7

Yopv Gorngv Yiem Lungh Ndiev Kungx Zuqc Kouv

  1“Baamh mienh yiem lungh ndiev kungx zuqc zoux kouv,
   ninh nyei hnoi-nyieqc hnangv zuqc maaic gong nyei mienh,
  2hnangv nouh za'gengh oix lorz dorngx bingx laangh,
   hnangv maaic gong nyei mienh zuov ninh nyei gong-zinh.
  3Fih hnangv nyei, yie hlaax jiex hlaax ziangh jienv maiv lamh longc,
   yaac muonz jiex muonz zuqc diev kouv.
  4Yie bueix njiec nyei ziangh hoc, yie gorngv, ‘Yie taux haaix zanc cingx duqv jiez sin?’
   Mv baac lungh muonz zanc ndaauv haic.
   Yie kungx mbienv mingh mbienv daaih, noic maiv duqv lungh njang.
  5Yie nyei sin butv gaeng buangv nzengc, nie-mbung yaac dorngx lui zuqv.
   Yie nyei ndopv butv faang, aengx nzaeqv, butv nongc.
  6“Yie nyei hnoi-nyieqc gauh siepv nzenc suix ndatv ndie nyei biaav,
   taux setv mueiz yaac maiv lamh hnamv dorngx aqv.
  7O Tin-Hungh aac, tov jangx jienv oc,
   yie nyei maengc se hnangv tauv yietc nzunc qiex.
   Yie nyei m'zing maiv duqv aengx buatc longx nyei jauv.
  8Ih zanc mangc jienv yie wuov dauh nyei m'zing maiv duqv aengx buatc yie.
   Meih oix lorz yie, mv baac yie maiv yiem aqv.

Yopv Oix Tin-Hungh Bungx Nqoi Ninh

  9“Hnangv mbuonx nzaanx mitc nzengc,
   mienh njiec yiemh gen maiv haih aengx faaux daaih.
  10Ninh maiv aengx nzuonx ganh nyei biauv.
   Ninh yiem nyei dorngx nyei mienh yaac la'kuqv ninh mi'aqv.
  11“Weic naaiv yie ziouc maiv nqapc yie nyei nzuih,
   yie nyei hnyouv mun jienv oix gorngv aqv.
   Yie hnyouv kouv haic ziouc oix zuqc gorngv.
  12Yie zoux koiv fai koiv nyei domh mbiauz
   meih cingx oix zuqc bun mienh zuov jienv yie?
  13Yie gorngv, ‘Yie nyei coux haih tengx yie kuh yiem.
   Yie bueix nyei dorngx haih jaiv deix yie nyei kouv naanc.’
  14Mv baac meih bun yie mbeix buatc haeqv yie,
   longc hinc yaangh nyei sic bun yie gamh nziex haic.
  15Weic naaiv yie oix ginv goh jaang daic
   gauh longx yiem jienv yie naaiv norm sin.
  16Yie youx yie nyei maengc, maiv oix yietc liuz ziangh.
   Bungx yie, sueih yie ganh yiem,
   weic zuqc yie nyei hnoi-nyieqc kungx hnangv tauv yietc nzunc qiex.

Yopv Ngopv Tin-Hungh Zanc-Zanc Mangc Jienv

  17“Baamh mienh benx haaix nyungc meih cingx funx longc jienv
   yaac hietv hnyouv ninh?
  18Meih ndorm-ndorm mingh zaah mangc ninh,
   mouz buon ziangh hoc yaac kauv ninh.
  19Aengx ndongc haaix lauh meih cingx huin ganh bung maiv mangc yie,
   fai bungx yie ganh yiem taux haih duqv naqv aax yie nyei wuom-nzuih?
  20Mangc mienh nyei Tin-Hungh aah?
   Se gorngv yie baamz zuiz yie hnangv haaix nor hoic zuqc meih?
  Meih weic haaix diuc zorqv yie dorngx meih nyei forng-cang nyei mbaeqc?
   Yie weic haaix diuc benx meih oix zuqc ndaam hniev nyei ga'naaiv?
  21Meih weic haaix diuc maiv guangc yie dorngc nyei dorngx,
   yaac zorqv nqoi yie nyei zuiz?
  Weic zuqc maiv lauh yie oix bueix nie-mbung gu'nyuoz.
   Meih oix lorz yie mv baac yie maiv yiem aqv.”