45

Y-Yôsep Ăn Phung Oh Nâu Gĭt Năl Păng

1Rnôk nay Y-Yôsep mâu hôm dơi nkân păng nơm ôh ta năp lĕ rngôch phung gŭ dăch păng, jêh ri păng nter: "Ăn lĕ rngôch bunuyh du luh?" Pô ri mâu hôm geh du huê bunuyh gŭ ndrel ma păng ôh, dôl Y-Yôsep ăn phung oh nâu păng gĭt năl păng. 2Păng nhĭm huy phung Êjipt jêh ri ngih Pharaôn tăng lĕ. 3Y-Yôsep lah ma phung oh nâu păng: "Gâp jêng Y-Yôsep. Mbơ̆ gâp hôm rêh lĕ?" Ƀiălah phung oh nâu păng mâu dơi plơ̆ lah ma păng ôh, yorlah khân păng klach ta năp Y-Yôsep.
4Y-Yôsep lah ma phung oh nâu păng: "Văch dăch ta gâp, gâp dăn ma khân may." Phung oh nâu păng hăn dăch jêh ri păng lah: "Gâp jêng Y-Yôsep, oh khân may, nơm khân may tăch jêh tâm n'gor Êjipt. 5Aƀaơ aơ, lơi khân may rngot, mâu lĕ dơi nuih ma khân may nơm, yorlah khân may tăch jêh gâp ta aơ; yorlah Brah Ndu njuăl jêh gâp văch lor ma khân may gay tâm rklaih nau rêh. 6Yorlah dôl bar năm jêh geh nau sa sât ji ngot tâm n'gor, jêh ri hôm prăm năm mâu mra geh ôh nau kah jik tuch mâu lah kăch roih. 7Brah Ndu njuăl gâp văch lor ma khân may gay prăp phung kon sau khân may tâm neh ntu, jêh ri gay prăp nau rêh khân may. 8Pô ri mâu geh khân may ôh njuăl gâp văch ta aơ, ƀiălah Brah Ndu yơh păng ăn gâp jêng mbơ̆ ma Pharaôn jêh ri kôranh ma lĕ ngih păng jêh ri kôranh chiă uănh lĕ n'gor Êjipt. 9Ndal hom khân may, sĭt ta mbơ̆ gâp jêh ri lah ma păng pô aơ: "Kon may Y-Yôsep ngơi, Brah Ndu ăn gâp jêng Kôranh ma lĕ n'gor Êjipt. Văch hom ta gâp, lơi hôm gŭ kâp ôh. 10May mra gŭ tâm n'gor Gôsen, jêh ri may mra gŭ dăch gâp, may phung kon may, phung kon sau may, biăp may, ndrôk may, jêh ri lĕ rngôch ndơ may geh. 11Ta nây gâp mra siăm may, yorlah hôm prăm năm sa sât ji ngot, klach lah may jêh ri ngih may jêh ri lĕ rngôch ndơ may geh tât ma nau rêh ni." 12Aơ, măt khân may saơ, jêh ri măt Y-Bênjamin saơ lĕ ma bâr mbung gâp nơm ngơi ma khân may. 13ăn khân may nkoch bri ma mbơ̆ gâp lĕ nau chrêk rmah gâp tâm n'gor Êjipt, jêh ri lĕ nau khân may saơ jêh. Gơnh oi khân may ăn mbơ̆ gâp jŭr ta aơ." 14Jêh ri păng ut ta trôko Y-Bênjamin oh păng jêh ri nhĭm. Y-Bênjamin tâm ban lĕ nhĭm ta trôko păng. 15Păng chŭm lĕ rngôch phung oh nâu păng jêh ri nhĭm. Jêh nau nây phung oh nâu păng ngơi ndrel đah păng.
16Tơ lah bu tăng tâm ngih Pharaôn, phung oh nâu Y-Yôsep tât jêh." Nau nây maak ngăn ma Pharaôn jêh ri ma phung n'hat na păng. 17Pharaôn lah ma Y-Yôsep: "Lah ma phung oh nâu may: 'Ƀư nau aơ rdeng seh bri khân may, plơ̆ sĭt hom ta n'gor Kanaan. 18ăn khân may sŏk mbơ̆ khân may jêh ri phung ngih khân may, jêh ri plơ̆ văch ta gâp. Gâp mra ăn ma khân may ndơ ueh lơn tâm n'gor Êjipt, jêh ri khân may sa play ueh lơn tâm n'gor.' 19Tâm ban lĕ, ntăm ma khân păng: 'ăn khân may ƀư pô aơ, sŏk tă bơh n'gor Êjipt ndeh seh gay ma rdeng kon jê̆ khân may jêh ri ur khân may. Njŭn leo mbơ̆ khân may jêh ri plơ̆ văch. 20Lơi hôm rvê ma drăp ndơ khân may ôh, yorlah ndơ ueh lơn tâm lĕ n'gor Êjipt jêng ndơ khân may." 21Phung kon bu klâu Israel ƀư pô nây. Y-Yôsep ăn ma khân păng ndeh seh tĭng nâm nau Pharaôn ntăm jêh, păng lŏ ăn ndơ ma phung nây sông sa rŏ trong. 22Y-Yôsep ăn ma khân păng bok ao tơh; ƀiălah ma Y-Bênjamin păng ăn pe rhiăng rlay prăk jêh ri prăm blah bok ao tơh. 23Păng njuăl ma mbơ̆ păng ndơ aơ, Jât mlâm seh rdeng ndơ ueh bơh n'gor Êjipt, jêh ri jât mlâm seh bri me rdeng ba, piăng let jêh ri ndơ sông sa ma mbơ̆ păng rŏ trong. 24Pô ri păng njuăl hăn phung oh nâu păng, jêh ri tơ lah khân păng hăn, păng lah: "Lơi ta khân may tâm lah tâm djel rŏ trong ôh." 25Pô ri khân păng luh bơh n'gor Êjipt jêh ri tât ta n'gor Kanaan ma Y-Yakôb mbơ̆ khân păng. 26Khân păng mbơh ma mbơ̆ khân păng: "Y-Yôsep ăt hôm rêh, jêh ri păng jêng Kôranh chiă uănh lĕ n'gor Êjipt." Nuih n'hâm Y-Yakôb khĭt huăr, yorlah păng mâu đing ôh nau phung kon bu klâu păng mbơh. 27Ƀiălah tơ lah phung kon păng nkoch lĕ nau Y-Yôsep ngơi jêh ma khân păng, jêh ri tơ lah păng saơ ndeh seh Y-Yôsep njuăl gay ma rdeng păng, huêng Y-Yakôb mbơ̆ khân păng plơ̆ kah gĭt. 28Jêh ri Y-Yakôb lah: "Găp jêh! Y-Yakôb kon bu klâu gâp hôm rêh. Gâp mra hăn tâm mâp ma păng lor ma gâp khĭt."