23

Maiv Duqv Caux Ziouv Nyei Mienh Gapv Zunv Nyei Leiz

1Da'faanh zuqc im dov nyei fai zuqc lamh mbueiz dorngx gaatv juotc nyei m'jangc dorn, maiv dungx bun bieqc Ziouv nyei mienh gapv zunv nyei wuic.
2Toi daaih nyei fu'jueiv, maiv dungx bun bieqc Ziouv nyei mienh gapv zunv nyei wuic. Liemh njiec taux ziepc doic zeiv-fun, maiv duqv bieqc Ziouv nyei mienh gapv zunv nyei wuic.
3Da'faanh Ammon Mienh fai Mo^apc Mienh, maiv dungx bun bieqc Ziouv nyei mienh gapv zunv nyei wuic. Liemh njiec taux ninh mbuo nyei ziepc doic zeiv-fun, yaac maiv duqv bieqc. 4Meih mbuo cuotv I^yipv Deic-Bung wuov zanc, naaiv deix i fingx mienh maiv dorh nyanc hopv, maiv dorh wuom daaih zipv meih mbuo. Ninh mbuo zungv cingv yiem Me^so^bo^de^mie nyei Beto Zingh, Mbe^o nyei dorn, ⟨Mbaa^laa^am,⟩ zioux meih mbuo. 5Mv baac Ziouv, meih mbuo nyei Tin-Hungh, maiv muangx Mbaa^laa^am nyei waac. Daaux nzuonx ninh bun wuov deix zioux nyei waac tiuv benx buang nyei waac, weic zuqc Ziouv, meih mbuo nyei Tin-Hungh, hnamv meih mbuo. 6Meih mbuo yietc liuz yietc seix maiv dungx tengx ninh mbuo duqv baengh orn fai duqv longx.
7Maiv dungx nzorng E^ndom Mienh weic zuqc ninh mbuo zoux meih mbuo nyei gorx-youz. Yaac maiv dungx nzorng I^yipv Mienh weic zuqc meih mbuo zoux ganh fingx mienh yiem jiex ninh mbuo nyei deic-bung. 8Naaiv deix mienh nyei da'faam doic zeiv-fun haih duqv bieqc Ziouv nyei mienh gapv zunv nyei wuic.

Goux Baeng-Ciangv Cing-Nzengc Nyei Leiz

9Meih mbuo cuotv mingh caux win-wangv mborqv jaax, yiem ciangv nyei ziangh hoc oix zuqc simv nqoi nyungc-nyungc haih bun meih mbuo maaih uix nyei ga'naaiv. 10Se gorngv meih mbuo nyei haaix dauh mienh lungh muonz zanc bueix m'njormh maaih jaix-nongc cuotv, ninh ziouc maaih uix. Ninh oix zuqc cuotv ga'nyiec ndopv-liuh ciangv yiem jienv wuov. 11Mv baac taux lungh maanz-hmuangx oix zuqc nzaaux nzengc sin. Taux mba'hnoi muotv, bieqc ndopv-liuh ciangv duqv aqv.
12Yiem meih mbuo nyei ciangv ga'nyiec maengx oix zuqc dingc norm dorngx zoux jaiv buoz nyei dorngx. 13Oix zuqc maaih diuh ciu caux jienv meih mbuo nyei jaa-sic an. Haaix zanc mingh jaiv buoz oix zuqc longc ciu wetv kuotv. Jaiv liuz buoz, nqa'haav aengx biopv jienv. 14Ziouv, meih mbuo nyei Tin-Hungh, caux meih mbuo yiem ciangv gu'nyuoz weic beu jienv meih mbuo, tengx meih mbuo mborqv hingh meih mbuo nyei win-wangv. Weic naaiv meih mbuo nyei ciangv oix zuqc cing-nzengc weic bun Ziouv maiv buatc yiem meih mbuo mbu'ndongx maaih haaix nyungc maaih uix, laih hlopv nyei ga'naaiv ziouc leih nqoi meih mbuo.

Ziex Nyungc Leiz

15Se gorngv maaih dauh nouh biaux ninh nyei ziouv ziouc daaih kaux meih mbuo, maiv dungx zorqv ninh jiu bun ninh nyei ziouv. 16Bun ninh yiem meih mbuo mbu'ndongx. Oix yiem haaix norm mungv, haaix norm dorngx, sueih ninh ginv. Yaac maiv dungx zoux doqc hoic ninh.
17I^saa^laa^en Mienh m'jangc m'sieqv maiv dungx maaih haaix dauh yiem zaangc zienh nyei biauv zoux maaic buonv-sin nyei mienh. 18M'jangc fai m'sieqv maaic buonv-sin duqv daaih nyei nyaanh maiv dungx dorh bieqc Ziouv, meih mbuo nyei Tin-Hungh, nyei biauv weic jaauv sung laengz nyei ngaengc waac, weic zuqc naaiv deix i nyungc mienh, Ziouv, meih mbuo nyei Tin-Hungh, youx! haic.
19Gaav haaix nyungc bun meih mbuo nyei gorx-youz, maiv dungx longc leic zinh, maiv gunv gaav nyaanh fai nyanc hopv fai haaix nyungc haih duqv leic zinh nyei ga'naaiv. 20Gaav bun ganh fingx mienh weic longc leic duqv nyei. Mv baac gaav bun caux meih mbuo juangc fingx nyei I^saa^laa^en Mienh gorx-youz maiv dungx gaav weic longc leic. Hnangv naaic meih mbuo bieqc oix benx meih mbuo nyei buonc wuov norm deic-bung, Ziouv, meih mbuo nyei Tin-Hungh, ziouc ceix fuqv meih mbuo nyei buoz zoux nyei nyungc-nyungc gong.
21Se gorngv meih mbuo laengz ngaengc waac bun Ziouv, meih mbuo nyei Tin-Hungh, maiv dungx ngaih, oix zuqc jaauv, weic zuqc Ziouv, meih mbuo nyei Tin-Hungh, ndongc haaix zungv oix aapv meih mbuo jaauv. Maiv jaauv nor, benx zuiz mi'aqv. 22Mv baac se gorngv meih mbuo simv jienv, maiv laengz haaix nyungc, meih mbuo ziouc maiv maaih zuiz. 23Meih mbuo nyei nzuih gorngv cuotv laengz haaix nyungc, za'gengh oix zuqc ei jienv wuov nyungc zoux, weic zuqc se meih mbuo ganh maaih hnyouv laengz bun Ziouv, meih mbuo nyei Tin-Hungh.
24Se gorngv meih mbuo bieqc juangc laangz mienh nyei a'ngunc huingx, sueih binc nyanc a'ngunc biouv, mv baac maiv dungx gaeqv dapv ndaan dorh nzuonx. 25Se gorngv bieqc ganh dauh mienh nyei mbiauh ndeic, longc buoz nietv mbiauh dorv hlatv nyanc duqv nyei, mv baac maiv dungx longc nzuqc limh gaatv.