8

Duqv Singx Lingh Dorh Mbuo

1Hnangv naaic, ih zanc haaix dauh caux Giduc Yesu juangc maengc ziangh, wuov dauh maiv zuqc dingc zuiz, 2weic zuqc Singx Lingh nyei leiz, dongh bun mbuo caux Giduc Yesu juangc maengc ziangh wuov nyungc leiz, bun yie leih ndutv zuiz nyei leiz caux zuqc daic nyei leiz. 3Weic zuqc baamh mienh mau haic, dongh leiz-latc maiv haih zoux nyei, Tin-Hungh zoux ziangx aqv. Tin-Hungh dingc baamh mienh nyei zuiz ziouc paaiv ninh ganh nyei Dorn daaih benx dauh baamh mienh, maaih sin hnangv zuiz-mienh nyei sin nor, weic zoux ziec nyei ga'naaiv fiqv zuiz. 4Tin-Hungh hnangv naaiv nor zoux weic bun mbuo, dongh maaih Singx Lingh dorh nyei, maiv zeiz ei baamh mienh nyei hnyouv zoux wuov deix, haih ei nzengc leiz-latc dingc horpc zuqc zoux nyei. 5Ei baamh mienh nyei hnyouv hanc zoux wuov deix, kungx hnamv taux baamh mienh oix nyei jauv hnangv. Mv baac maaih Singx Lingh dorh wuov deix, hnamv taux Singx Lingh oix nyei sic. 6Se gorngv bun baamh mienh nyei hnyouv gunv nor, zungv oix zuqc daic. Mv baac Singx Lingh gunv nor, ziouc duqv ziangh maengc yaac duqv baengh orn. 7Hnangv naaic, haaix dauh kungx hnamv taux baamh mienh zoux nyei sic, wuov dauh benx Tin-Hungh nyei win-wangv, weic zuqc ninh maiv ei Tin-Hungh nyei leiz-latc, zungv maiv haih ei jienv zoux. 8Ei ganh nyei hnyouv hanc zoux wuov deix, maiv haih zoux horpc Tin-Hungh.
9Se gorngv Tin-Hungh nyei Singx Lingh zien-zien yiem meih mbuo nyei hnyouv, meih mbuo yiem seix zaangc maiv zeiz ei baamh mienh nyei hnyouv zoux. Meih mbuo maaih Singx Lingh dorh meih mbuo. Haaix dauh maiv maaih Giduc nyei Singx Lingh, wuov dauh maiv zeiz ninh nyei. 10Se gorngv Giduc yiem meih mbuo nyei hnyouv, maiv gunv meih mbuo nyei sin oix zuqc laaix zuiz zuqc daic, meih mbuo nyei lingh wuonh duqv ziangh jienv weic zuqc meih mbuo caux Tin-Hungh horpc hnyouv mi'aqv. 11Yesu daic mv baac Tin-Hungh bun ninh aengx nangh daaih. Se gorngv Tin-Hungh nyei Singx Lingh yiem meih mbuo nyei hnyouv, dongh Giduc Yesu daic mv baac bun ninh nangh daaih wuov dauh ziouc longc yiem meih mbuo nyei hnyouv gu'nyuoz naaiv dauh Tin-Hungh nyei Singx Lingh bun meih mbuo haih daic nyei sin aengx nangh daaih.
12Yie nyei gorx-youz aac, hnangv naaic, maaih dongh mbuo zungv oix zuqc zoux nyei mv baac se maiv zeiz ei baamh mienh nyei hnyouv nyunc zoux. 13Se gorngv meih mbuo ei baamh mienh nyei hnyouv hanc zoux, oix zuqc daic aqv. Mv baac se gorngv longc Singx Lingh mietc nzengc sin zaangc zoux nyei zuiz, meih mbuo ziouc duqv ziangh jienv. 14Tin-Hungh nyei Singx Lingh dorh wuov deix benx Tin-Hungh nyei Dorn mi'aqv. 15Meih mbuo zipv daaih nyei Singx Lingh maiv zeiz hoic meih mbuo zoux nouh, bun meih mbuo gamh nziex. Singx Lingh bun meih mbuo benx Tin-Hungh nyei naamh nyouz. Mbuo ziouc kaux Singx Lingh heuc Tin-Hungh, “Aa Die aah! Aa Die!” 16Singx Lingh caux mbuo nyei lingh wuonh fih hnangv nyei zoux zorng-zengx gorngv mbuo se Tin-Hungh nyei naamh nyouz. 17Mbuo zoux Tin-Hungh nyei naamh nyouz ziouc oix duqv nzipc Tin-Hungh liouh bun ninh nyei baeqc fingx nyei fuqv. Dongh Tin-Hungh liouh bun Giduc, mbuo yaac oix caux ninh juangc jienv nzipc. Weic zuqc mbuo siouc kouv hnangv Giduc siouc kouv nor, mbuo yaac oix duqv buonc ninh nyei njang-laangc.

