22

1Se gorngv buatc meih mbuo nyei gorx-youz nyei ngongh fai ba'gi yungh dorngc jauv wuov naah, maiv dungx zoux hnangv maiv guen maiv sic nyei. Zungv oix zuqc ken nzuonx bun meih nyei gorx-youz. 2Se gorngv wuov dauh gorx-youz leih meih mbuo go, fai maiv hiuv duqv haaix dauh nyei saeng-kuv, oix zuqc ken nzuonx meih mbuo nyei biauv an jienv wuov, zuov meih mbuo nyei gorx-youz daaih lorz ziouc fungx nzuonx bun ninh. 3Gorx-youz nyei lorh fai ninh nyei lui fai ninh nyei haaix nyungc ga'naaiv oix zuqc fih hnangv nyei fungx nzuonx. Maiv dungx zoux hnangv maiv guen maiv sic nyei.
4Se gorngv buatc gorx-youz nyei lorh fai ngongh ndorpc wuov jauv, maiv dungx zoux hnangv maiv guen maiv sic nyei. Oix zuqc liepc jiez sin daaih.
5M'sieqv dorn maiv dungx zuqv m'jangc dorn nyei lui-houx. M'jangc dorn yaac maiv dungx zuqv m'sieqv dorn nyei lui-houx. Ziouv, meih mbuo nyei Tin-Hungh youx haic zoux naaiv nyungc sic nyei mienh.
6Se gorngv buatc norqc lauz yiem wuov jauv-hlen, maiv gunv yiem ndiangx fai ga'ndiev ndau, buatc norqc maa buoc dorn fai buoc jaux, maiv dungx liemh maa caux norqc dorn zorqv. 7Zungv oix zuqc bungx norqc maa, mv baac zorqv norqc dorn duqv nyei. Hnangv naaic meih mbuo ziouc duqv longx, ziangh duqv siouc nyuonh ndaauv.
8Meih mbuo haaix zanc zoux siang-biauv oix zuqc weih jienv biauv-ngorh nyei biei bung hlang deix. Se gorngv mienh ndortv daic, biauv zong mienh ziouc maiv zuqc ndaam-dorng. 9Maiv dungx zorqv ganh nyungc nyim zuangx meih mbuo nyei a'ngunc huingx. Se gorngv hnangv naaiv zoux, liemh zuangx nyei ga'naaiv caux a'ngunc biouv, ganh maiv duqv longc. Oix zuqc dorh mingh zaangc Tin-Hungh nyei biauv.
10Maiv dungx longc ngongh caux lorh juangc ⟨ndiangx-gaaz⟩ ndaam laih ndau.
11Maiv dungx zuqv ba'gi yungh biei caux la'maah suix zorpc jienv ndatv daaih nyei lui.
12Meih mbuo zuqv nyei domh lui-ndaauv, lui-siaam-jieqv nyei biei norm gorqv oix zuqc dingx jienv nqingh nqou.

