3

Nau Y-Yôhan, Nơm Ƀư Ƀaptem Nti Lah

1Tâm rnôk nây geh Y-Yôhan, nơm ƀư ƀaptem, nti lah tâm bri rdah n'gor Yuđa. Pô aơ păng lah: 2"Rmal hom nau tih khân ay may, yorlah ƀon bri hđăch Brah Ndu dăch tât jêh." 3Ma păng yơh kôranh nơm mbơh lor Y-Êsai hŏ mbơh jêh pô aơ:
 "Geh bâr nter tâm bri rdah:
 'Nkra hom trong Kôranh Brah,
 ƀư lâng hom trong Păng.'"
4Y-Yôhan nsoh ao ƀư ma rsau seh samô, jêh ri păng vân rse bŭt ntâu. Păng sa krah jêh ri dak sŭt bri. 5Rnôk nây lĕ rngôch bunuyh ƀon Yêrusalem, lam n'gor Yuđa, jêh ri lĕ n'gor êp dak krong Yurdan hăn ma păng dadê. 6Jêh mbơh nau tih, khân păng dơn Y-Yôhan ƀư ƀaptem ma khân păng tâm dak krong Yurdan.
7Yor păng saơ âk phung Pharisi jêh ri phung Sađusê văch dơn nau ƀaptem păng, păng lah pô aơ: "Hơi phung mpôl bêh rmâng, mbu nti khân may dơi du bơh nau Brah Ndu ji nuih mra tât? 8Ăn khân may geh play di tâm nau rmal nau tih. 9Jêh ri lơi lah ôh tâm nuih n'hâm khân ay may: 'Hên geh jêh Y-Abraham jêng mbơ̆ hên' yorlah gâp mbơh ma khân ay may, tă bơh phung lŭ aơ Brah Ndu dơi ăn deh kon ma Y-Braham đŏng. 10Aƀaơ sung bu hŏ dơm jêh ta reh si; lĕ rngôch si mâu geh play ueh bu mra kăl jêh ri mƀăr lơi tâm ŭnh. 11Gâp ƀư ƀaptem ma khân ay may ma dak ma nau khân ay may rmal nau tih, ƀiălah nơm văch pakơi gâp, Păng brah lơn ma gâp, jêh ri gâp mâu khư ôh djôt ntâu jot Păng. Păng yơh mra ƀư ƀaptem ma khân ay may ma Brah Huêng Ueh jêh ri ma ŭnh. 12Păng djôt dông tâm ti, jêh ri mra ƀư kloh ntŭk plên ba Păng. Păng mra bun ba tâm ngih prăp ba Păng, ƀiălah Păng su lơi rhe tâm ŭnh mâu blau nhhât."

Nau Ƀư Ƀaptem Ma Yêsu Krist

13Rnôk nây Brah Yêsu luh bơh n'gor Galilê hăn ta Y-Yôhan ta dak krong Yurdan, gay ma Y-Yôhan ƀư ƀaptem ma Păng. 14Ƀiălah Y-Yôhan dun jêh ri lah: "Gâp yơh ŭch ăn may ƀư ƀaptem ma gâp. Mâm ƀư may văch ma gâp?" Brah Yêsu plơ̆ lah ma păng: 15"Ƀư hom aƀaơ ro; yorlah di jêh ma he ƀư nanê̆ lĕ rngôch nau sŏng pôri." Jêh ri Y-Yôhan tông nau păng lah. 16Jêh Brah Yêsu dơn nau ƀaptem, dôl Păng mhe luh tă bơh dak, ri trôk pơk mpơl, jêh ri Y-Yôhan saơ Brah Huêng Ueh Brah Ndu trŭnh ta Brah Yêsu nâm bu du mlâm plŭk. 17Jêh ri geh bâr ngơi tă bơh trôk lah: "Păng aơ jêng kon gâp rŏng ngăn ngên, tâm Păng gâp geh nau maak ngăn."