27

1Dâk ôi, lĕ rngôch phung n'gâng kôranh ƀư brah, jêh ri phung bubŭnh buranh tâm nchră ma nau ƀư ma Brah Yêsu ŭch nkhĭt lơi ôbăl. 2Jêh khân păng chăp ôbăl, khân păng njŭn leo jao ôbăl ma kôranh toyh Pilat.

Nau Yuđas Nkhĭt Păng Nơm

3Rnôk nây Y-Yuđas, nơm rlăng, saơ bu rmal jêh Brah Yêsu geh nau nduyh tâm nuih n'hâm păng. Păng mplơ̆ lơi pe jât rêl prăk ma phung n'gâng kôranh ƀư brah jêh ri ma phung bubŭnh buranh jêh ri lah: 4"Gâp tih jêh jao ăn ma khân may mham mâu tih ôh." Ƀiălah phung nây plơ̆ lah: "Moh hên chrê? Kađôi may." 5Păng klŭp lơi prăk tâm ntŭk kloh, luh du; jêh ri yông trô ko păng nơm. 6Ƀiălah phung kôranh ƀư brah sŏk prăk nây jêh ri lah: "Mâu vay ôh dơm prăk aơ tâm ntŭk prăp prăk Brah Ndu, yorlah prăk rnoh mham." 7Jêh khân păng tâm nchră, dŏng prăk nây rvăt mir lŏ nơm mon glah, ŭch prăp tâp phung bunuyh bri êng. 8Yor nây tât nar aơ bu rnha lŏ nây jêng Lŏ Mham. 9Pôri ƀư nanê̆ jêh nau kôranh nơm mbơh lor Y-Yêrêmi lah: "Khân păng sŏk jêh pe jât rêl prăk, rnoh du huê bunuyh phung Israel veh jêh, 10jêh ri khân păng sŏk prăk nây rvăt mir lŏ nơm mon glah, nâm bu Kôranh Brah ntăm jêh."

Brah Yêsu Ta Năp Pilat

11Brah Yêsu dâk ta năp kôranh toyh Pilat; jêh ri kôranh toyh ôp Păng pô aơ: "Di lĕ may jêng hđăch Yuđa?" Brah Yêsu lah: "May hŏ lah jêh." 12Dôl phung kôranh ƀư brah jêh ri phung bubŭnh buranh phong Păng, Păng mâu hôm ngơi ôh. 13Pilat lah ma Păng: "May mâu tăng hĕ nau khân păng phong may âk ngăn?" 14Ƀiălah Păng mâu ngơi du tong; tât kôranh toyh nây hih rhâl ngăn.
15Ăp năm nhêt sa Nau Găn, kôranh toyh vay mƀơk, du huê bu nă tĭng nâm bunuyh ƀon lan dăn. 16Rnôk nây geh du huê bu nă, geh nau tih jru ngăn, amoh păng, Y-Barabas. 17Jêh tâm rƀŭn, Pilat lah ma khân păng: "Mbu nơm khân may ŭch gâp mra mƀơk, Y-Barabas mâu lah Brah Yêsu, bu kuăl Brah Krist?" 18Yorlah păng gĭt nanê̆ bunuyh jao Brah Yêsu ma păng ma nau nach. 19Dôl păng gŭ phat dôih, ur păng njuăl bu lah ma păng pô aơ: "Lơi ƀư ma bunuyh sŏng aơ ôh, yorlah gâp geh nau rŭng ăp nar, yor păng tâm nau gâp mbơi." 20Ƀiălah phung n'gâng kôranh ƀư brah jêh ri phung bubŭnh buranh nchâp phung bunuyh ƀon lan ăn dăn mƀơk Y-Barabas, jêh ri nkhĭt lơi Brah Yêsu. 21Kôranh toyh lah ma khân păng: "Mbu nơm tâm phung bar hê aơ khân may ŭch gâp mƀơk?" Khân păng plơ̆ lah: "Y-Barabas." 22Pilat lah ma khân păng: "Bi ma Brah Yêsu, bu kuăl Brah Krist, mâm gâp mra ƀư?" 23Lĕ rngôch bunuyh lah: "Pâng lơi Păng ta si tâm rkăng, "kôranh toyh ôp: "Ƀiălah moh nau mhĭk Păng mâp ƀư jêh?" Khân păng nter ktang lơn: "Pâng lơi păng ta si tâm rkăng." 24Pilat gĭt păng mâu dơi ôh, ƀiălah geh nau nteh uh ah lơ hâu lơn, pôri păng sŏk dak, jêh ri rao ti păng ta năp phung âk nây jêh ri lah: "Gâp mâu tih ôh đah mham bunuyh sŏng aơ; kđôi khân may yơ̆!" 25Lĕ rngôch bunuyh plơ̆ lah: "Ăn mham păng tŭp ta hên jêh ri ta phung kon sau hên!" 26Jêh ri Pilat mƀơk ăn ma khân păng Y-Barabas; bi Brah Yêsu, jêh bu dong, bu lơh ôbăl ma mâng, păng jao ma bu pâng ôbăl ta si tâm rkăng.
27Phung tahan kôranh toyh njŭn leo Brah Yêsu ta ngih phat dôih, jêh ri lĕ rngôch tâm rgum jŭm Brah Yêsu. 28Khân păng doh lơi ao ôbăl, jêh ri nsoh ôbăl ao chăng. 29Jêh ri khân păng tanh du mlâm đon hđăch ma lok, sâm ndô ta bôk Brah Yêsu, jêh ri dơm du tơm treng tâm ti pama Păng, khân păng chon kô mâk ta năp Păng jêh ri mưch ma Păng, lah: "Mbah ma hđăch phung Yuđa!" 30Khân păng soh dak diu ta ôbăl jêh ri sŏk tơm treng lơh ta bôk ôbăl. 31Jêh khân păng mưch ma ôbăl khân păng doh lơi ao chăng, jêh ri nsoh ao ôbăl nơm, jêh ri khân păng njŭn leo pâng ôbăl ta si tâm rkăng.

