27

Yaakopv Duqv I^sakc Buang Waac

1I^sakc gox haic aqv. M'zing yaac mbuov, mangc maiv buatc. Ninh heuc ninh nyei dorn-hlo, Esaau, daaih gorngv mbuox ninh, “Dorn aac.”
 Esaau dau, “Aa die aac, yie yiem naaiv oc.”
2I^sakc gorngv, “Die gox haic aqv. Maiv hiuv duqv haaix hnoi daic. 3Dorn aac, zorqv meih nyei juang-zinx caux forng mingh gemh buonv dauh orv daaih bun yie nyanc. 4Zoux kuv nyei hnangv yietc gau yie oix nyanc wuov nor, mbenc daaih bun yie, weic yiem yie maiv gaengh daic yie duqv buang nqa'haav laai wuov nzunc waac bun meih.”
5I^sakc caux ninh nyei dorn, Esaau, i dorn-diex gorngv waac wuov zanc, Le^mbe^kaa muangx jienv nyei. Esaau mingh gemh buonv orv wuov zanc, 6Le^mbe^kaa mbuox ninh nyei dorn, Yaakopv, “A'jang yie haiz meih nyei die gorngv mbuox Esaau, 7‘Buonv dauh orv mbenc daaih kuv nyei bun yie nyanc weic yiem yie maiv gaengh daic duqv yiem Ziouv nyei nza'hmien buang waac bun meih.’ 8Dorn aac, hnangv naaic, meih muangx yie, ei jienv yie nyei waac zoux. 9Meih mingh yungh guanh wuov ginv i dauh yungh dorn nzueic nyei junc nyei dorh daaih bun maa. Maa ziouc ei jienv yietc gau meih nyei die oix nyanc kuv nyei mbenc daaih bun ninh nyanc. 10Mbenc ziangx meih dorh mingh bun meih nyei die nyanc weic yiem ninh maiv gaengh daic haih buang nqa'haav laai wuov nzunc waac bun meih.”
11Yaakopv gorngv mbuox ninh nyei maa, “Maa ganh hiuv duqv nyei, Esaau cuotv biei suqv-suqv wuov. Yie maiv maaih biei, hliouv njang nyei. 12Buangh zuqc die hluo yie, ninh ziouc hiuv duqv yie nduov ninh. Ninh maiv zeiz buang waac bun yie, zungv zioux yie mv bei!”
13Ninh nyei maa gorngv, “Yie nyei dorn aac, se gorngv zuqc houv nor, se ndortv zuqc maa ganh. Kungx oix zuqc muangx maa nyei waac hnangv. Mingh zorqv yungh daaih bun maa oc.”
14Yaakopv ziouc mingh zorqv daaih bun ninh nyei maa. Ninh nyei maa ei jienv Yaakopv nyei die yietc gau oix nyanc nyei mbenc ziangx. 15Le^mbe^kaa aengx mingh zorqv ninh nyei dorn-hlo, Esaau, nyei lui-houx, dongh siou jienv wuov biauv gauh longx jiex wuov yiemc, bun ninh nyei dorn-faix, Yaakopv, zuqv jienv. 16Ninh aengx zorqv yungh dorn nyei ndopv naetv jienv Yaakopv nyei buoz caux jaang, dongh maiv maaih biei nyei dorngx. Zorng ziangx, 17Le^mbe^kaa zorqv ninh liuc leiz ziangx nyei orv caux njuov bun Yaakopv bouh mingh.
18Yaakopv mingh taux ninh nyei die wuov gorngv, “Aa die aac.”
 Ninh nyei die dau, “Dorn aac, meih dongh haaix dauh dorn?”
19Yaakopv dau, “Yie meih nyei dorn-hlo, Esaau. Yie ei die nyei waac mbenc ziangx. Die jiez sin zueiz jienv nyanc yie buonv daaih nyei orv aqv. Nyanc liuz, die duqv buang waac bun yie.”
20I^sakc naaic ninh nyei dorn, “Dorn aah! Meih fungc buonv duqv orv ndongc naaic siepv?”
 Yaakopv dau, “Ziouv, meih nyei Tin-Hungh, bun yie haih buangh orv siepv nyei.”
21I^sakc aengx gorngv mbuox Yaakopv, “Dorn aac, daaih fatv deix bun yie hluo gaax, meih za'gengh yie nyei dorn, Esaau, zeiz fai maiv zeiz.”
22Yaakopv mingh fatv nyei. Ninh nyei die, I^sakc, ziouc hluo ninh. I^sakc gorngv, “Meih nyei qiex se hnangv Yaakopv nyei qiex, mv baac meih nyei buoz haiz hnangv Esaau nyei buoz nor.” 23Ninh zieqv maiv duqv naaiv se Yaakopv weic zuqc buoz maaih biei suqv-suqv hnangv ninh nyei gorx, Esaau, nyei buoz nor. I^sakc ziouc buang waac bun ninh. 24Mv baac ninh aengx naaic nzunc, “Meih za'gengh yie nyei dorn, Esaau, fai?”
 Yaakopv dau, “Zeiz nyei.”
25I^sakc gorngv, “Dorn aac, dorh meih buonv daaih nyei orv bun die nyanc. Nyanc liuz ziouc buang waac bun meih.”
 Yaakopv ziouc dorh orv daaih bun ninh nyanc, aengx dorh a'ngunc diuv daaih bun ninh hopv.
26Nyanc liuz, hopv liuz I^sakc gorngv, “Dorn aac, daaih fatv deix zom dangh die nyei hmien.”
27Yaakopv mingh zom ninh nyei die wuov zanc, ninh nyei die hnomv zuqc Yaakopv nyei lui nyei nziaau ziouc buang waac ninh nyei dorn aqv. Ninh gorngv,
  “Yie nyei dorn ndaang nyei,
   hnangv Ziouv ceix fuqv nyei liangx-ndeic ndaang nor.
  28Tov Tin-Hungh bun mbiungc-suiv yiem wuov lungh njiec,
   yaac bun meih nyei ndau longx.
  Tov ninh yaac bun meih duqv mbiauh hmeiv caux siang-a'ngunc diuv camv.
  29Tov bun camv-fingx mienh fu-sux meih,
   yaac bun camv-norm guoqv nyei mienh gueic njiec baaix meih.
  Tov bun meih haih zoux meih nyei muoz-doic nyei ziouv,
   yaac bun meih nyei maa nyei zeiv-fun gueic njiec baaix meih.
  Haaix dauh zioux meih, tov bun wuov dauh zuqc zioux.
   Haaix dauh buang waac meih, tov bun wuov dauh duqv Ziouv ceix fuqv.”

