1Mas Yauj teb tas,
2“Au, kuv xaav muab kuv tej kev ntxhuv sab kiv,
hab muab kuv tej kev txom nyem huvsw
tso rua sau raab teev.
3Mas yuav nyaav dua tej xuab zeb huv havtxwv,
vem le nuav kuv tej lug txhad tawm
ua kub quas lug.
4Vem tug kws muaj fwjchim luj kawg nkaus⚓
raab xub chob kuv,
kuv tug plig haus tej kua xub tshuaj,
txujkev ntshai kws tuaj ntawm Vaajtswv
npaaj txhwj tuaj tawm tsaam kuv.
5Neeg luav qus yuav quaj
rua thaus nwg muaj zaub noj lov?
Txwv nyuj yuav nqov
rua sau nwg pawg zaub lov?
6Yuav noj zaub tsuag tsw rau ntsev tau lov?
Hab txwv thwj ywg cov kua mig⚓ qaab le caag?
7Tej yaam hov kuv lub sab tsw xaav kov hlo le,
txhua yaam zaub mov hov kuv dhuav taag.
8“Au, kuv xaav tau lawv le kuv thov,
hab xaav kuas Vaajtswv pub
lawv le kws kuv lub sab ntshaw.
9hab xaav tas Vaajtswv txaus sab muab kuv zuaj,
hab tsw xob nkaum teg
rua qhov kws muab kuv txav pov tseg.
10Qhov nuav yuav nplig tau kuv lub sab,
txawm yog kuv mob tsw tu le
los kuv yuav zoo sab kawg,
tsua qhov kuv tsw tau kwv tawv
tug kws Dawb Huv tej lug.
11Kuv muaj zug le caag es kuv yuav tsum tog?
Hab kuv qhov kawg yog daabtsw
es kuv yuav tsum ua sab ntev thev?
12Kuv tug zug zoo le tej pob zeb lov,
kuv tej nqaj yog nqaj tooj lab lov?
13Kuv tug kheej paab tsw tau kuv,
txhua txujkev paab tswv ntawm kuv lawm.
14“Leejtwg taav txujkev hlub ntawm tug kwvluag,f
kuj yog tso qhov kws fwm hab ntshai
tug kws muaj fwjchim luj kawg nkause tseg.
15Kuv cov kwvtij pheej ntxeev ntxag
yaam le lub haav dej,
yaam le lub haav dej kws qhuav zuj zug,
16kws tsaus quas nti vem yog dej nkoog
hab tej daus xwb daus npu npug txheej sau.
17Thaus tshaav ntuj kub kuj yaaj taag,
thaus tshaav ntuj kub heev
kuj pluj taag ntawm lub chaw lawm.
18Cov tub laag tub luam kws taug kev
kuj tig zos ntawm puab txujkev,
puab moog rua tej ntuj nraag teb do
hab puam tsuaj taag.
19Cov tuabneeg kws taug kev
ntawm Thema tuaj nrhav,
cov tub laag tub luam kws taug kev
ntawm lub moos Senpa muaj chaw vaam.
20Puab nplaam vem yog puab vaam quas ntsoov,
puab tuaj txug hov ntawd
mas puab nyuaj sab heev.
21Nwgnuav mej zoo ib yaam le ntawd rua kuv,
mej pum kuv tej kev txom nyem mas mej ntshai.
22Kuv puas tau has tas,
‘Thov pub mivntswv tshaav ntuj rua kuv,’
lossws ‘Thov mej le nyaj rua kuv
coj moog xab luas,’
23lossws ‘Thov cawm kuv dim
huv yeeb ncuab txhais teg,’
lossws ‘Thov txhwv kuv dim
huv tug kws quab yuam kuv txhais teg,’ lov?
24“Qha kuv maj, kuv txhad nyob tuabywv,
thov qha rua kuv to taub kuv ua txhum qhov twg.
25Lu lug has ncaaj muaj fwjchim heev,
tassws mej lu lug ntuag yog ntuag daabtsw?
26Mej xaav tas mej qhuab ntuag kuv tej lug
hab saib tug kws tsw muaj chaw vaam tej lug
zoo le cua xwb lov?
27Mej yeej yuav rhu ntawv
txhad tau tug mivnyuas ntsuag kws tsw muaj txwv,
hab yuav muab mej tug kwvluag
ntaus nqe muag los sas.
28“Nwgnuav thov mej tsaa muag saib kuv,
tsua qhov tsw yog kuv taab meeg daag mej.
29Thov mej xaav dua tshab tsw xob ua tsw ncaaj.
Thov ntxeev dua sab, kuv tseed ua raug cai.
30Kuv tug nplaig has
ib yaam daabtsw tsw ncaaj lov?
Kuv tug nplaig tsw txawj
swm paub kev txom nyem lov?