19

So^ndom Caux Go^mo^laa Zingh Zuqc Mietc

1Wuov deix i dauh fin-mienh mingh taux ⟨So^ndom Zingh⟩ wuov zanc, lungh maanz-hmuangx aqv. Lotv zueiz jienv wuov zingh gaengh ndaangc. Yietv buatc ninh mbuo i dauh ninh jiez sin mingh zipv, ziouc puoqv njiec ndau 2gorngv, “Domh Gorx aac, tov meih mbuo daaih hitv yie, meih nyei bou, nyei biauv. Haih nzaaux zaux, bueix muonz, njang ndorm jiez sin nziouv nyei m'daaih mingh.”
 Ninh mbuo dau, “Maiv zuqc aqv. Yie mbuo bueix naaiv zingh nyei domh zuangx zaamc yaac duqv nyei.”
3Mv baac Lotv qaqv! tov, ninh mbuo ziouc caux jienv Lotv nzuonx, bieqc ninh nyei biauv. Lotv liuc leiz nyanc hopv, ziqv maiv an ⟨bingv⟩ nyei njuov, ninh mbuo ziouc nyanc aqv. 4Naaiv deix i dauh mienh maiv gaengh bueix, So^ndom Zingh nyei m'jangc dorn gox-gox lunx-lunx daaih nzoih, maiv zengc yietc dauh, weih jienv Lotv nyei biauv. 5Ninh mbuo heuc Lotv, “Ih muonz daaih meih naaiv wuov deix i dauh mienh yiem haaix? Dorh cuotv daaih bun yie mbuo caa maah!”
6Lotv cuotv gaengh ka'ndau, zorqv gaengh guon jienv, 7mbuox wuov deix mienh, “Gorx-youz aah! Tov meih mbuo maiv dungx hnangv naaiv nor zoux. Maiv dungx zoux naaiv nyungc waaic haic nyei sic. 8Mangc gaax! Yie maaih i dauh sieqv maiv gaengh bueix jiex dorn. Yie dorh ninh mbuo cuotv daaih bun meih mbuo sueih eix zoux. Mv baac maiv dungx zoux haaix nyungc bun naaiv deix m'jangc dorn. Ninh mbuo daaih yiem yie nyei biauv, yie oix zuqc goux longx beu jienv ninh mbuo.”
9Zuangx mienh gorngv, “Simv nqoi maah!” Aengx gorngv, “Naaiv dauh lov yiem ganh norm dorngx daaih ziouc yie mbuo yiem. Ih zanc zungv oix tengx yie mbuo zoux siemv zuiz jien. Yie mbuo oix zoux bun meih gauh kouv zoux bun wuov deix i dauh.” Ninh mbuo njiec qaqv fongv Lotv laatc nzaatc mingh taux gaengh ndaangc oix mborqv gaengh tong.
10Mv baac wuov deix i dauh kaeqv mienh hnyaa buoz cuotv daaih zorqv Lotv tor bieqc biauv mingh, zorqv gaengh guon jienv. 11Ninh mbuo aengx zoux bun yiem ga'nyiec ziqc gaengh nyei yietc zungv mienh gox-gox lunx-lunx nyei m'zing mbuov nzengc ziouc huaax naaiv huaax wuov yaac lorz maiv buatc gaengh.

Lotv Cuotv So^ndom Zingh

12Wuov deix i dauh mienh mbuox Lotv, “Yiem naaiv corc maaih haaix dauh meih nyei mienh fai? Maiv gunv dorn fai sieqv, sieqv-laangh fai yiem naaiv zingh meih nyei haaix dauh mienh, meih oix zuqc dorh ninh mbuo biaux cuotv. 13Yie mbuo oix mietc So^ndom Zingh weic zuqc Ziouv haiz gox naaiv norm zingh nyei waac camv haic aqv. Ninh ziouc paaiv yie mbuo daaih mietc.”
14Lotv ziouc cuotv mingh mbuox gorngv ziangh ninh nyei sieqv wuov deix sieqv-laangh, “Gaanv siepv deix biaux. Ziouv oix mietc naaiv norm zingh haic aqv.” Mv baac ninh nyei laangh mbuo laaic ninh gorngv jatv a'nziaauc hnangv.
15Da'nyeic ndorm lungh njang, fin-mienh beqv Lotv. Ninh mbuo gorngv, “Gaanv siepv deix maah! Dorh jienv meih nyei auv aengx caux meih yiem naaiv nyei i dauh sieqv biaux nqoi. Maiv zei aeqv, naaiv norm zingh zuqc dingc zuiz zuqc mietc, meih mbuo yaac caux jienv zuqc daic aqv.”
16Lotv corc samh samh soqv-soqv nyei. Wuov deix i dauh mienh ziouc zorqv Lotv mbuo i hmuangv caux ninh mbuo nyei i dauh sieqv nyei buoz ken jienv cuotv ga'nyiec ziqc zingh mingh, weic zuqc Ziouv korv-lienh ninh. 17Biaux cuotv ziqc zingh mingh, maaih dauh wuov deix fin-mienh gorngv, “Gaanv biaux maah! Maiv dungx huin mangc nqa'haav, liemh maiv dungx dingh naaiv ndau-baengh nyei haaix norm dorngx. Nqongh biaux mingh wuov jiex mbong. Maiv zei aeqv, oix zuqc daic aqv.”
18Mv baac Lotv dau, “Domh Gorx aah! Tov maiv dungx hnangv naaic. 19Ziux meih buatc yie, meih nyei bou, zoux duqv horpc meih nyei hnyouv, meih yaac zoux longx bun yie, njoux cuotv yie nyei maengc. Yie maiv haih biaux maiv taux mbong. Nziex yie biaux maiv ndutv naaiv deix domh zeqc naanc, yie ziouc daic aqv. 20Mangc maah! Wuov ndau maaih norm mungv faix nyei, fatv nyei, haih tiux duqv taux nyei. Tov bun yie biaux mingh wuov. Benx yietc norm fiuv-mungv hnangv maiv zeiz? Hnangv naaic ziouc duqv yie nyei maengc cuotv.”
21Fin-mienh gorngv mbuox Lotv, “Meih tov nyei yie nqoi nzuih. Yie ziouc maiv mietc meih gorngv wuov norm mungv. 22Gaanv tiux jienv mingh wuov aqv. Meih mingh maiv gaengh taux wuov norm dorngx, yie maiv haih njiec buoz zoux haaix nyungc.” Weic naaiv mienh ziouc cuotv naaiv norm zingh nyei mbuox heuc “So^aa.”

