30

1Laasen hiuv duqv ninh ganh maiv haih yungz gu'nguaaz bun Yaakopv, ninh ziouc mueic jieqv ninh nyei dorc. Ninh gorngv mbuox Yaakopv, “Meih bun yie duqv fu'jueiv maah! Maiv zei aeqv, yie daic aqv.”
2Yaakopv qiex jiez haic Laasen. Ninh gorngv, “Yie maiv zeiz Tin-Hungh. Tin-Hungh ganh bun meih maiv haih maaih gu'nguaaz.”
3Laasen gorngv, “Naaiv yie nyei nouh beiz, Mbin^haa. Meih gunv caux ninh bueix maah! Ninh haih yungz gu'nguaaz bun yie, yie ziouc laaix ninh duqv dauh gu'nguaaz funx yie nyei buonc.”
4Laasen ziouc bun ninh nyei nouh beiz, Mbin^haa, ninh nyei nqox longc zoux auv. Yaakopv yaac caux ninh bueix. 5Mbin^haa ziouc maaih jienv sin, yungz duqv dauh dorn bun Yaakopv. 6Laasen gorngv, “Tin-Hungh siemv liuz dingc bun yie, yaac haiz yie jouh nyei waac ziouc bun dauh dorn yie.” Laasen ziouc tengx wuov dauh dorn cuotv mbuox heuc Ndaan.
7Laasen nyei nouh beiz, Mbin^haa, aengx maaih jienv sin, yungz duqv da'nyeic dauh dorn bun Yaakopv. 8Laasen gorngv, “Yie caux yie nyei dorc nzaeng domh jaax yaac nzaeng duqv hingh.” Ninh tengx wuov dauh dorn cuotv mbuox heuc Napv^taa^li.
9Le^aa hiuv duqv ninh ganh maiv yungz gu'nguaaz aqv. Ninh ziouc bun ninh nyei nouh beiz, Sinx^baa, Yaakopv longc zoux auv. 10Sinx^baa yaac yungz duqv dauh dorn bun Yaakopv. 11Le^aa gorngv, “Yie gengh maengc longx.” Ninh ziouc tengx wuov dauh dorn cuotv mbuox heuc Gaatc.
12Le^aa nyei nouh beiz, Sinx^baa, aengx yungz duqv da'nyeic dauh dorn bun Yaakopv. 13Le^aa gorngv, “Yie njien-youh haic aqv. Zuangx m'sieqv dorn yaac oix gorngv yie njien-youh haic.” Ninh ziouc tengx wuov dauh dorn cuotv mbuox heuc Aa^se.
14Gaatv mbiauh witv nyei ziangh hoc, Lu^mben mingh saau wuov ndeic, buatc zungh ndu^ndaa^im jieh. Ninh ziouc dorh daaih bun ninh nyei maa Le^aa. Laasen gorngv mbuox ninh nyei dorc, “Tov bun deix dorc nyei dorn nyei ndu^ndaa^im jieh yie maah!”
15Le^aa dau, “Yie nyei nqox meih zungv nzaeng mingh aqv. Corc maiv gaengh gaux? Meih aengx oix nzaeng yie nyei dorn nyei ndu^ndaa^im jieh?”
 Laasen gorngv, “Meih bun deix meih nyei dorn nyei ndu^ndaa^im jieh yie nor, ih muonz yie bun Yaakopv caux meih bueix.”
16Hmuangx deix, Yaakopv yiem ndeic nzuonx, Le^aa mingh zipv. Ninh gorngv, “Ih muonz meih oix zuqc caux yie bueix. Yie dorh yie nyei dorn nyei ndu^ndaa^im jieh yienc meih mi'aqv.” Wuov muonz Yaakopv ziouc caux Le^aa bueix.
17Tin-Hungh dau Le^aa jouh ninh nyei waac. Le^aa aengx maaih jienv sin, yungz duqv da'hmz dauh dorn bun Yaakopv. 18Le^aa gorngv, “Weic zuqc yie bun yie nyei nouh beiz yie nyei nqox longc, Tin-Hungh bun zingh nyeic yie.” Ninh cuotv wuov dauh dorn nyei mbuox heuc Itc^saax^kaa.
19Le^aa aengx maaih jienv sin, yungz duqv da'luoqc dauh dorn bun Yaakopv. 20Le^aa gorngv, “Tin-Hungh bun longx haic nyei zingh nyeic yie. Ih zanc yie nyei nqox ndongc haaix yaac oix taaih yie weic zuqc yie yungz duqv juqv dauh dorn bun ninh.” Ninh cuotv ninh nyei dorn nyei mbuox heuc Se^mbu^lun.
21Nqa'haav Le^aa aengx yungz duqv dauh sieqv yaac cuotv mbuox heuc Ndinaa.
22Zoux gau, Tin-Hungh jangx taux Laasen, aengx dau ninh jouh nyei waac, bun ninh haih maaih gu'nguaaz. 23Ninh ziouc maaih jienv sin, yungz duqv dauh dorn. Ninh gorngv, “Tin-Hungh bun dauh dorn yie, tengx yie buang hmien, maiv zuqc diev nyaiv. 24Tov Tin-Hungh aengx bun dauh dorn yie.” Ninh ziouc cuotv mbuox heuc Yosepv.