Esaau Tov I^sakc Buang Waac

30I^sakc buang liuz waac, Yaakopv jang-jang cuotv mingh hnangv, ninh nyei gorx, Esaau, buonv duqv orv nzuonx daaih. 31Esaau ziouc zoux deix orv kuv nyei dorh mingh bun ninh nyei die nyanc. Ninh gorngv, “Aa die aah! Jiez sin zueiz jienv nyanc yie buonv daaih nyei orv aqv. Nyanc liuz, aa die duqv buang waac bun yie.”
32Ninh nyei die, I^sakc, naaic gaax, “Meih haaix dauh?”
 Esaau dau, “Yie meih nyei dorn-hlo, Esaau.”
33I^sakc liemh zeih sin zinx njuonv-njuonv nyei. Ninh gorngv, “Wuov nyungc, haaix dauh buonv orv dorh daaih bun yie? Yie koqv hoqc nyanc liuz, meih ziouc taux. Die zungv buang waac bun ninh mi'aqv. Ziux die buang nyei waac ninh yaac za'gengh duqv.” 34Esaau haiz ninh nyei die nyei waac ninh hnyouv mun haic, bungx-sing bungx-qiex nyei nyiemv jienv gorngv, “Aa die aah! Tov buang waac yie. Tov die yaac buang waac bun yie maah!”
35I^sakc dau, “Dongh yie oix buang meih nyei waac meih nyei youz daaih nduov yie buang bun ninh nzengc mi'aqv.”
36Esaau gorngv, “Ninh nyei mbuox heuc Yaakopv gengh! puix haic aqv, weic zuqc ninh nduov yie i nzunc mi'aqv. Yie zoux dorn-hlo duqv ⟨sung-gouv nyei leiz⟩ ninh nduov duqv mi'aqv. Ih zanc dongh die oix buang bun yie nyei waac ninh yaac nduov die buang bun ninh nzengc mi'aqv. Aa die aah! Meih maiv liouh yietc deix buang bun yie aqv?”
37I^sakc dau, “Die bun ninh zoux meih nyei ziouv yaac bun yietc zungv muoz-doic cien-ceqv zoux ninh nyei bou. Liemh mbiauh hmeiv caux siang-a'ngunc diuv yie bun weic yungz ninh nyei maengc. Dorn aah! Yie maaih haaix nyungc haih tengx meih?”
38Esaau qaqv tov ninh nyei die, “Aa die aah! Meih kungx maaih nduqc nyungc buang nyei waac hnangv? Tov meih yaac buang deix bun yie maah!” Ninh aengx nyiemv nzunc aqv.
39I^sakc ziouc gorngv mbuox ninh,
  “Meih zuqc yiem leih ndau-touv longx nyei dorngx go.
   Lungh nyei mbiungc-suiv meih yaac maiv duqv.
  40Meih oix zuqc kaux nzuqc ndaauv yungz maengc,
   yaac oix zuqc fu-sux meih nyei youz.
  Mv baac meih haaix zanc haih simv duqv ndutv ninh,
   meih ziouc maiv zuqc ninh gunv.”

I^sakc Heuc Yaakopv Mingh Haalaan

41Esaau nzorng haic Yaakopv laaix ninh nyei die buang waac bun Yaakopv. Ninh yiem hnyouv hnamv, “Hnamv daaih maiv lauh yie nyei die guei seix. Zuov yie mbuo nzauh nyiemv nyei ziangh hoc jiex liuz, yie oix daix Yaakopv guangc aqv.”
42Le^mbe^kaa haiz gorngv ninh nyei dorn-hlo, Esaau, daav za'eix daix dorn-faix, Yaakopv, ninh ziouc heuc Yaakopv daaih gorngv mbuox ninh, “Muangx gaax, meih nyei gorx, Esaau, daav za'eix oix jaauv win daix meih. 43Dorn aah! Muangx maa nyei waac oc. Meih oix zuqc biaux mingh Haalaan Zingh, maa nyei gorx, Laa^mbaan wuov. 44Oix zuqc caux ninh mbuo yiem douc zuov meih nyei gorx nyei ga'qiex fiu mingh, 45la'kuqv meih zoux bun ninh nyei sic, yie m'daaih bun mienh mingh dorh meih nzuonx. Maa fungc haih bun duqv yietc hnoi daic i dauh dorn?”
46Le^mbe^kaa gorngv mbuox I^sakc, “Laaix Esaau nyei i dauh Hitv^tai Mienh auv, yie maiv noic faanh ziangh aqv. Se gorngv Yaakopv aengx longc dauh naaiv norm deic-bung nyei Hitv^tai Mienh nyei sieqv zoux auv nor, yie daic gauh longx.”