Nau mbơh sơm du huê nơm rdja nuih n'hâm jêh ri păng tâm mpơl nau păng nđêng rngot ta năp Yêhôva
 ¹Ơ Yêhôva, iăt hom nau gâp mbơh sơm,
 Jêh ri ăn nau gâp nter hao tât ta may.
 ²Lơi pôn muh măt may ma gâp ôh, dôl nar gâp geh nau rêh ni;
 Rkêng tôr may ma gâp; Tơ lah gâp nter may plơ̆ lah ma gâp ăn gơnh.
 ³Yorlah nar gâp roh, du nâm bu nhhuk ŭnh.
 Jêh ri nting gâp rai nâm bu ŭnh sa sa-ônh.
 ⁴Nuih n'hâm gâp bu dong, jêh ri jêng kro nâm bu gơ̆;
 Kŏ gâp chuêl sa kapŭng gâp.
 ⁵Yor bâr gâp nđêng. Nting gâp krăp đah nglay gâp.
 ⁶Gâp jêng nâm bu sĭm djrăch djrao tâm ndrĭch rdah.
 Gâp jêng nâm bu klang kô tâm bri hŏng.
 ⁷Gâp rngeh, jêh ri gâp jêng nâm bu du mlâm sĭm srai.
 Gŭ êng ta chor bôk pho.
 ⁸Lĕ nar phung rlăng đah gâp suai rak ma gâp;
 Jêh ri phung nuih ma gâp, dŏng amoh gâp rtăp rak.
 ⁹Yorlah gâp sa jêh buh nâm bu kapŭng.
 Jêh ri gâp lŭk lai dak, gâp nhêt ndrel ma dak măt.
 ¹⁰Yorlah nau may ji nuih jêh ri khek;
 Yor may rƀiah nhŭp gâp, jêh ri mƀăr gâp ngai.
 ¹¹Nar gâp jêng nâm bu gui dăch roh;
 Jêh ri gâp kro jêh nâm bu gơ̆.
 ¹²Ƀiă lah may, Ơ Yêhôva, mra gŭ n'ho ro;
 Jêh ri nau kah gĭt ma may tâm lĕ rngôch rnôk.
 ¹³May mra dâk, jêh ri may yô̆ ma ƀon Siôn;
 Yorlah tât jêh nar yô̆ ma păng, nanê̆, nar tâm nal tât jêh.
 ¹⁴Yorlah phung oh mon may rŏng ma lŭ păng,
 Khân păng yô̆ ma ndruyh neh păng.
 ¹⁵Pô ri phung mpôl băl mra klach yơk mbah ma amoh Yêhôva,
 Lĕ rngôch phung hađăch ta neh ntu, mra klach yơk mbah ma nau chrêk rmah may.
 ¹⁶Yorlah Yêhôva rdâk jêh ƀon Siôn,
 Păng tâm mpơl jêh tâm nau chrêk rmah Păng.
 ¹⁷Păng kâp iăt jêh nau phung rêh ni mbơh sơm,
 Păng mâu tâm rmot ma nau bu mbơh sơm ôh.
 ¹⁸Nau nây bu mra chih tâm rnôk kandơ̆;
 Jêh ri phung ƀon lan bu mra rhăk njêng pakơi, mra tâm rnê ma Yêhôva.
 ¹⁹Yorlah Yêhôva uănh jêh tâm dâng bơh ngih kloh ueh Păng kalơ;
 Bơh trôk Yêhôva uănh ta neh ntu;
 ²⁰Ŭch iăt nau phung bu nă nđêng;
 Gay ma klaih phung bu jao jêh ma nau khĭt;
 ²¹Gay ma phung bunuyh mbơh amoh Yêhôva tâm ƀon Siôn,
 Jêh ri nau tâm rnê Păng tâm ƀon Yêrusalem;
 ²²Tơ lah lĕ rngôch phung ƀon lan tâm rƀŭn,
 Jêh ri phung ƀon bri hađăch, gay pah kan ma Yêhôva.
 ²³Brah Ndu ƀư rdja jêh nau katang gâp ta trong;
 Păng ƀư gleh n'hŭch lơi nar gâp.
 ²⁴Gâp lah, Ơ Brah Ndu gâp, lơi sŏk gâp ta n'gul nar gâp ôh;
 Năm may gŭ tâm lĕ rngôch rnôk.
 ²⁵Kăl e may rhăk njêng jêh neh ntu;
 Jêh ri trôk jêng kan ti may nơm.
 ²⁶Khân păng mra rai lôch, ƀiă lah may ăt hôm;
 Nanê̆ khân păng mra mŭnh lĕ nâm bu bok ao; may mra tâm rgâl khân păng nâm bu du b lah ao,
 Jêh ri khân păng mra tâm rgâl;
 ²⁷Ƀiă lah may ăt hôm tâm ban,
 Jêh ri năm may mâu mra lĕ ôh.
 ²⁸Phung kon phung oh mon may mra gŭ hôm nâp,
 Jêh ri phung kon sau khân păng gŭ rjăp ta năp may.