11

Máh Cũai Proai Ca Toâq Ỡt Tâng Vil Yaru-salem

¹Máh cũai sốt ki ỡt tâng vil Yaru-salem. Ma máh cũai proai cóq ĩt crơng séng dŏq rưoh muoi dống sũ tễ muoi chít dống sũ yỗn ỡt tâng vil Yaru-salem, la vil Yiang Sursĩ rưoh dŏq sang án; ma takêh dống sũ ễn cóq ỡt tâng máh vil toâr tỡ la vil cớt canŏ́h. ²Máh cũai proai khễn cũai ca bũi pahỡm pỡq ỡt tâng vil Yaru-salem. ³Tâng vil toâr cớp vil cớt canŏ́h, bữn máh cũai proai, máh cũai tễng rit sang, tỗp Lê-vi, máh cũai táq ranáq tâng Dống Sang Toâr, cớp máh cũai tễ tŏ́ng toiq cũai táq ranáq yỗn puo Sa-lamôn, alới bữn ỡt tâng cutễq alới bữm.
Bữn cũai tễ tỗp Yuda cớp tỗp Ben-yamin ỡt tâng vil Yaru-salem, yuaq vil ki la vil tiaq tỗp alới.
⁴Máh cũai sốt tễ tỗp Yuda bữn ramứh neq:
A-thaya con samiang Usiah, cớp án la châu Sa-chari; achúc achiac án la A-maria, Sê-patia, cớp Maha-lalê tễ tŏ́ng toiq Pharêt con samiang Yuda.
⁵Masĩa con samiang Baruc cớp châu Côl-hô-sê; achúc achiac án la Hasai, A-daya, Yôi-arip, cớp Sa-chari tễ tŏ́ng toiq Sê-lah con samiang Yuda.
⁶Tễ tŏ́ng toiq Pharêt ca cỡt tahan clŏ́q lứq, la 468 náq. Alới ỡt tâng vil Yaru-salem.
⁷Máh cũai tễ tỗp Ben-yamin la ramứh neq:
Salu con samiang Mê-sulam, cớp án la châu Yô-et; achúc achiac án la Pê-daya, Cô-laya, Masĩa, I-thiel, cớp Yê-saya.
⁸Cabai cớp Salai la sễm ai cheq lứq cớp Salu.
Nheq tữh samiang tễ tỗp Ben-yamin la 928 náq. Alới ỡt tâng vil Yaru-salem. ⁹Yô-el con samiang Si-cri, án la cũai sốt tỗp alới; Yuda con samiang Hat-sanua la sốt pưn án.
¹⁰Máh cũai tễng rit sang bữn ramứh neq:
Yê-daya con samiang Yôi-arip, cớp Yakin.
¹¹Sê-raya con samiang Hil-kia, cớp án la châu Mê-sulam; achúc achiac án la Sadôc, Mê-rai-ôt, cớp Ahi-túp la sốt tỗp tễng rit sang. ¹²Nheq tữh thrỗq cũai tâng sâu nâi ca táq ranáq tâng Dống Sang Toâr la 822 náq, ma máh cũai sốt alới, ramứh neq:
A-daya con samiang Yê-rô-ham, cớp án la châu Pê-lalia; achúc achiac án la Am-si, Sa-chari, Pasur, cớp Mal-kia. ¹³Nheq tữh 242 náq cũai nâi la cũai sốt tâng sâu.
Amat-sai con samiang A-sarel, cớp án la châu Asai; achúc achiac án la Mê-si-lamôt cớp I-mêr. ¹⁴Nheq tữh 128 náq cũai nâi la cỡt tahan clŏ́q lứq. Cũai sốt tỗp alới la Sap-diel tễ tỗp con samiang Hakê-dalim.
¹⁵Tễ tỗp Lê-vi bữn ramứh neq:
Sê-maya con samiang Hat-sup, cớp án la châu At-racam; achúc achiac án la Hasa-bia cớp Buni.
¹⁶Sap-bathai cớp Yô-sabat la cũai sốt tâng tỗp Lê-vi, alới nhêng salĩq máh ranáq yáng tiah Dống Sang Toâr.
¹⁷Ma-tania con samiang Mi-cah, cớp án la châu Sap-di, tŏ́ng toiq Asap. Án ayông máh cũai ũat cansái sa‑ỡn Yiang Sursĩ tâng Dống Sang Toâr.
Bac-bukia rachuai ranáq Ma-tania.
Ap-da con samiang Samua, cớp án la châu Calal, chễ Yê-duthun.
¹⁸Tỗp Lê-vi ca ỡt tâng vil Yaru-salem la vil Yiang Sursĩ khoiq rưoh dŏq sang án, la 284 náq.
¹⁹Máh cũai kĩaq toong dống sang bữn ramứh neq:
Acup, Tal-môn, cớp nheq tữh máh sễm ai alới la 172 náq.
²⁰Máh cũai proai I-sarel, máh cũai tễng rit sang, cớp tỗp Lê-vi ca noâng clữi, ki alới miar ỡt tâng cutễq alới bữm tâng máh vil toâr cớp vil cớt tâng cruang Yuda. ²¹Cũai táq ranáq tâng Dống Sang Toâr ỡt muoi ntốq cutễq tâng vil Yaru-salem noau dŏq Ô-phêl. Si-ha cớp Kit-pa nhêng salĩq máh cũai ki.
²²Usi nhêng salĩq tỗp Lê-vi ca ỡt tâng vil Yaru-salem. Án la con samiang Bani, cớp án la châu Hasa-bia; achúc achiac án la Ma-tania cớp Mi-cah tễ tŏ́ng toiq Asap. Dống sũ án bữn mpỗl ũat toâq rôm sang toam tâng Dống Sang Toâr. ²³Puo khoiq anoat yỗn dũ sâu tỗp Lê-vi cóq rapĩen dỡq ũat cu rangái tâng Dống Sang Toâr.
²⁴Pê-tahia con samiang Mê-sê-sabêl, sâu Sê-rah, tỗp Yuda, án ỡt níc tâng ntốq puo Pơ-sia ỡt, cớp án cỡt cũai partoâq parnai tang máh cũai proai I-sarel pỡ puo.