Yaakopv Caux Laa^mbaan Gorngv Gong-Zinh

25Laasen duqv liuz Yosepv, nqa'haav Yaakopv gorngv mbuox ninh nyei ong-daa, Laa^mbaan, “Tov bun yie nzuonx yie nyei buonv-deic dorngx aqv oc. 26Die hiuv duqv yie daaih tengx meih zoux gong bietv ndutv yie nyei auv-jueiv mi'aqv. Tov bun yie dorh jienv nzuonx aqv.”
27Mv baac Laa^mbaan gorngv, “Se gorngv meih buangv hnyouv, tov aengx caux yie yiem. Yie samx duqv cuotv, hiuv duqv se weic meih, Ziouv cingx ceix fuqv bun yie. 28Meih nyei gong-zinh oix longc mbu'ziex gunv gorngv mbuox yie maah! Yie ziouc bun.”
29Yaakopv dau ninh nyei ong-daa, “Die hiuv duqv yie zoux nyei gong ndongc haaix longx, yaac hiuv duqv meih nyei saeng-kuv ndongc haaix camv. 30Yie maiv gaengh daaih nyei ziangh hoc, die maaih deix baav hnangv. Ih zanc maaih camv haic aqv. Yie zoux taux haaix, Ziouv ceix fuqv bun meih. Mv baac taux haaix zanc yie cingx liepc duqv yie nyei jaa-dingh?”
31Laa^mbaan naaic gaax ninh, “Wuov nyungc, yie oix zuqc bun haaix nyungc meih?”
 Yaakopv dau, “Die maiv zuqc bun haaix nyungc yie. Se gorngv die oix hnangv naaiv nor tengx yie, yie aengx goux jienv meih nyei ba'gi yungh caux yungh guanh mingh.
32Ih hnoi yie oix mingh dimv mangc meih nyei yietc zungv ba'gi yungh caux yungh guanh. Da'faanh ba'gi yungh maaih diemv cou, diemv muonc nyei, caux ba'gi yungh dorn jieqv, caux dauh dauh yungh maaih diemv cou fai diemv muonc nyei, yie longc zoux yie nyei gong-zinh. 33Hnangv naaiv nor, nqa'haav hingv yie zoux hnyouv zaqc fai maiv zaqc, die ziouc hiuv nyei. Haaix zanc mingh mangc yie nyei gong-zinh, buatc haaix dauh yungh maiv ben yaac maiv maaih diemv, fai buatc haaix dauh ba'gi yungh dorn maiv jieqv nor, ziouc hiuv duqv yie pinx daaih aqv.”
34Laa^mbaan dau, “Longx aqv. Hnangv meih gorngv nor zoux.” 35Dongh wuov hnoi Laa^mbaan mingh dimv mangc ninh nyei yungh. Yungh gouv ben nyei, maaih diemv nyei, ninh ginv cuotv. Yungh nyeiz maaih diemv cou diemv muonc caux dauh dauh maaih baeqc zorpc jienv, caux yietc zungv ba'gi yungh dorn jieqv ninh yaac ginv cuotv. Naaiv deix yietc zungv ninh jiu bun ninh ganh nyei dorn mbuo goux, 36yaac horngh jienv mingh leih Yaakopv buo hnoi nyei jauv. Yaakopv aeqv, corc goux jienv Laa^mbaan zengc njiec nyei ba'gi yungh caux yungh guanh.
37Yaakopv mingh jamv borpc^laah, an^man caux pa'len ndiangx-nquaah nyiemz daaih nqenx qongx nqaeqv qongx ndiangx-ndopv guangc, bun ndiangx-orv cuotv daaih baeqc nyei, ben nyei. 38Ninh ziouc dorh naaiv deix zoux ben nyei ndiangx-nquaah an jienv saeng-kuv nyei nza'hmien, wuom-zoh gu'nyuoz. Saeng-kuv saeng nyei ziangh hoc daaih hopv wuom, 39ninh mbuo ziouc yiem naaiv deix ndiangx nyei nza'hmien maengx daapv zuangv. Ninh mbuo yaac njiec dorn ben nyei, maaih diemv cou fai diemv muonc nyei. 40Yaakopv zorqv yungh caux ba'gi yungh dorn bun nqoi ganh ca'lengc an norm dorngx. Ba'gi yungh caux yungh ninh bun hungx mingh Laa^mbaan nyei ba'gi yungh jieqv caux ben wuov bung. Ninh hnangv naaiv nor zoux bun ganh nyei ba'gi yungh hiaangx. Ninh nyei buonc yungh caux ba'gi yungh ganh ca'lengc an norm dorngx, maiv bun zorpc Laa^mbaan nyei. 41Haaix zanc henv nyei wuov deix saeng-kuv daapv zuangv ninh zorqv wuov deix ndiangx-nquaah don jienv nza'hmien maengx, wuom-zoh gu'nyuoz. Ninh mbuo yiem naaiv deix ndiangx nyei ga'hlen daapv zuangv, 42mv baac maiv henv wuov deix daapv zuangv ninh maiv zorqv naaiv deix ndiangx-nquaah don nza'hmien maengx. Hnangv naaic, maiv henv wuov deix benx Laa^mbaan nyei. Henv wuov deix benx nzengc Yaakopv nyei. 43Yaakopv gunv zoux gunv butv zoih. Maaih yungh, maaih ba'gi yungh, maaih nouh gauv nouh beiz, maaih lorh torh, maaih lorh. Nyungc-nyungc zungv maaih camv.