Brah Yêsu Khĭt Ta Si Tâm Rkăng

32Dôl khân păng luh, khân păng saơ du huê bunuyh tă bơh ƀon Siren, amoh păng Y-Simôn; jêh ri khân păng nchâp ôbăl tui si tâm rkăng Brah Yêsu. 33Tât ta ntŭk rnha Gôgôtha, nâm bu ntĭt, ntŭk nting bôk. 34Khân păng ăn ma Brah Yêsu ndrănh tâm pot đah dak si tăng, ƀiălah jêh Brah Yêsu chiăm djê̆, Păng mâu ŭch nhêt ôh. 35Jêh ri khân păng, pâng ôbăl ta si tâm rkăng, khân păng tâm pă bok ao ôbăl ma nau nchroh; 36jêh ri khân păng gŭ ta nây chiă uănh Brah Yêsu. 37Ta klơ bôk ôbăl khân păng pla du pŏk samƀŭt nchih nau bu phat dôih ôbăl pô aơ: "Aơ, Brah Yêsu Hđăch Yuđa."
38Rnôk nây bu pâng ndrel ma Brah Yêsu, bar hê bunuyh ntŭng, nguay pama, nguay pachiao. 39Phung rgăn ta nây gơm mưch ma Brah Yêsu; khân păng rteh bôk jêh ri lah: 40"May ƀư rai ngih brah Yuđa jêh ri ƀư tay tâm pe nar, tâm rklaih hom may nơm! Tơlah may jêng Kon Brah Ndu, ntrŭnh hom tă bơh si tâm rkăng." 41Phung ngâng kôranh ƀư brah, phung kôranh nchih samƀŭt, jêh ri phung bubŭnh buranh lah ma nau mưch tâm ban lĕ: 42"Păng tâm rklaih âk bu êng. Mâm ƀư Păng mâu dơi tâm rklaih Păng nơm. Tơlah Păng jêng hđăch Israel, ăn Păng jŭr aƀaơ ro, tă bơh si tâm rkăng jêh ri he mra chroh ma Păng. 43Păng nsing ma Brah Ndu; tơlah Brah Ndu rŏng ma Păng, ăn Brah Ndu tâm rklaih Păng aƀaơ ro. Yorlah Păng lah: 'Gâp jêng Kon Brah Ndu.'" 44Jêh ri phung ntŭng bu pâng ta si tâm rkăng ndrel ma Păng rak suai Păng tâm ban lĕ. 45Ntơm bơh nar nklang bôk tât ta pe mông geh nau ngo lam neh ntu. 46Ta pe mông Brah Yêsu nter huy ktang ngăn: "Êli, Êli, lama sabaktani?" Nâm bu ntĭt: "Brah Ndu gâp ơi, Brah Ndu gâp ơi, mâm ƀư may chalơi gâp?" 47Ƀaƀă gŭ dăch ta nây tăng nau nây, khân păng lah: "Păng kuăl Y-Êli." 48Ƀâtlât geh du huê tâm phung khân păng nchuăt, hăn sŏk bok, mbŭk tâm dak srat ntôt ta chiông tơm treng, jêh ri ndơ̆ ăn ma Brah Yêsu nhêt. 49Ƀiălah phung êng lah: "Lơi hom! Ăn he gŭ uănh gĭt lah Y-Êli mra văch tâm rklaih Păng?" 50Brah Yêsu nter du tong huy ngăn, jêh ri tăch n'hâm.
