7

Tin-Hungh Ganh Nyei Baeqc Fingx

(Beiv mangc Cuotv I^yipv 34:11-16)

1Ziouv, meih mbuo nyei Tin-Hungh, oix dorh meih mbuo bieqc, dongh oix benx meih mbuo nyei buonc wuov norm deic-bung. Ninh oix yiem meih mbuo nyei wuov ndaangc maengx zunc cuotv camv-fingx mienh, se Hitv^tai Mienh, Ge^gaa^si Mienh, Aa^mo^lai Mienh, Kaa^naa^an Mienh, Be^litv^si Mienh, Hiwai Mienh caux Ye^mbutc Mienh. Naaiv deix siec fingx gauh hlo gauh henv meih mbuo. 2Ziouv, meih mbuo nyei Tin-Hungh, zorqv ninh mbuo jiu bun yiem meih mbuo nyei buoz-ndiev, meih mbuo yaac mborqv hingh ninh mbuo wuov zanc, oix zuqc mietc nzengc ninh mbuo. Maiv dungx caux ninh mbuo liepc haaix nyungc ngaengc waac, yaac maiv dungx korv-lienh ninh mbuo. 3Maiv dungx caux ninh mbuo jouh cien, bungx meih mbuo nyei sieqv bun ninh mbuo nyei dorn longc fai lorz ninh mbuo nyei sieqv bun meih mbuo nyei dorn longc. 4Hnangv naaiv zoux haih bun meih mbuo nyei dorn leih Ziouv aengx zaangc ganh dauh zienh. Ziouv ziouc qiex jiez meih mbuo, siepv-siepv nyei mietc meih mbuo. 5Oix zuqc hnangv naaiv zoux bun ninh mbuo. Oix zuqc caeqv ninh mbuo nyei ziec-dorngh, mborqv muonc ninh mbuo zaangc zienh nyei la'bieiv-dongc, goix ⟨Aa^se^laa⟩ zienh nyeiz nyei fangx, yaac longc douz buov ninh mbuo nyei miuc-fangx, 6weic zuqc meih mbuo benx Ziouv, meih mbuo nyei Tin-Hungh, nyei cing-nzengc mienh. Ziouv, meih mbuo nyei Tin-Hungh, yiem lungh ndiev nyei maanc fingx ginv meih mbuo cuotv daaih benx ninh ganh nyei baeqc fingx.
7Ziouv hnamv meih mbuo, ginv meih mbuo, maiv zeiz weic meih mbuo nyei mienh gauh camv ganh fingx. Beiv maanc fingx meih mbuo gauh zoqc jiex. 8Ziouv hnamv meih mbuo, ei jienv ninh caux meih mbuo nyei ong-taaix houv jiex nyei ngaengc waac, cingx longc ninh nyei domh qaqv dorh meih mbuo cuotv yaac zuoqc meih mbuo nzuonx, biaux ndutv zoux nouh nyei dorngx, I^yipv Deic-Bung, Faalo Hungh nyei buoz-ndiev. 9Weic naaiv meih mbuo oix zuqc hiuv duqv Ziouv, meih mbuo nyei Tin-Hungh, kungx ninh ganh benx Tin-Hungh hnangv. Ninh se ziepc zuoqv nyei Tin-Hungh, ei jienv ninh laengz nyei ngaengc waac zoux, ziouc hnamv dongh hnamv ninh, ei jienv ninh nyei leiz-latc zoux wuov deix, taux yietc cin doic. 10Mv baac,
  Nzorng ninh wuov deix ninh oix winh bun ninh mbuo zuqc mietc.
   Ninh maiv ngaih, zungv oix winh bun nzorng ninh wuov deix.
11Weic naaiv meih mbuo oix zuqc gan longx yie ih hnoi jiu bun meih mbuo naaiv deix leiz-latc caux lingc caux leiz.

Muangx Waac Ziouc Duqv Longx

(Beiv mangc Lewi 26:3-13; Nzamc Leiz-Latc 28:1-14)