Cũai Proai Tâng Vil Toâr Cớp Vil Cớt

²⁵Cũai proai clứng lứq pỡq ỡt tâng vil ca cheq nia sarái alới bữm. Bữn cũai tễ tỗp Yuda ỡt tâng máh vil Ki-riat Ar-ba, Di-bôn, Yê-cap-sil, cớp máh vil cớt mpễr vil ki. ²⁶Cớp bữn cũai ỡt tâng máh vil Yê-sua, Mô-lada, Bet Palet, ²⁷Hasar Sual, Bêr-si-ba, cớp máh vil cớt mpễr vil ki; ²⁸vil Sic-lac, Mê-cô-na, cớp máh vil cớt mpễr vil ki; ²⁹tâng máh vil En Ri-môn, Sô-ra, Yar-mut, ³⁰Sanũa, A-dulam, cớp vil cớt mpễr ki; tâng vil Lakit cheq cutễq nia sarái alới, tâng vil Asê-cah, cớp máh vil cớt mpễr ki. Yuaq ngkíq, cũai proai Yuda bữn ỡt tâng cutễq Bêr-si-ba coah angia pưn, yỗn toau toâq avúng Hi-nôm ca ỡt coah angia pỡng.
³¹Tỗp Ben-yamin ỡt tâng máh vil Kê-ba, Mic-mat, Ai-cha, Bet-el, cớp máh vil cớt mpễr ki; ³²dếh tâng máh vil Ana-thôt, Nop, Ana-nia, ³³Hasôr, Rama, Ki-têm, ³⁴Hadit, Sê-bô-im, Nê-balat, ³⁵Lôt, Ô-nô, cớp tâng avúng Máh Cũai Chiang. ³⁶Ma bữn máh cũai tễ tỗp Lê-vi ỡt tâng cutễq Yuda parnơi cớp tỗp Ben-yamin.