51Jêh ri aơ bok tâm ngih brah Yuđa khêk ntơm bơh klơ tât tâm dâng; jêh ri neh n'găr; lŭ đang; 52âk môch pơk jêh ri âk săk jăn phung kloh ueh khĭt jêh dâk rêh tay. 53Jêh Brah Yêsu dâk rêh tay phung aơ luh tă bơh môch, lăp tâm ƀon kloh ueh jêh ri tâm mpơl ma âk bunuyh. 54Kôranh tahan jêh ri phung chiă Brah Yêsu gŭ ndrel ta nây, tơlah saơ nau n'găr neh ntu jêh ri lĕ rngôch nau tât jêh, khân păng klach ngăn jêh ri lah: "Nanê̆ bunuyh aơ jêng Kon Brah Ndu!" 55Jêh ri geh âk bu ur gŭ uănh tă bơh n'gor Galilê. 56Tâm phung bu ur nây geh H'Mari Mađala, H'Mari, mê̆ Y-Yakơ jêh ri Y-Yôsê, geh nđâp ma mê̆ phung kon Y-Sêƀêđê.

Nau Bu Tâp Brah Yêsu Phung Tahan Gak Môch

57Kêng măng geh du huê ndrŏng văch tă bơh ƀon Arimathê, amoh păng Y-Yôsep. Păng yơh jêng oh mon Brah Yêsu. 58Păng hăn ta Pilat jêh ri dăn săk jăn phan Brah Yêsu. Pilat đă bu ăn ma păng. 59Y-Yôsep sŏk săk jăn, sâm nklâm ma bok nglang, 60jêh ri njor tâm môch mhe păng nkra jêh ma păng nơm tâm trôm ntu lŭ; păng rlă du mlâm lŭ toyh rdâl ta mpông môch jêh ri păng sĭt. 61H'Mari Mađala jêh ri H'Mari êng gŭ ta nây lĕ. Khân păng gŭ ta năp môch.
62Ôi taơ, nar pakơi ma nar nkra, phung n'gâng kôranh ƀư brah jêh ri phung Pharisi hăn ndrel ma Pilat. 63Jêh ri lah: "Hơi kôranh, hên kah gĭt ma bunuyh mƀruh sưr nây, dôl păng hôm gŭ rêh lah pô aơ: 'Tăch pe nar gâp mra dâk rêh.' 64Pôri, ăn may đă bu chiă uănh môch ăn ueh tât ta nar tal pe, klach lah phung oh mon păng văch, sŏk ntŭng săk jăn păng jêh ri lah ma bu: 'Păng dâk rêh jêh tă bơh phung khĭt'. Nau mƀruh sưr pakơi nây mra jêng mhĭk lơn panăp." 65Pilat lah ma khân păng: "Khân may geh jêh phung tahan gak, hăn hom! Jêh ri chiă uănh môch tĭng nâm khân may ŭch." 66Pôri khân păng hăn jêh ri rdâl môch jêh ri ăn nau ver mâu ăn bu trâl jêh ri ăn tahan gak ƀư ueh nanê̆.