3

Nau Tih Jêh Ri Nau Tâm Chuai Ƀon Yêrusalem

1Rêh ni ngăn ma ƀon tâm rdâng, jêh ri ƀơ̆ ƀơch, ƀư nau tŭn jot! 2Păng mâu tông bar bu ôh; păng mâu dơn nau bu lah nti păng. Păng mâu rnơm ma Yêhôva ôh, păng mâu hăn dăch Brah Ndu păng ôh. 3Phung kôranh ta nklang păng nâm bu yau mŭr dôl ngrông; phung kôranh phat dôih păng jêng so bri rsong măng mâu têm om ôh tât kêng ôi taơ. 4Phung kôranh nơm mbơh lor, păng ƀư tĭng nâm khân păng ŭch, jêh ri ƀư ma nau ndơm; phung kôranh ƀư brah păng ƀư ƀơ̆ ntŭk kloh ueh, jêh ri ƀư rlau nau vay.
5Yêhôva ta nklang păng jêng sŏng, mâu ƀư nau djơh ôh; ăp ôi păng mpơl nau sŏng păng ta nklang nau ang, mâu blâu lôch ôh; ƀiălah bunuyh kue mâu gĭt prêng ôh.
6Gâp hŏ ƀư rai jêh phung ntil mpôl bunuyh; vâl tŭm khân păng ta pôih njônh ƀon lah jêng vâl rŭng. Gâp ƀư jêh ntŭk rgum tăch ndơ lah jêng rngol, kŏ tât mâu geh ôh bunuyh hăn rgăn ta nây. Ƀon păng lah roh rai, mâu hôm geh du huê bunuyh, jêh ri kŏ mâu geh lĕ bunuyh gŭ ta nây. 7Gâp lah ma ƀon nây: nanê̆ ngăn, may kanŏng klach yơk ma gâp, dơn nau bu lah nti, pôri ntŭk păng gŭ mâu geh trơn ôh. Ƀiălah khân păng sŏl ko, ŭch ƀư nau kan mhĭk khân păng nơm.
8Yor nây, Yêhôva lah: Ăn khân may gŭ kâp gâp tât, kŏ tât nar gâp mra dâk mbơh ngăn; yorlah gâp ŭch mĭn gay sŏk rgum mpôl băl bunuyh jêh ri tâm rgum lĕ yorlah lĕ bri dak, gay gâp nkhŭt ma khân păng nau gâp nuih jêh ri lĕ nau gâp duh nuih, yorlah lĕ rngôch bri dak mra rai lôch.
9Yorlah rnôk nây gâp mra ăn kloh trôm mbung phung ƀon lan, gay ăn lĕ rngôch khân păng kuăl amoh Yêhôva, jêh ri pah kan du ai ma păng. 10Phung yơk mbah ma gâp, nâm bu ntĭt kon bu ur gâp hiơt gŭ kơh đah ri dak krong Êthiôpi, mra leo ndơ nhhơr djôt ma gâp.
11Tâm nar nây, may mâu mra bêk prêng ma bu ôh; yor lĕ nau may ƀư tih jêh ma gâp; yorlah rnôk nây gâp sŏk lơi tă bơh phung răm maak ma nau khân păng sưr ir ta nklang khân păng; ntơm aƀaơ tât kăn dơ̆ khân păng mâu hôm sưr đŏng ôh ta kalơ yôk kloh ueh gâp. 12Ƀiălah gâp mra lơi ta nklang may phung gĭt dêh-rhêt jêh ri rah rơch, phung blau nsing ma amoh Yêhôva. 13Phung hôm e tâm n' gor Irael, mâu mra ƀư du ntil nau tih ôh, jêh ri mâu mra ngơi mƀruh ôh; mâu lĕ geh nau ngơi ndơm bơh mpiăt khân păng, yorlah khân păng mra sông sa jêh ri bêch rlu, jêh ri mâu geh ôh bunuyh ƀư nkrit khân păng.
14Hơi kon bu ur Siôn, mprơ huy hôm! Hơi Israel, nter bâr ngơi huy! Hơi kon bu ur ƀon Yêrusalem! Răm jêh ri răm rhơn hom ma lĕ nuih n' hâm ay, 15Yêhôva hŏ chalơi jêh nau phat dôih ay, nsot phung rlăng du ngai ma ay; Hađăch Israel, jêng Yêhôva, gŭ ta nklang may, may mâu mra mâp nau mhĭk đŏng ôh.
16Tâm nar nây, bu mra lah ma ƀon Yêrusalem pô aơ: Hơi Siôn, lơi klach ôh, lơi ăn ti may jêng ra ai ôh!
17Yêhôva Brah Ndu may gŭ ta nklang may; Păng jêng nơm geh nau brah dơi tâm rklaih may; păng mra rhơn răm ngăn yor ma may, yor nuih n'hâm păng rŏng mpơl ma may. Jêh ri yor ma may păng mra mprơ ma nau rhơn răm.
18"Gâp mra sŏk rgum phung dôl geh nau rngot, yor nhêt sa toyh; khân păng luh tă bơh may, dơn nau nduyh ƀư prêng jêh ri anh jâk.
19Aơ, tâm rnôk nây, gâp mra ƀư rai lĕ rngôch phung ƀư nau rngot ma may, gâp mra tâm rklaih phung kuet rvĕn, jêh ri rgum sĭt phung tă mprơh du, gay ăn khân păng nau tâm rnê jêh ri nau lư n'găr tâm ăp n'gor bri bu hŏ ƀư bêk prêng jêh khân păng.
20Tâm rnôk nây, gâp mra djôt leo khân may plơ̆ sĭt, tâm rnôk nây gâp mra tâm rgum ndrel đŏng khân may, yorlah gâp mra ăn khân may jêng lư n'găr jêh ri geh nau tâm rnê ta nklang lĕ rngôch phung ƀon lan tâm neh ntu, tơlah gâp leo sĭt phung tă ƀư bună ta năp măt khân may," Yêhôva lah nau nây.