6
Yawmsaub ua plaub rua cov Yixayee
1Ca le tig ntsej noog tej kws Yawmsaub has.
“Ca le sawv tseeg pav koj tshaaj plaub rua tej roob,
hab ca tej pov roob noog koj lub suab.
2Tej roob 'e, ca le noog tej kws Yawmsaub kom,
hab tej taw tag lub nplajteb kws nyob moog ib txhws,
tig ntsej noog,
tsua qhov Yawmsaub muaj plaub rua nwg haiv tuabneeg,
hab nwg yuav nrug cov Yixayee kom tsaam.
3“Kuv haiv tuabneeg 'e,
kuv tau ua le caag rua mej?
Kuv tau ua rua mej tsaug leeg qhov twg?
Ca le teb kuv.
4Kuv coj mej tawm huv Iyi tebchaws lug,
hab txhwv mej tawm huv lub tsev ua qhev lug.
Kuv khaiv Mauxe hab Aloo hab Mili‑aa
coj mej kev moog.
5Kuv haiv tuabneeg 'e, ca le ncu txug tas,
Mau‑a tug vaajntxwv Npalaj
xaav tswvyim phem le caag
hab Npe‑au tug tub Npala‑aa teb nwg le caag,
hab ntawm Sithi moog txug Kilakaa
muaj daabtsw tshwm tuaj,
sub mej txhad paub
tej kws Yawmsaub ua cawm mej.”
Tej kws hum Vaajtswv lub sab
6Kuv yuav coj daabtsw tuaj cuag Yawmsaub
hab pe Vaajtswv kws nyob lub chaw sab?
Tswm nyog kuv coj mivnyuas nyuj
noob nyoog muaj ib xyoos
tuaj ua kevcai hlawv xyeem rua nwg lov?
7Yawmsaub yuav txaus sab
rua quas txheeb tug txwv yaaj
hab quas vaam lub haav
kws muaj roj ndwg lov?
Tswm nyog kuv yuav muab kuv tug tub hlub
xyeem ntxuav kuv tej kev faav xeeb lov,
yog xyeem tug mivnyuas kws kuv yug
ntxuav kuv tug ntsuj plig lub txem lov?
8Tuabneeg 'e, nwg tub qha qhov kws zoo
rua mej paub lawm.
Tej kws Yawmsaub xaav kuas mej ua
tsuas yog ua ncaaj hab nyam txujkev hlub luas,
hab ua lub neej txu lub sab
nrug nraim mej tug Vaajtswv xwb.
9Qhov kws fwm hab paub koj lub npe
kuj yog muaj tswvyim tag.
Yawmsaub lub suab tshaaj tawm rua lub nroog
has tas, “Lub xeem hab ib tsoom tuabneeg
huv lub nroog, ca le noog.⚓
10Kuv yuav nov qaab tej nyaj txag
kws ua phem es tau lug
kws muaj nyob huv cov tuabneeg phem lub tsev,
hab lub efa⚓ ntxo
kws raug foom tsw zoo tau lov?
11Kuv yuav zaam tug kws muaj raab teev tsw hum txaj
hab muaj cov thauj teev ntxo huv nwg lub naab lov?
12Mej cov kws nplua nuj
yeej yog ua limham ndais ntuj,
mej cov tuabneeg zej zog has lug daag.
Puab tug nplaig huv puab lub qhov ncauj daag ntxag.
13Vem le nuav kuv txhad chiv nplawm mej,
ua rua mej lamswm taag vem yog mej lub txem.
14Mej yuav noj tassws tsw tsau,
mej lub plaab tseed tshaib.
Mej yuav khaws ca tassws khaws tsw tau ruaj.
Tej kws mej khaws tau ruaj
kuv yuav muab pub rua nav ntaaj.
15Mej yuav tseb los yuav tsw tau hlais,
mej yuav tsuam txwv aulib
los yuav tsw tau roj lug pleev mej lub cev,
mej yuav tsuam txwv maab
los tsw tau cawv txwv maab haus.
16Mej tuav rawv vaajntxwv Ooli tej kaab ke,
hab ua lawv le Ahaj caaj ceg ua txhua yaam huvsw,
hab mej ua lawv le ob tug taw qha lawm.
Kuv txhad yuav ua rua mej lamswm taag,
hab ua rua mej cov tuabneeg raug luas thuaj luag,
hab mej yuav raug kuv haiv tuabneeg
saib tsw taug.”⚓