3

Nau Ngơi Mhĭk Ma Phung Mât Uănh Phung Israel

1Nây dĭng gâp lah: "Iăt hom, Hơi phung kôranh Yakôp jêh ri khân may jêng bunuyh chiă uănh ngih Israel!
 Mâu di hĕ nau nây gay ăn khân may gĭt nau sŏng?
2Pônây, khân may ji nuih đah nau ueh, ŭch ma nau mhĭk; n'huk ntâu phung aơ jêh ri tah doih puăch tâm nting khân păng,
3khân may sa puăch phung ƀon lan gâp, chroi ntâu khân păng, choh hăch nting khân păng, jêh ri siăt rhên nâm bu puăch tâm trôm glah, nâm bu puăch tâm glah ƀŭng.
4Rnôk nây khân păng mra nter vơl ma Yêhôva, ƀiălah păng mâu mra plơ̆ sĭt lah ôh ma khân păng. Ngăn yơh, Păng mra pôn muh măt ma khân păng dôl nôk nây tĭng nâm nau mhĭk khân păng hŏ ƀư jêh.
5Aơ jêng nau Yêhôva ngơi lah ma lĕ phung kôranh nơm mbơh lor, ƀư vĭ hiơt trong ăn ma ƀon lan gâp, jêng phung kăp sêk neng khân păng nơm, jêh ri lah: "Nau đăp mpăn." Tơlah mâu geh ndơ gĭnh tâm trôm mbung khân păng, pôri jêng ndrăp nkra ma nau tâm lơh đah nơm mâu ăn ndơ sông sa ma khân păng.
6Yor nây, bri măng ngo klĕng mra nkŭm khân may mâu geh nau mpơl dơi saơ tâm ntŭk ndâp ôh; mâu hôm dơi mbơh lor ôh. Măt nar mra tŭp ta kalơ phung kôranh nơm mbơh lor nây, jêh ri nôk nar mra ngo jŭm khân păng.
7Phung lĕ tă tâm saơ mra prêng, jêh ri phung mbơh lor bu mra ntêh rmot.
 Lĕ rngôch khân păng mra rdêp mbung nơm, yorlah mâu hôm geh nau plơ̆ lah ôh tă bơh Brah Ndu.
8Ƀiălah bi ma gâp, gâp bêng ler ma nau dăng katang, nau phat dôih, jêh ri nuih n'hâm janh bơh Brah Huêng ueh Yêhôva, gay mbơh ma phung Yakôp ma nau khân păng rlau nau vay, jêh ri ma phung Israel nau tih khân păng.
9Hơi phung kôranh ngih Yakôp, jêh ri khân may phung chiă uănh ngih Israel, iăt hom nau aơ, khân may tâm rmot nau di nanê̆ ngăn, jêh ri nsŭk bu ƀư tih lĕ nau sŏng srăng.
10Khân may ndâk ƀon Siôn ma nau pling mham jêh ri ƀon Yêrusalem ma nau hue.
11Phung kôranh phat dôih yor drăp bu blŏl phung kôranh ƀư brah păng nti yor rnoh bu nkhôm,
 phung kôranh nơm mbơh lor hăn mbơh lor yor ma prăk; jêh nây khân păng nsing ma Yêhôva pô aơ:
 "Mâu hĕ di Yêhôva gŭ ta nklang he? Mâu geh nau mhĭk ôh mra tât ma he."
12Pônây, yor khân may bu mra chuar rlơk yôk Siôn nâm bu lôk mir; ƀon Yêrusalem mra jêng du mbŭch rsong lĕ rai jêh, jêh ri yôk ngih brah mra jêng yôk tâm krŏng.