123

Câu Sễq Ŏ́c Sarũiq Táq

  1Ơ Yiang Sursĩ ỡt tâng paloŏng ơi!
   Cứq tapoang achỗn nhêng chu ntốq anhia tacu sốt.
  2Ơ Yiang Sursĩ la Ncháu hếq ơi!
  Samoât cũai sũl poâng cũai ndỡm án,
   cớp samoât mansễm sũl nhêng chu mansễm ncháu án,
   ngkíq tê hếq nhêng chu anhia, yỗn toau anhia sâng sarũiq táq tỗp hếq.

  3Ơ Yiang Sursĩ ơi! Sễq anhia sarũiq táq tỗp hếq nứng.
  Sễq anhia sarũiq táq nứng,
   yuaq tỗp hếq sâng panguang tháng tễ santoiq noau mumat.
  4Hếq tamóh máh cũai sốc ayê ra‑ac khoiq dũn lứq chơ,
   cớp cũai ỗt sác la mumat níc hếq.