12Se gorngv meih mbuo zuangx mienh muangx naaiv deix leiz-latc yaac ziepc zuoqv nyei ei jienv zoux, Ziouv, meih mbuo nyei Tin-Hungh, ziouc hnamv meih mbuo ziux ninh caux meih mbuo nyei ong-taaix laengz jiex nyei ngaengc waac. 13Ninh zungv oix hnamv meih mbuo, ceix fuqv bun meih mbuo, yaac bun meih mbuo hiaangx camv jienv faaux. Ninh oix ceix fuqv bun meih mbuo duqv fu'jueiv camv yaac bun meih mbuo nyei lingh deic gaeng-zuangx longx, liemh mbiauh, siang-a'ngunc diuv caux ga'lanv youh. Yiem Ziouv houv bun meih mbuo nyei ong-taaix oix jiu bun meih mbuo nyei deic-bung, liemh ngongh dorn, yungh dorn, ba'gi yungh dorn oix hiaangx jienv faaux. 14Meih mbuo oix duqv fuqv gauh camv maanc fingx. Meih mbuo nyei m'jangc m'sieqv maiv maaih haaix dauh maiv haih maaih saeng-yungz. Saeng-kuv yaac maiv maaih haaix dauh maiv haih njiec dorn. 15Ziouv zungv oix nqaeqv jienv, maiv bun meih mbuo butv baengc. Yiem I^yipv Deic-Bung meih mbuo hiuv nyei wuov deix ciouv haic nyei baengc ninh maiv bun meih mbuo butv. Kungx bun nzorng meih mbuo wuov deix butv hnangv. 16Meih mbuo oix zuqc mietc nzengc dongh Ziouv jiu bun meih mbuo nyei fingx-fingx mienh. Maiv dungx korv-lienh ninh mbuo yaac maiv dungx zaangc ninh mbuo nyei zienh. Naaiv zungv zoux koux hlopv meih mbuo.
17Maiv dungx yiem hnyouv hnamv, “Naaiv deix mienh gauh camv yie mbuo. Yie mbuo fungc haih zunc ninh mbuo cuotv?” 18Maiv dungx gamh nziex ninh mbuo. Oix zuqc jangx jienv Ziouv, meih mbuo nyei Tin-Hungh, hnangv haaix nor zoux bun Faalo Hungh caux I^yipv nyei zuangx mienh. 19Meih mbuo ganh nyei m'zing buatc jiex ninh mbuo zuqc hlo haic nyei sic seix ninh mbuo, se mbuoqc horngh nyei sic caux jangx-hoc, buatc Ziouv, meih mbuo nyei Tin-Hungh, sung ninh henv haic nyei buoz dorh meih mbuo cuotv daaih. Ziouv, meih mbuo nyei Tin-Hungh, oix hnangv wuov nor zoux bun meih mbuo ih zanc gamh nziex wuov deix mienh. 20Maiv daan mbuoqc naaiv. Ziouv, meih mbuo nyei Tin-Hungh, oix bun ninh mbuo lunc taux zengc njiec nyei mienh caux bingx meih mbuo wuov deix zuqc mietc nzengc. 21Maiv dungx gamh nziex naaiv deix mienh weic zuqc Ziouv, meih mbuo nyei Tin-Hungh, yiem meih mbuo mbu'ndongx. Ninh se hlo haic, oix zuqc gamh nziex nyei Tin-Hungh. 22Ziouv, meih mbuo nyei Tin-Hungh, oix zorqv yiem jienv naaiv deix fingx-fingx mienh manc-manc zunc cuotv meih mbuo nyei wuov ndaangc maengx. Meih mbuo maiv dungx liemh zeih mietc, bun ninh mbuo zutc nzengc. Nziex hieh zoih haih hiaangx jiex ndaangc, hoic meih mbuo. 23Ziouv, meih mbuo nyei Tin-Hungh, oix zorqv ninh mbuo jiu bun meih mbuo, yaac oix bun ninh mbuo lunc nzengc taux zuqc mietc mi'aqv. 24Ninh aengx oix zorqv ninh mbuo nyei zuangx hungh jiu yiem meih mbuo nyei buoz-ndiev. Oix zuqc mietc ninh mbuo, bun yiem naaiv lungh ndiev maiv maaih haaix dauh jangx duqv ninh mbuo. Maiv maaih haaix dauh haih ngaengc duqv meih mbuo taux meih mbuo mietc nzengc ninh mbuo. 25Meih mbuo oix zuqc longc douz buov ninh mbuo nyei zienh nyei miuc-fangx. Yaac maiv dungx mueic jieqv buang miuc-fangx nyei jiem fai nyaanh. Maiv dungx zorqv daaih benx ganh nyei. Gamh nziex benx koux hlopv meih mbuo. Naaiv se Ziouv, meih mbuo nyei Tin-Hungh, youx! haic nyei ga'naaiv. 26Maiv dungx dorh naaiv deix youx haic nyei ga'naaiv bieqc biauv. Nziex meih mbuo ziouc hnangv naaiv deix ga'naaiv zuqc zioux. Meih mbuo oix zuqc nzorng haic yaac youx taux ndiev weic zuqc benx Tin-Hungh zioux nyei ga'naaiv.