
 pôri, mbu nơm dơi tâm rdâng đah păng?
2Mbu nơm ăn lor ma gâp, ri mơ gâp mplơ̆ sĭt tay?
 Le rngôch ndơ tâm dâng trôk jêng ndơ gâp.
3Gâp mra ŭch ngơi tơlah saơ jâng păng, ma n'hâm suan păng, jêh ri nau ueh săk jăn păng.
4Mbu nơm dơi doih ntâu păng?
 Mbu nơm dơi lăp tâm trôm mơr bar kơn păng?
5Mbu nơm dơi nkhak rmlông păng?
 Nau klach krit gŭ jŭm sêk păng.
6Păng geh nau rnam toyh ngăn yor geh âk khêl păng.
 Păng tâm njĭr nâm bu ndơ bu kŭp rdâl.
7Ndơ aơ tâm rđĭl dah ndơ êng.
 Kŏ tât sial mâu dơi lăp ôh.
8Păngtâm lĭr ndrăng khân păng jêh ri krêp nâp ngăn mâu dơi plôk êng êng ôh.
9Si đah muh păng nâm bu lơp,
  Bar đah măt păng nchrang ƀring nâm bu nchrat nar ơm ôi.
10Trôm mbung păng hâng ŭnh jêh ri
 bruh ŭnh hit tă tâm trôm.
11Tă tâm trôm muh păng luh thŭl nhhuk.
  Nâm bu khuh glah dak jêh ri nâm bu tă ntŭk ŭnh sa proh treng.
12Nsôr n'hâm păng nâm bu hâng ŭnh rnga,
 jêh ri mpiăt ŭnh luh du tă trôm mbung păng.
13Tâm trôko păng geh nau katang jêh ri
  bu klach ngăn saơ păng.
14Ntŭk mprôn nglay săk păng tâm krêp ndrel
 ntâu păng nâm bu tŏ nkrêp đah săk păng mâu blau hêk ôh.
15Play nuih păng dăng nâm bu lŭ,
 dăng lơn ma glo mpăl tâm dâng.
16Tơlah păng du dâk, phung janh
 katang geh nau klach dadê;
 Yorlah sŏk nau nkrit yor ri bu du klach.
17Tơlah bu sŏk đao, tak, jêh ri jôih
 gay ntâp păng kŏ mâu dơi lĕ.
18Păng uănh ma loih nâm bu tơm rpho,
 jêh ri kông nâm bu tơm si ôm.
19Chiông hăr mâu dơi ƀư gay ăn păng nchuăt du ôh.
 Lah bu klô̆p ma lŭ păng rlơ̆ jêng rahe.
20Nđâp mâng bu dong păng uănh nâm
 bu rahe, păng gơm mưch tăng nteh brâm tak.
21Tâm trôm ndŭl păng geh âk rsong yăng
 chah, păng nâm du nchraih bu chraih tâm dak bŏk.
22Păng ăn dak klŏng jru khuh nâm bu glah dak duh.
 Păng ƀư ăn dak mƀŭt jêng nâm bu gri bu ăn dak si mhĭng.
23Pakơi păng mpŭnh dak nglang tĭng ndô̆;
 jêh ri klăp lah bu gŭ mĭn pô aơ
 ntu jru jêng sŏk ndra buranh.
24Ta neh ntu, mâu geh ôh ndơ tâm ban ma păng, bu rhăk njêng pămg mâu geh nau klach ôh.
25Păng klân treng ma lĕ rngôch ndơ tâm dâng păng da dê,
 păng ƀư hađăch ăn le rngôch mpô mpa janh katang.