So^ndom Caux Go^mo^laa Zuqc Mietc

23Lotv mingh taux So^aa Zingh wuov zanc, mba'hnoi cuotv daaih aqv. 24Ziouv liemh zeih bun zieqc jienv douz nyei hungh yiem gu'nguaaic lungh njiec So^ndom caux Go^mo^laa Zingh, 25buov mietc nzengc wuov norm horngc zaangc nyei zingh, liemh mienh, liemh ndau cuotv nyei yietc zungv ga'naaiv. 26Mv baac Lotv nyei auv yiem nqa'haav huin nzuonx mangc ziouc benx norm nzauv-dongc mi'aqv.
27Da'nyeic ndorm nziouv nyei, Apc^laa^ham mingh taux, dongh ninh souv jienv yiem Ziouv nyei nza'hmien wuov norm dorngx, 28mangc njiec. Ninh buatc So^ndom caux Go^mo^laa caux wuov norm horngc cuotv douz-sioux-don cutv-cutv nyei faaux hnangv buov domh douz-nzauc nor.
29Hnangv naaic, Tin-Hungh mietc wuov norm horngc zaangc nyei zingh, liemh Lotv yiem nyei zingh, wuov zanc, ninh jangx zuqc Apc^laa^ham cingx daaih dorh Lotv biaux cuotv, maiv zuqc daic.

Mo^apc Caux Ammon Mienh Nyei Gorn

30Weic zuqc Lotv gamh nziex, maiv gaamv yiem So^aa Zingh, ninh caux ninh nyei i dauh sieqv biaux faaux mbong, yiem norm mbaengx-kuotv gu'nyuoz. 31Sieqv-hlo mbuox sieqv-faix, “Mbuo nyei die gox aqv. Yiem naaiv buoqv ndau maiv maaih mienh daaih longc mbuo hnangv lungh ndiev mienh longc nor. 32Mbuo oix zuqc bun aa die hopv diuv nquin mingh, mbuo ziouc haih caux ninh bueix, weic bangc mbuo nyei die maaih hoz baan.”
33Wuov muonz ninh mbuo i muoz-sieqv bun ninh mbuo nyei die hopv a'ngunc diuv, sieqv-hlo ziouc bieqc mingh caux ninh nyei die bueix. Die zungv maiv hiuv duqv ninh nyei sieqv ziangh haaix bueix, ziangh haaix jiez sin mingh.
34Da'nyeic hnoi sieqv-hlo gorngv mbuox sieqv-faix, “A'hmuangx yie caux aa die bueix liuz aqv. Ih muonz mbuo oix zuqc aengx bun ninh hopv a'ngunc diuv, meih yaac mingh caux ninh bueix weic bangc mbuo nyei die maaih hoz baan.” 35Wuov muonz ninh mbuo ziouc bun ninh mbuo nyei die aengx hopv a'ngunc diuv. Sieqv-faix ziouc bieqc mingh caux ninh nyei die bueix. Ninh nyei die fih hnangv nyei maiv hiuv duqv ninh nyei sieqv ziangh haaix bueix ziangh haaix jiez sin.
36Hnangv naaiv nor Lotv nyei i dauh sieqv maaih jienv ninh mbuo ganh nyei die nyei gu'nguaaz. 37Sieqv-hlo yungz duqv dauh dorn, tengx cuotv mbuox heuc Mo^apc. Mo^apc zoux ih jaax hnoi Mo^apc Mienh nyei ong-taaix-ngaeqv. 38Sieqv-faix yaac yungz duqv dauh dorn, tengx cuotv mbuox heuc Mben^am^mi. Mben^am^mi se zoux ih jaax hnoi Ammon Mienh nyei ong-taaix-ngaeqv.