4

Mbo^aatc Caux Lu^te Dorng Jaa

1Mbo^aatc mingh wuov zingh gaengh, mienh gapv zunv nyei dorngx, zueiz jienv. Dongh Mbo^aatc gorngv wuov dauh gauh cien jiex nyei cien-ceqv yaac jiex wuov. Mbo^aatc gorngv, “Loz-gaeng aac, daaih zueiz jienv naaiv oc.” Wuov dauh ziouc mingh zueiz jienv.
2Mbo^aatc ziouc heuc ziepc dauh wuov norm zingh nyei ⟨mienh gox⟩ daaih yaac mbuox ninh mbuo, “Tov daaih zueiz jienv naaiv oc.” Ninh mbuo ziouc zueiz njiec. 3Mbo^aatc mbuox gauh cien jiex wuov dauh cien-ceqv, “Naa^o^mi yiem Mo^apc Deic-Bung nzuonx daaih. Ninh oix maaic mbuo nyei cien-ceqv, E^li^me^lekv, nyei wuov nzong ndau. 4Yie ziouc hnamv daaih oix zuqc bun meih hiuv duqv naaiv deix jauv-louc, yaac bun meih dorng jienv zueiz naaiv nyei mienh gox caux yie nyei buonv-mungv nyei mienh gox zuoqc naaiv nzong ndau. Se gorngv meih oix zuoqc nor, gunv zuoqc. Maiv oix nor, tov mbuox yie, yie ziouc hiuv. Cuotv liuz meih, maiv maaih haaix dauh maaih leiz zuoqc. Jiex mingh wuov dauh aeqv, se yie.”
 Wuov dauh mienh gorngv, “Yie oix zuoqc nyei.”
5Mbo^aatc gorngv, “Hnangv naaic, meih maaiz Naa^o^mi nyei ndau wuov hnoi, meih yaac duqv wuov dauh Mo^apc Mienh auv-guaav, Lu^te, zoux meih nyei auv, weic bun daic mingh nyei mienh nyei mbuox yiem ninh nzipc nyei ndau.”
6Wuov dauh mienh gorngv, “Hnangv naaic yie maiv maaiz aqv. Nziex haih la'nyauv zuqc yie ganh nzipc nyei buonc. Meih ganh gunv zuoqc aqv. Yie maiv haih.”
7Loz-hnoi yiem I^saa^laa^en Deic-Bung ziux ninh mbuo liepc daaih nyei leiz, maaih mienh zuoqc fai yienc haaix nyungc nor, maaih dauh oix zuqc tutv jieqv heh daaih cunv wuov dauh. Ninh mbuo hnangv naaic zoux zorng-zengx bun cing ei jienv leiz sung mi'aqv.
8Gauh cien jiex wuov dauh cien-ceqv gorngv, “Meih ganh maaiz maah!” wuov zanc, ninh ziouc tutv nqoi ninh ganh nyei heh bun Mbo^aatc.
9Mbo^aatc ziouc gorngv mbuox wuov deix mienh gox caux yiem wuov nyei zuangx mienh, “Meih mbuo ih hnoi zoux zorng-zengx mienh. Yie tengx Naa^o^mi maaiz E^li^me^lekv caux Ki^li^on caux Maalon nyei yietc zungv jaa-dingh. 10Yie yaac duqv Maalon nyei auv-guaav, Mo^apc Mienh m'sieqv dorn, Lu^te, zoux yie nyei auv weic bun daic mingh nyei mienh nyei mbuox yiem ninh nzipc nyei ndau. Hnangv naaic ziouc bun ninh nyei mbuox yiem ninh nyei buonv-fingx buonv-mungv mbu'ndongx maiv zutc. Meih mbuo ih hnoi benx zorng-zengx mienh aqv.
11Yiem zingh gaengh nyei mienh gox caux zuangx mienh gorngv, “Yie mbuo zoux zorng-zengx mienh. Tov Ziouv bun oix bieqc meih nyei biauv naaiv dauh m'sieqv dorn hnangv Laasen caux Le^aa, dongh tengx jienv ceix jiez I^saa^laa^en Fingx wuov deix i dauh. Tov Ziouv bun meih yiem E^faa^taa butv zoih, yaac yiem Mbetc^le^hem maaih mengh hoc. 12Tov Ziouv bun meih yiem naaiv dauh m'sieqv dorn duqv daaih nyei fu'jueiv fun-faqv hnangv Beletv, dongh Taamaa yungz bun Yu^ndaa wuov dauh fun-faqv.”

Ndaawitv Hungh Nyei Douh Zong

13Hnangv naaic Mbo^aatc ziouc dorh Lu^te mingh zoux auv. Longc jienv, Ziouv bun ninh haih maaih gu'nguaaz, yungz duqv dauh dorn. 14Mungv zaangc nyei m'sieqv dorn gorngv mbuox Naa^o^mi, “Ceng Ziouv weic zuqc ih hnoi ninh maiv guangc meih maiv maaih cien haic nyei cien-ceqv. Tov Ziouv bun naaiv dauh dorn yiem I^saa^laa^en Mienh mbu'ndongx maaih mengh hoc. 15Naaiv dauh dorn haih bun meih nyei maengc aengx longx jiez daaih. Gox nyei ziangh hoc ninh yaac oix yungz meih, goux meih, weic zuqc meih nyei mbuangz yungz ninh daaih. Naaiv dauh mbuangz hnamv haic meih yaac weic meih zoux nyei se gauh longx siec dauh dorn.”
16Naa^o^mi ziouc hlorpv jienv naaiv dauh gu'nguaaz-fun, zueiz njiec an jienv camh zuih weic funx benx ninh nyei dorn, yaac dorh ninh. 17Yiem wuov norm mungv nyei m'sieqv dorn gorngv, “Naa^o^mi duqv dauh dorn-fun daaih aqv loh!” Ninh mbuo ziouc tengx ninh cuotv mbuox heuc O^mbetc. O^mbetc zoux ⟨Jetc^si⟩ nyei die. Jetc^si zoux Ndaawitv nyei die.
18Yiem naaiv mingh gorngv Beletv nyei zeiv-fun.
  Beletv zoux Hetv^lon nyei die,
  Hetv^lon zoux Laam nyei die,
  19Laam zoux Am^mi^naa^ndapc nyei die,
  20Am^mi^naa^ndapc zoux Naason nyei die,
  Naason zoux Sanx^mon nyei die,
  21Sanx^mon zoux Mbo^aatc nyei die,
  Mbo^aatc zoux O^mbetc nyei die,
  22O^mbetc zoux Jetc^si nyei die,
  Jetc^si zoux Ndaawitv nyei die.