108
Thov Vaajtswv paab tiv cov yeeb ncuab
(Nt.Nk. 57:7-11; Nt.Nk. 60:5-12)
Tavi zaaj nkauj. Yog zaaj nkauj hu.
1Au Vaajtswv, kuv lub sab nyob ruaj khov,
kuv lub sab ruaj khov tag.
Kuv yuav hu nkauj,
kuv lub sab yuav seev suab hu nkauj.
2Nkauj nog ncaas luj
hab nkauj nog ncaas miv 'e,
ca le tswm dheev,
kuv yuav tsaa kuas
kaaj ntug tswm dheev.
3Au Yawmsaub, kuv yuav ua koj tsaug
rua huv ib tsoom tuabneeg,
kuv yuav hu nkauj qhuas koj
rua huv ib tsoom tebchaws.
4Vem yog koj txujkev hlub kws ruaj khov
sab dhau qaum ntuj,
hab koj txujkev ncaaj kws tso sab tau
sab moog txug cov fuab.
5Au Vaajtswv thov ca koj raug txhawb nqaa
sab dhau lub ntuj,
thov koj tug fwjchim kws ci ntsaa ab
nthuav thoob plawg nplajteb.
6Thov koj txhais teg xws paab
hab thov koj teb kuv
sub cov kws koj hlub txhad le tau dim.
7Vaajtswv has ntawm lub chaw pe hawm nwg
tas, “Kuv yuav zoo sab hlo muab lub moos
Sekhee faib hab muab lub haav Xukhau faib.
8Kile‑a tebchaws yog kuv tug,
Manaxe tebchaws yog kuv le,
Efa‑i tebchaws yog kuv lub mom hlau,
Yuta tebchaws yog kuv tug cwj nreg,
9Mau‑a tebchaws yog lub phaaj dej
kws kuv ntxuav cev,
kuv laim kuv txhais khau
rua sau Entoo tebchaws,
kuv qw lub suab kws kov yeej
rua sau Filixatee tebchaws.”
10Leejtwg yuav coj kuv moog rua huv
lub moos kws muaj ntsaa loog thaiv?
Leejtwg yuav coj kuv moog rua huv Entoo?
11Au Vaajtswv, koj muab peb tso tseg lawm lov?
Au Vaajtswv, koj tsw nrug peb cov tub rog
tawm moog lov?
12Thov koj paab peb tiv cov tshawj chim,
tsua qhov tuabneeg paab
mas tsw tau qaabhau hlo le.
13Yog peb nrug Vaajtswv
mas peb yuav kov yeej,
nwg yog tug kws yuav tsuj ntag
peb cov tshawj chim.