112

Singx Nzung 112

Taaih Ziouv Nyei Mienh Duqv Orn-Lorqc

  1Oix zuqc ceng Ziouv.
   Taaih Ziouv nyei mienh,
   se za'gengh a'hneiv muangx ninh nyei lingc wuov deix,
   maaih orn-lorqc.
  2Ninh nyei hoz doic yiem deic-bung zungv oix henv,
   hnyouv zingx mienh nyei hoz doic oix duqv fuqv.
  3Ninh nyei biauv zong butv zoih, benx haic,
   ninh zoux horpc nyei jauv yietc liuz yiem.
  4Kuv mienh yiem hmuangx gu'nyuoz maaih njang cuotv daaih.
   Ziouv ceix en, maaih hnyouv korv-lienh mienh, yaac maaih gong-fim.
  5Zoux hnyouv jangv gaav ga'naaiv bun mienh wuov dauh duqv longx,
   ninh zoux nyei jauv yietc zungv baengh fim nyei.
  6Weic zuqc kuv mienh yietc liuz maiv zuqc ndanc dongz,
   mienh yietc liuz oix jangx ninh.
  7Ninh maiv gamh nziex ciouv nyei fienx,
   ninh bungx dingc hnyouv wuonv nyei kaux Ziouv.
  8Ninh zunv dingc hnyouv, maiv gamh nziex.
   Zuov taux buatc ninh nyei win-wangv zuqc suei nzengc.
  9Ninh zoux hnyouv jangv tengx mienh jomc mienh.
   Ninh zoux horpc nyei jauv yietc liuz yiem,
   ninh ziouc henv yaac duqv mienh taaih.
  10Orqv mienh buatc hnangv naaic ziouc qiex jiez,
   ngaatc jienv nyaah yaac baaic jienv njiec.
   Orqv mienh hnamv oix duqv nyei, ziang naaic baac mi'aqv.