28

Yêsu Dâk Rêh

1Lôch jêh nar Saƀat, ơm ôi nar nguay tâm nar ver, H'Mari Mađala jêh ri H'Mari êng hăn chop môch. 2Aơ geh nau n'găr neh ntu ktang; yorlah tông păr ueh Kôranh Brah văch tă bơh klơ, nklơ̆ lơi lŭ jêh ri săp gŭ. 3Păng jêng ral nâm bu lơp nglaih jêh ri ao Păng nglang nâm bu pler. 4Phung tahan chiă klach hâu ngăn, nsâr săk jăn, jêng nâm bu khĭt. 5Ƀiălah tông păr ueh lah ma phung, bu ur nây: "Lơi khân ay klach ôh, yorlah gâp gĭt khân ay joi Brah Yêsu, Nơm bu pâng ta si tâm rkăng. 6Păng mâu hôm gŭ ta aơ ôh; yorlah Păng hŏ dâk rêh jêh, nâm bu Păng lah jêh. Văch uănh ntŭk bu njor Păng. 7Jêh ri hăn gơnh, lah ma phung oh mon Păng gĭt ma Păng hŏ dâk rêh jêh, jêh ri Păng hăn lor ma khân may tâm n'gor Galilê; ta nây khân may mra saơ Păng. Pôri, gâp mbơh ma khân may."
8Khân păng hăn ro tă bơh môch, dôl hăn geh nau klach, lơ hâu geh nau răm, jêh ri khân păng nchuăt hăn mbơh nau mhe mhan nây ma phung oh mon Păng. 9Aơ, Brah Yêsu tâm mâp đah phung bu ur nây jêh ri lah pô aơ: "Mŏt ton ma khân ay may!" Khân păng hăn êp Păng, kuăn ta jâng Păng jêh ri păn ta neh mbah ma Păng ro, jêh ri Brah Yêsu lah ma khân păng: 10"Lơi klach ôh; hăn mbơh ma phung oh gâp ăn khân păng hăn ta n'gor Galilê, ta nây yơh khân păng mra saơ gâp." Phung kôranh ƀư brah mƀruh
11Dôl khân păng hăn ta trong, geh ƀaƀă phung tahan chiă plơ̆ ta ƀon toyh, mbơh ma phung n'gâng kôranh ƀư brah lĕ rngôch nau tât jêh. 12Phung aơ tâm rgum đah phung buranh, jêh ri tâm nchră, khân păng ăn prăk âk ngăn ma phung tahan jêh ri ntăm ma khân păng pô aơ: 13"Ăn khân may lah: 'Phung oh mon păng văch dôl măng ngo ntŭng jêh sŏk săk Brah Yêsu dôl hên bêch.' 14Tơlah kôranh toyh tăng nau nây, hên mra rblang ma păng jêh ri king ma khân may." 15Pôri phung tahan sŏk prăk jêh ri ƀư tĭng nâm nau nây; nau nây tăng lư lam ntŭk tâm phung Yuđa tât ma nar aơ.

Brah Yêsu Tâm Mpơl Păng Nơm Tâm N'gor Galilê

16Phung jât ma nguay nuyh oh mon, hăn ta n'gor Galilê, ta yôk Brah Yêsu ntĭm jêh ma khân păng. 17Tơlah khân păng saơ jêh Brah Yêsu, khân păng chon mon ta neh, mbah ma Păng, ƀiălah ƀaƀă geh nau đing. 18Brah Yêsu hăn êp khân păng jêh ri lah pô aơ:
 "Lĕ rngôch nau brah tâm trôk jêh ri ta neh ntu bu jao jêh ma gâp.
19Hăn hom khân may, njêng phung chroh tâm lĕ rngôch mpôl băl bunuyh, ƀư ƀaptem ma khân păng tâm amoh Brah Mbơ̆, amoh Brah Kon, jêh ri tâm amoh Brah Huêng Ueh. 20Jêh ri sâm nti ăn khân păng tông lĕ nau gâp ntăm jêh ma khân may; jêh ri aơ gâp ăt hôm gŭ ndrel ma khân may ƀaƀơ tât nar lôch."