103

Nau Tâm Rnê Yor Nau Yô̆ Yêhôva

 Nau mprơ ơm Y-David
1Ơ huêng gâp tâm rnê hom ma Kôranh Brah;
 Lĕ săk jăn nuih n'hâm gâp tâm rnê yơk mbah ma amoh Păng.
2Ơ huêng gâp tâm rnê hom ma Kôranh Brah;
 Lơi dĭng chuêl ôh du ntil nau ueh Păng ăn.
3Păng yơh yô̆ an lĕ nau tih gâp.
 Păng ƀư bah lĕ nau ji kuet gâp.
4Păng yơh tâm rklaih gâp tă bơh trôm môch,
 Păng yô̆, Păng rŏng ma gâp hâu ngăn.
5Păng n'hơm ko gâp ma ndơ kah,
 Gay ăn gâp văch n'hâm suan dăng katang nâm bu klang.
6Yêhôva ƀư nau sŏng, Păng ƀư nau di ma lĕ rngôch phung bu tŭn jot.
7Păng tâm mpơl jêh trong Păng ma Y-Môise.
 Kan Păng ma phung kon Israel.
8Kôranh Brah yô̆ jêh ri rŏng ma he, Păng mâu gơnh nuih ôh.
9Păng mâu ir nduyh he ƀaƀơ ôh,
 Mâu lĕ Păng nđom jŏ n'ho ro, nau Păng ji nuih ma he
10Păng mâu tâm rmal he ôh, tĭng nâm nau tih he ƀư,
 Mâu lĕ Păng mplơ̆ tĭng nâm nau tih, nau kue he.
11Nau Păng rŏng ma mbu nâm yơk ma Păng jêng toyh ngăn,
 Prêh nâm bu trôk đah neh.
12Păng sŏk nkhah lơi nau tih đah he, ngai nâm bu dâng đah lơ.
13Păng yô̆ ma mbu nâm yơk ma Păng, nâm bu mbơ̆ yô̆ ma kon.
14Yorlah Păng gĭt mbă ndơ bu njêng he,
 Păng kah gĭt he jêng ndruyh neh.
15Nau rêh kon bunuyh gơnh dŭt tâm ban ma gơ̆,
 Păng hon rêh ƀât lât dơm, tâm ban ma kao si tâm bri.
16lah sial khôm du tong, păng mpăr roh hêng, bu mâu hôm saơ păng ôh,
17Ƀiălah Kôranh Brah hôm rŏng ƀaƀơ mbu nâm yơk ma Păng,
 Păng ăn nau ueh ƀa ƀơ tât sau tât se.
18Păng rŏng ma mbu nâm ƀư di tĭng nâm nau Păng tâm nkol,
 Jêh ri ma phung kah gĭt tông nanê̆ lĕ nau Păng đă.
19Yêhôva rdâk jêh sưng hađăch Păng tâm trôk;
 Jêh ri ƀon bri hđăch Păng chiă uănh lĕ rngôch ndơ.
20Mât ton hom ma Yêhôva, khân may phung oh mon ueh Păng,
 Phung jêng brah tâm nau katang, gay ma nanê̆ nau nau Păng ngơi.
 Phung gŭ iăt bâr Păng ngơi.
21Mât ton hom ma Yêhôva, lĕ rngôch khân may phung kahan Păng,
 Phung khân may pah kan ma Păng, jêh ri ƀư nau Păng ŭch.
22Mât ton hom ma Yêhôva, lĕ rngôch khân may jêng kan Păng,
 Tâm lĕ rngôch ntŭk Păng chiă uănh;
 Ơ huêng gâp, mât ton hom ma Yêhôva.