34

Yiem Sekem Zingh Cuotv Nyei Sic

1Yaakopv caux Le^aa maaih dauh sieqv, mbuox heuc Ndinaa. Maaih hnoi Ndinaa cuotv mingh caux wuov norm dorngx nyei m'sieqv dorn nziaauc. 2Gunv wuov norm dorngx nyei Hiwai Mienh, Haamo nyei dorn, Sekem, buatc Ndinaa ziouc nyau jienv ninh caa. 3Ninh haiz hnamv naaiv dauh sieqv, Ndinaa, ziouc caux Ndinaa gorngv longx, oix nduov naaiv dauh sieqv hnamv ninh. 4Sekem mbuox ninh nyei die, Haamo, “Tov die mingh tengx yie gorngv naaiv dauh sieqv oc.”
5Yaakopv hiuv duqv Sekem zoux bun ninh nyei sieqv nyei mengh dauh waaic mv baac Yaakopv maiv gaengh gorngv haaix nyungc weic zuqc ninh nyei dorn mbuo yiem wuov naah bungx saeng-kuv. Ninh zuov jienv ninh nyei dorn mbuo nzuonx.
6Sekem nyei die, Haamo, cuotv mingh caux Yaakopv caangh laangh. 7Yaakopv nyei dorn mbuo yiem wuov naah yietv haiz naaiv deix sic ninh mbuo ziouc nzuonx daaih. Ninh mbuo haiz hnyouv waaic nzengc, qiex jiez haic Sekem hnangv naaiv nor zoux doqc caa Yaakopv nyei sieqv. Se maiv horpc zuqc zoux nyei sic yaac mangc piex haic ninh mbuo I^saa^laa^en Mienh.
8Haamo gorngv mbuox Yaakopv mbuo dorn-diex doic, “Yie nyei dorn, Sekem, hnamv haic naaiv dauh sieqv. Tov meih mbuo bun naaiv dauh sieqv yie nyei dorn longc zoux auv. 9Yiem naaiv mingh mbuo lomh nzoih jiu tong. Bungx meih mbuo nyei sieqv bun yie mbuo nyei dorn longc, yaac dorh yie mbuo nyei sieqv bun meih mbuo nyei dorn longc. 10Hnangv naaiv meih mbuo haih caux yie mbuo juangc deic-bung yiem. Meih mbuo oix yiem haaix norm dorngx, gunv yiem duqv nyei, aengx lorz ndau liepc ganh nyei nguaaz-gorn, bieqc cuotv zoux saeng-eix.”
11Sekem yaac gorngv mbuox Ndinaa nyei die caux ninh nyei gorx mbuo, “Tov meih mbuo nqoi fim nqoi eix yie. Meih mbuo oix longc haaix nyungc yie ziouc bun. 12Oix longc leiz-ging caux zingh nyeic mbu'ziex gunv gorngv maah! Meih mbuo oix longc haaix nyungc mbu'ziex yie bun nzengc, da'faanh duqv meih mbuo nyei sieqv hnangv.”
13Laaix Sekem zoux waaic ninh mbuo nyei muoc, Ndinaa, nyei mengh dauh, Yaakopv nyei dorn mbuo nduov Sekem caux ninh nyei die, Haamo. 14Ninh mbuo gorngv, “Yie mbuo maiv haih bungx yie mbuo nyei muoc bun maiv ⟨jiex gaatv nyei leiz⟩ nyei mienh longc. Hnangv naaiv zoux, yie mbuo nyei mengh dauh waaic nzengc aqv. 15Yie mbuo maaih nduqc diuh leiz hnangv cingx haih laengz bun, se meih mbuo dauh dauh m'jangc dorn oix zuqc hnangv yie mbuo nor, jiex gaatv nyei leiz nzengc. 16Hnangv naaic yie mbuo ziouc haih bungx yie mbuo nyei sieqv bun meih mbuo, yaac dorh meih mbuo nyei sieqv daaih longc zoux auv. Yie mbuo yaac haih caux meih mbuo juangc deic-bung yiem. 17Mv baac se gorngv meih mbuo maiv muangx yie mbuo, maiv jiex gaatv nyei leiz nzengc, yie mbuo dorh yie mbuo nyei muoc biaux aqv.”
