2

  1Yie se Saalon nyei yietc norm Janx-muangz njimv biangh,
   benx yiem horngz nyei baeqc horqc biangh.

Dorn

  2Yietc norm baeqc horqc biangh yiem njimv-lomc hnangv haaix nor,
   yie hnamv nyei sieqv yiem zuangx sieqv mbu'ndongx yaac hnangv wuov nor.

Sieqv

  3Yietc zungh ba'jaauh biouv yiem ndiangx-lomc gu'nyuoz hnangv haaix nor,
   yie hnamv nyei dorn yiem yietc zungv dorn mbu'ndongx yaac hnangv wuov nor.
  Yie a'hneiv zueiz jienv ninh torngv laangh nyei dorngx,
   seix ninh nyei biouv nyei mueix ziouc hiuv duqv gaam nyei.
  4Ninh dorh yie bieqc ninh mbenc hnaangx hlo nyei dorngx.
   Yiem yie nyei m'nqorngv gu'nguaaic
   ninh cie geh bun cing ninh hnamv yie.
  5Tov zorqv a'ngunc biouv-nqaai bun yie, tengx yie henv,
   aengx bun ba'jaauh biouv tengx yie nyei hnyouv kuh yiem,
   weic zuqc yie hnamv gau, benx baengc mi'aqv.
  6Ninh nyei zaaix jieqv buoz yiem yie nyei m'nqorngv ga'ndiev,
   ninh nyei mbiaauc jieqv buoz qam jienv yie.
  7O Ye^lu^saa^lem nyei zuangx sieqv aac,
   yie ziangv jienv lomc-huaang nyei jung njaih kuinx meih mbuo,
  maiv dungx la'nyauv yie mbuo,
   sueih yie mbuo hnamv taux buangv hnyouv.

Da'nyeic Diuh Nzung

Sieqv

  8Muangx maah! Yie hnamv nyei dorn nyei qiex.
   Mangc maah! Ninh yiem wuov mbong gu'nguaaic biu jienv daaih,
   tiux jienv gan mbong-aiv daaih.
  9Yie hnamv nyei mienh se hnangv jung
   yaac hnangv njaih gouv lunx.
  Ninh souv jienv yie mbuo nyei laatc nqa'haav maengx,
   ninh yiem fong muonh mangc,
   yiem fong muonh nyei piaeng ciepv.
  10Yie hnamv nyei dorn gorngv mbuox yie,

Dorn

  Yie hnamv nyei sieqv aac, jiez daaih maah!
   Yie hnamv nyei sieqv-nzueic, caux yie mingh maah!
  11Mangc maah! Juangv nyei ziangh hoc jiex mi'aqv.
   Mbiungc yaac baac mi'aqv.
  12Biangh cuotv buangv ndau-beih,
   baaux nzung nyei ziangh hoc taux aqv.
  Haiz norqc nqo nyei qiex yiem yie mbuo nyei deic-bung heuc.
  13Ngongh nyorx ndiangx nyei biouv jiez gorn zuoqc,
   a'ngunc hmei nqoi biangh, cuotv ndaang nyei qiex.
  Yie hnamv nyei sieqv aah! Jiez daaih maah!
   Yie hnamv nyei sieqv-nzueic, caux yie mingh maah!
  14O yie nyei baeqc gopv aac,
   meih yiem la'bieiv-ngaamh, yiem wuov mbaengx-qangx,
  tov bun yie buatc meih nyei hmien-mueic.
   Tov bun yie muangx haiz meih nyei sing-qiex,
  weic zuqc meih nyei qiex za'gengh kuh muangx,
   meih nyei hmien-mueic nzueic haic.
  15Oix zuqc zorqv hieh juv bun yie,
   se hieh juv dorn,
  ninh mbuo zoux waaic a'ngunc hmei.
   Yie mbuo nyei a'ngunc hmei yaac nqoi jienv biangh aqv.

Sieqv

  16Yie hnamv nyei mienh se yie nyei, yie se ninh nyei.
   Ninh yiem baeqc horqc biangh gu'nyuoz bungx ninh nyei ba'gi yungh guanh.
  17O yie hnamv nyei dorn aac,
   zuov lungh ndorm laangh nyei nziaaux buonc,
   hmuangx nyei dongh linh mitc mi'aqv.
  Gunv nzuonx aqv, hnangv dauh jung,
   hnangv njaih gouv lunx yangh mbong-citv gu'nguaaic mingh.