10

Lor Bâr Nŭng Rơh Pơh – Du Huê Tông Păr Ueh Djôt Du Pŏk Ndrom Samƀŭt – Bar Hê Nơm Mbơh

1Gâp saơ du huê tông păr ueh êng, brah, jŭr tă bơh trôk, geh ndâr tŭk nkŭm păng. Ta bôk păng geh bêh tŭng tĭng muh măt păng nâm bu nar, jâng păng nâm bu meh ŭnh. 2Păng djôt tâm ti păng du pŏk ndrom samƀŭt jê̆ pơk jêh. Păng jot jâng ma tâm dak mƀŭt, jâng chiau ta neh. 3Nter bâr huy nâm bu nter yau mŭr. Tơlah păng nter bu tăng nteh pơh tơ̆ nglaih dah. 4Tơlah phung pơh tơ̆ nglaih dah jêh, gâp ntơm nchih, ƀiălah gâp tăng bâr tă bơh trôk lah nâm pô aơ: "Lĭr tâp pŏng hom pơh nglaih nĕ lah jêh. Lơi nchih nau nĕ ôh."
5Jêh ri tông păr ueh gâp saơ nĕ dâk ta dak mƀŭt jêh ri ta neh yơr ti ma păng mpeh ma klơ trôk, 6jêh ri păng sân săk ma Nơm gŭ rêh tâm lĕ rnôk, Nơm rhăk njêng neh ntu jêh ri lĕ rngôch ndơ tâm păng, dak mƀŭt nđâp ma lĕ ndơ tâm păng mâu mra hôm kâp ôh. 7Ƀiălah ta nar geh bâr tông păr ueh rơh pơh mra uh nŭng, nau khlay ndâp tă bơh Brah Ndu mra nanê̆, nâm bu păng mbơh jêh ma phung tông păr ueh păng, phung kôranh nơm mbơh lor.
8Bâr gâp tăng jêh tă bơh trôk ngơi ma gâp jêh ri lah nâm pô aơ: "Hăn hom, sŏk ndrom samƀŭt jê̆ pơk jêh tâm ti tông păr ueh dâk ta dak mƀŭt jêh ri ta neh." 9Gâp hăn leo ta tông păr ueh nây jêh ri lah ma păng, ăn mdrom samƀŭt jê̆ nây ma gâp. Păng lah ma gâp: "Sŏk hom jêh ri rvăn păng, păng mra jêng tăng tâm ndŭl may, ƀiălah tâm mbung may păng jêng njŭng nâm bu dak sŭt." 10Gâp sŏk ndrom samƀŭt jê̆ nĕ tă bơh ti tông păr ueh, jêh ri gâp rvăn. Tâm mbung gâp jêng njŭng nâm bu dak sŭt, ƀiălah jêh gâp rvăn păng ră ndŭl gâp ma nau tăng. 11Jêh ri bu lah ma gâp: "Ăn may mbơh lor ma âk phung ƀon lan, phung mpôl băl, nau ngơi jêh ri ma phung hđăch."