18Haamo caux ninh nyei dorn, Sekem, haiz naaiv deix waac horpc hnyouv nyei. 19Wuov dauh dorn ziouc maiv ngaih, ei jienv Yaakopv nyei dorn mbuo nyei waac gaanv jienv zoux, weic zuqc ninh hnamv haic Yaakopv nyei sieqv. Ninh mbuo yietc zungv muoz-doic se Sekem zoux gauh hlo jiex. 20Haamo caux ninh nyei dorn, Sekem, ziouc mingh zingh gaengh ndaangc caux yietc norm zingh nyei gorx-youz gorngv. 21Ninh mbuo gorngv, “Naaiv deix mienh caux mbuo zoux gorx-youz doic. Mbuo oix zuqc bun ninh mbuo caux mbuo juangc deic-bung yiem, bieqc cuotv maaiz maaic. Mbuo nyei deic-bung jangv nyei, gaux duqv bun ninh mbuo yiem nyei. Mbuo yaac haih longc ninh mbuo nyei sieqv. Ninh mbuo yaac haih longc mbuo nyei sieqv. 22Naaiv deix mienh a'hneiv caux mbuo juangc deic-bung yiem, benx yietc fingx, mv baac maaih yietc diuc ninh mbuo cingx daaih laengz, se mbuo dauh dauh m'jangc dorn oix zuqc hnangv ninh mbuo nor, jiex gaatv nyei leiz. 23Ninh mbuo nyei saeng-kuv, ninh mbuo maaih nyei nyungc-nyungc ga'naaiv ziouc benx mbuo nyei maiv zeiz? Tov bun mbuo hnangv naaiv nor zoux. Ninh mbuo ziouc caux mbuo yiem naaiv aqv.”
24Wuov norm zingh nyei yietc zuangx gorx-youz buangv hnyouv Haamo caux Sekem nyei waac. Zingh gu'nyuoz nyei yietc zungv m'jangc dorn ziouc jiex gaatv nyei leiz nzengc.
25Jiex liuz gaatv nyei leiz da'faam hnoi wuov hnoi, wuov deix m'jangc dorn corc mun jienv nyei. I dauh Yaakopv nyei dorn, Ndinaa nyei gorx, Si^me^on caux Lewi, buix jienv nzuqc ndaauv bieqc zingh, liemh maiv maaih haaix dauh gouv nyeih. Ninh mbuo ziouc bieqc mingh daix nzengc wuov norm zingh nyei m'jangc dorn. 26Liemh Haamo caux Sekem i dorn-diex, ninh mbuo yaac daix guangc mi'aqv. Yaac dorh Ndinaa yiem Sekem nyei biauv cuotv mingh mi'aqv. 27Yaakopv nyei dorn mbuo bieqc naaiv deix zuqc daix daic nyei mienh nyei biauv, luv nzengc wuov norm zingh, laaix wuov norm zingh nyei mienh zoux bun ninh mbuo nyei muoc nyei mengh dauh waaic. 28Ninh mbuo zorqv ba'gi yungh, yungh, ngongh, lorh, yietc zungv ga'naaiv. Maiv gunv yiem zingh fai yiem ndeic, ninh mbuo zorqv nzengc mi'aqv. 29Haaix nyungc maaih jaax-zinh nyei ga'naaiv ninh mbuo yaac zorqv nzengc. Liemh m'sieqv dorn, liemh fu'jueiv yaac dorh jienv mingh. Liemh ninh mbuo nyei jaa-dingh yaac luv njang nzengc mi'aqv.
30Yaakopv mbuox Si^me^on caux Lewi, “Meih mbuo hnangv naaiv nor zoux oix bun yie zuqc sic, zuqc Kaa^naa^an Mienh, Be^litv^si Mienh caux yietc zungv yiem naaiv norm deic-bung nyei mienh nzorng yie aqv. Mbuo yaac maiv maaih mienh camv. Se gorngv wuov deix mienh gapv qaqv daaih mborqv yie nor, yie caux yie nyei biauv zong mienh ziouc zuqc mietc nzengc.”
31Ninh nyei dorn mbuo dau, “Yie mbuo maiv bun ninh zoux bun yie mbuo nyei muoc dorngx maaic buonv-sin nyei m'sieqv dorn.”