5

1Yorlah ăp nơm kôranh ƀư brah toyh săch jêh bơh phung bunuyh geh kan ma bunuyh ta năp Brah Ndu, gay nhhơ ndơ bu nhhơr jêh ri ndơ bu ƀư brah yor nau tih. 2Păng blau yô̆ ma phung rluk jêh ri ma phung nkhah du yorlah Păng Nơm jêng rdja tâm ban lĕ. 3Yor nau rdja nây Păng mra nhhơr ndơ ƀư brah ma nau tih Păng nơm nâm bu yor nau tih ƀon lan lĕ.

Krist Jêng Kôranh Ƀư Brah Toyh Tâm Ban Ma Mêlkisadek

4Jêh ri bu mâu săch ma păng nơm kan khlay nây ôh, tơlah Brah Ndu mâu kuăl Păng, nâm bu Y-Arôn jêng jêh. 5Pô nây lĕ Brah Krist mâu n'hao Păng nơm ôh, gay jêng kôranh ƀư brah toyh, ƀiălah Păng geh nau săch bơh Nơm lah ma Păng pô aơ:
 "May jêng Kon bu klâu gâp, gâp deh jêh ma may nar aơ."
6Nâm bu Păng hŏ lah tâm ntŭk êng,
 "May jêng du huê Kôranh ƀư brah n'ho ro tĭng nâm Mêlkisadek."
7Dôl Păng gŭ rêh tâm nglay săk, Brah Yêsu mbơh sơm jêh ri vơh vơl ma nau nter ktang jêh ri ma dak măt, ma nơm dơi tâm nklaih Păng bơh nau khĭt, jêh ri Păng geh nau bu dơn, yor nau Păng blau yơk klach ma Brah Ndu. 8Nđâp tơlah Păng jêng Kon Brah Ndu, păng nti jêh nau tông bâr, ma nau rêh ni Păng dơn jêh; 9jêh ri jêh Păng jêng rah vah, Păng jêng bôk nau tâm rklaih n'ho ro, ma mbu nơm tông bâr ma Păng. 10Brah Ndu mbơh jêh ma Păng jêng Kôranh ƀư brah toyh tĭng nâm Mêlkisadek.
11Hên geh âk nau ŭch lah tâm nau nây, jêh ri geh nau jêr rblang, yorlah khân may jêng phung băt gĭt rbăng. 12Yorlah bơh jŏ jêh khân may dơi jêng phung kôranh nơm nti, ƀiălah ăt khân may ŭch bu nti ma khân may nau nơih tâm Nau Brah Ndu Ngơi. Khân may ŭch ma dak toh, mâu di ma ndơ sông sa dăng ôh. 13Yorlah mbu nơm ăt hôm rŏng ma dak toh mâu blau dŏng nau ngơi ma nau sŏng ôh. Păng ăt hôm jêng kon se. 14Ƀiălah ndơ sông sa dăng prăp ma phung buranh jêh ri ma phung blau dŏng nau mĭn khân păng dơi gĭt rbăng nau ueh đah nau mhĭk.