Longc Baengh Fim Nyei Leiz Dorng Jaa

13Se gorngv maaih dauh mienh longc auv yaac caux ninh bueix, nqa'haav nzorng ninh, 14ziouc lorz jauv gorngv doqc baaic auv nyei mengh dauh. Ninh gorngv, “Yie longc wuov zanc yie maiv buatc ninh maaih jangx-hoc bun cing ninh se maiv bueix jiex dorn nyei sieqv.” 15Sieqv nyei diex maac ziouc oix zuqc dorh nyungc jangx-hoc cuotv daaih mingh taux zingh gaengh ndaangc, ⟨mienh gox⟩ wuov, bun cing ninh mbuo nyei sieqv maiv bueix jiex dorn. 16Sieqv nyei die ziouc gorngv mbuox mienh gox, “Yie bun yie nyei sieqv naaiv dauh mienh longc zoux auv mv baac ih zanc ninh nzorng. 17Ninh zungv gorngv doqc yie nyei sieqv. Ninh gorngv, ‘Yie maiv buatc meih nyei sieqv maaih jangx-hoc bun cing ninh maiv bueix jiex dorn.’ Dongh naaiv aqv! Naaiv zoux jangx-hoc bun cing yie nyei sieqv maiv nziaauc jiex dorn.” Sieqv nyei diex maac ziouc zorqv zoux jangx-hoc wuov kuaaiv ndie taan jienv mienh gox nyei nza'hmien zoux zorng-zengx. 18Wuov norm zingh nyei mienh gox ziouc zorqv wuov dauh nqox daaih longc biaav-bin mborqv, 19aengx baatc ninh nyic ziepc luoqc lungz nyaanh jiu bun sieqv nyei die, weic zuqc ninh bun yietc dauh maiv bueix jiex nqox nyei I^saa^laa^en sieqv ndortv mengh dauh. Wuov dauh sieqv corc benx ninh nyei auv, ninh yietc liuz maiv haih leih guangc.
20Mv baac se gorngv ninh gox nyei waac zien nyei, sieqv yaac lorz maiv duqv haaix nyungc zoux zorng-zengx bun cing ninh maiv nziaauc jiex dorn, 21ninh mbuo ziouc dorh naaiv dauh sieqv cuotv daaih yiem ninh nyei die nyei biauv nyei gaengh ndaangc. Wuov norm zingh nyei zuangx m'jangc dorn ziouc zorqv la'bieiv zong daic, weic zuqc ninh yiem I^saa^laa^en Mienh mbu'ndongx zoux nyaiv haic nyei sic. Ninh corc yiem ninh nyei die nyei biauv wuov zanc ninh zoux hnangv maaic buonv-sin nyei m'sieqv dorn nor. Hnangv naaiv zoux, ziouc bun yiem meih mbuo mbu'ndongx maiv maaih naaiv nyungc orqv sic.
22Se gorngv buatc dauh mienh hienx ganh dauh mienh nyei auv, i dauh zungv oix zuqc dingc zuiz daix daic. Hnangv naaiv zoux ziouc bun yiem I^saa^laa^en Mienh mbu'ndongx maiv maaih naaiv nyungc orqv sic.
23Se gorngv maaih dauh maiv nziaauc jiex dorn nyei sieqv, mienh yaac gorngv ziangh ninh mi'aqv, maaih dauh m'jangc dorn buangh zuqc ninh yiem wuov zingh ziouc caux ninh bueix, 24meih mbuo oix zuqc dorh ninh mbuo i dauh cuotv ga'nyiec ziqc zingh gaengh ndaangc aengx longc la'bieiv zong daic ninh mbuo. Wuov dauh sieqv zuqc daix daic weic zuqc ninh yiem zingh gu'nyuoz yaac maiv heuc mbui tov mienh daaih tengx. Wuov dauh m'jangc dorn daic weic zuqc ninh hienx ganh dauh mienh nyei auv. Hnangv naaiv zoux ziouc bun yiem meih mbuo mbu'ndongx maiv maaih naaiv nyungc orqv sic.
25Mv baac se gorngv maaih dauh m'jangc dorn buangh zuqc dauh dongh mienh gorngv ziangh nyei sieqv yiem wuov naah ziouc zorqv jienv naaiv dauh sieqv caa, kungx oix zuqc zorqv naaiv dauh m'jangc dorn daix daic hnangv. 26Maiv dungx zoux haaix nyungc bun wuov dauh sieqv weic zuqc ninh maiv zoux haaix nyungc zuiz zic duqv daic. Naaiv nyungc sic se hnangv mienh baac-baac mingh mborqv daic dauh ninh nyei laangz zaangc mienh, 27weic zuqc naaiv dauh m'jangc dorn yiem wuov naah buangh zuqc naaiv dauh dongh mienh gorngv ziangh nyei sieqv ziouc caa ninh. Maiv gunv sieqv qaqv heuc yaac maiv maaih haaix dauh daaih njoux ninh.
28Se gorngv maaih dauh m'jangc dorn buangh dauh maiv nziaauc jiex dorn yaac maiv maaih mienh gorngv ziangh nyei sieqv ziouc zorqv jienv ninh caa yaac maaih mienh buatc, 29caa sieqv wuov dauh m'jangc dorn oix zuqc bun ziepc hmz lungz nyaanh sieqv nyei die weic zuqc ninh baaic wuov dauh sieqv. Sieqv ziouc benx ninh nyei auv mi'aqv. Ninh yietc liuz maiv haih leih guangc.
30Mienh maiv dungx longc die nyei auv zoux ganh nyei auv. Hnangv naaiv zoux baaic zuqc ganh nyei die.