7

Ne^haa^mi Orn Mienh Gunv Ye^lu^saa^lem

1Zorc ziangx zingh laatc, yie naetv jienv gaengh, aengx paaiv zuov gaengh mienh caux baaux nzung mienh yaac orn ⟨Lewi Mienh.⟩ 2Yie ziouc bun i dauh mienh gunv Ye^lu^saa^lem Zingh. Yie bun dauh yie nyei muoz-doic, Haa^naa^ni, caux gunv zaangc Ziouv nyei biauv nyei laauh wuov dauh baeng-bieiv, Haa^nan^yaa, weic zuqc ninh hnyouv zingx yaac taaih Tin-Hungh gauh camv zuangx mienh. 3Yie mbuox ziangx ninh mbuo, “Zuov mba'hnoi cuotv daaih hlang deix cingx daaih koi zingh gaengh. Mienh corc zuov gaengh nyei ziangh hoc oix zuqc guon jienv gaengh, longc gaengh sorn sorn jienv. Yaac oix zuqc paaiv Ye^lu^saa^lem nyei baeqc fingx luonh baan zuov zingh. Gorqv-mienh oix zuqc yiem paaiv ziangx nyei dorngx. Maaih deix yaac yiem doix gorqv-mienh ganh nyei biauv.”

Zuqc Guaatv Mingh Nzuonx Ye^lu^saa^lem Nyei Mienh

4Wuov norm zingh youc hlo youc jangv. Yiem zingh gu'nyuoz nyei mienh yaac zoqc. Biauv yaac maiv gaengh duqv gomv camv. 5Tin-Hungh bun yie yiem hnyouv hiuv duqv oix zuqc heuc zoux hlo zoux jien nyei mienh caux zuangx baeqc fingx ziux mienh buonc faaux mienh houz. Yie yaac lorz buatc zuqc guaatv mingh nzuonx daaih da'yietv baan nyei mienh houz daan. Yie buatc sou-daan hnangv naaiv nor fiev.
6Naaiv se Mbaa^mbi^lon Guoqv nyei hungh diex, Ne^mbu^katv^netv^saa, guaatv mingh Mbaa^mbi^lon duqv nzuonx daaih yiem Yu^ndaa Deic-Bung caux Ye^lu^saa^lem Zingh nyei mienh nyei mbuox. Gorqv-mienh yaac nzuonx gorqv-mienh nyei buonv-mungv. 7Ninh mbuo caux Se^lupv^mbaa^mben, Ye^su^aa, Ne^haa^mi, Aa^saa^li^yaa, Laa^aa^mi^aa, Naa^haa^maa^ni, Mo^nde^kai, Mbinsaan, Mitv^be^letv, Mbikc^wai, Ne^hum caux Mbaa^aa^naa yietc jauv nzuonx.
Naaiv se I^saa^laa^en Mienh nyei mbuox caux soux mouc.