Mbuo Oix Duqv Daaih Nyei Njang-Laangc

18Yie funx mbuo ih zanc buangh nyei kouv naanc maiv fungc beiv Tin-Hungh oix hinc bun mbuo nyei njang-laangc. 19Zeix daaih nyei maanc muotc zuov jienv gengh! oix buatc Tin-Hungh nyei dorn mbuo hinc cuotv daaih. 20Zeix daaih nyei maanc muotc zuqc dingc benx maiv maaih eix leiz nyei ga'naaiv. Naaiv maiv zeiz ei maanc muotc ganh nyei za'eix, se ei Tin-Hungh nyei za'eix. Mv baac Tin-Hungh corc maaih lamh hnamv 21maaih norm hnoi zeix daaih nyei maanc muotc oix biaux ndutv, maiv zuqc huv jienv njiec, yaac oix caux Tin-Hungh nyei naamh nyouz duqv bungx nqoi yaac duqv njang-laangc.
22Mbuo hiuv duqv, taux ih zanc yietc zungv zeix daaih nyei maanc muotc diev mun kouv, njunh jienv yiem, hnangv m'sieqv dorn mun gu'nguaaz nor. 23Maiv daan zeix daaih nyei maanc muotc hnangv. Liemh mbuo yaac njunh jienv yiem. Mbuo duqv zipv Tin-Hungh nyei da'yietv nyungc zingh nyeic, se dongh Singx Lingh. Mbuo nyei hnyouv njunh jienv yiem, zuov Tin-Hungh bun mbuo duqv zoux ninh nyei naamh nyouz, yaac bun mbuo nyei sin nyei nyungc-nyungc duqv bungx nqoi mi'aqv. 24Weic zuqc mbuo hnangv naaiv maaih lamh hnamv, mbuo cingx daaih duqv njoux. Se gorngv haaix nyungc buatc jienv nyei nor, mbuo maiv zuqc hnamv taux wuov nyungc aqv. Hnangv naaic, haaix dauh buatc jienv dongh ninh hnamv taux nyei, corc weic wuov nyungc maaih lamh hnamv nyei fai? 25Mv baac se gorngv mbuo maiv gaengh buatc nyei mbuo corc hnamv oix duqv buatc, mbuo ziouc longc noic zuov taux duqv buatc. 26Fih hnangv nyei, mbuo mau haic, Singx Lingh ziouc daaih tengx mbuo. Mbuo liemh maiv hiuv duqv oix zuqc hnangv haaix nor daux gaux mv baac Singx Lingh njunh jienv gorngv maiv cuotv waac tengx mbuo tov Tin-Hungh. 27Tin-Hungh zaah mienh nyei hnyouv ziouc hiuv Singx Lingh nyei eix leiz, weic zuqc Singx Lingh ei Tin-Hungh nyei za'eix tengx Tin-Hungh nyei baeqc fingx tov.
28Mbuo hiuv duqv Tin-Hungh bun hnamv ninh, dongh ei ninh nyei za'eix heuc daaih wuov deix, yiem maanc sic duqv longx. 29Weic zuqc Tin-Hungh jaa-ndaangc ginv wuov deix, ninh yaac dingc bun ninh mbuo hnangv ninh nyei Dorn nor. Ninh nyei Dorn ziouc duqv zoux zuangx muoz-doic nyei domh gorx. 30Tin-Hungh jaa-ndaangc ginv wuov deix, ninh yaac heuc daaih. Heuc daaih wuov deix, ninh yaac bun caux ninh horpc hnyouv. Dongh duqv caux ninh horpc hnyouv wuov deix, yaac bun ninh mbuo maaih njang-laangc.

Giduc Bun Mbuo Hiuv Duqv Tin-Hungh Ndongc Haaix Hnamv Mienh

31Hnangv naaic, mbuo oix zuqc hnangv haaix nor gorngv? Se gorngv Tin-Hungh tengx mbuo, haaix dauh haih caux mbuo doix-dekc? 32Tin-Hungh liemh maiv nzaeng ninh ganh nyei Dorn, zungv bun ninh weic mbuo zuangx mienh siev maengc. Hnangv naaic, ninh zorqv ninh nyei Dorn ceix bun mbuo, ninh maiv zeiz oix zorqv maanc muotc baeqc baeqc ceix bun mbuo fai? 33Haaix dauh haih gox Tin-Hungh ginv daaih nyei mienh? Tin-Hungh ganh gorngv ninh mbuo maiv maaih zuiz. 34Hnangv naaic, haaix dauh haih dingc ninh mbuo maaih zuiz? Giduc Yesu fai? Giduc Yesu daic mi'aqv. Tin-Hungh yaac bun ninh aengx nangh daaih. Ih zanc ninh zueiz jienv Tin-Hungh nyei mbiaauc maengx tengx mbuo jouh Tin-Hungh.
35Giduc hnamv mbuo. Maaih haaix nyungc haih zoux bun mbuo nqaeqv duqv ndutv? Naanc zingh fai? Kuonx hnyouv nyei sic fai? Zuqc mienh zoux doqc fai? Ngorc hnaangx fai? Laaix jomc maiv maaih lui-houx zuqv fai? Haih hoic maengc nyei sic fai? Zuqc daix daic fai? 36Hnangv Ging-Sou fiev jienv gorngv,
  “Weic meih yie mbuo ziangh hnoi zuqc mienh daix jienv yiem.
   Mienh funx yie mbuo hnangv benx oix zuqc daix nyei ba'gi yungh nor.”
37Yiem naaiv deix yietc zungv nzaic zingh, Giduc, dongh hnamv mbuo wuov dauh, bun mbuo hingh jiex nzengc. 38Yie sienx dingc Tin-Hungh hnamv mbuo yaac maiv maaih haaix nyungc haih nqaeqv ndutv bun ninh maiv hnamv, maiv gunv ziangh fai daic, fin-mienh fai mienv, haaix nyungc maaih lingc maaih qaqv nyei, ih zanc cuotv daaih nyei sic fai nqa'haav hingv nyei sic, 39yiem gu'nguaaic lungh fai ga'ndiev ndau nyei, fai haaix nyungc zeix daaih nyei maanc muotc. Tin-Hungh longc mbuo nyei Ziouv, Giduc Yesu, biux mengh ninh hnamv mbuo, yaac maiv maaih haaix nyungc haih nqaeqv ndutv bun Tin-Hungh maiv hnamv.