130

Santoiq Câu Bo Túh Ngua

  1Ơ Yiang Sursĩ ơi! Cứq arô sabau anhia,
   yuaq cứq pứt ŏ́c ngcuang cỗ tian ramóh túh coat.
  2Ơ Ncháu ơi! Sễq anhia tamứng sưong cứq.
   Sễq anhia sarũiq táq nứng.

  3Ơ Yiang Sursĩ ơi! Khân anhia chĩc dŏq máh ŏ́c lôih cũai,
   ki toâq tangái anhia rablớh,
   lứq tỡ bữn noau têq viaq vớt tễ anhia táq.
  4Ma anhia táh lôih cũai,
   dŏq cũai sâng ngcŏh cớp yám noap anhia.

  5Cứq ỡt acoan Yiang Sursĩ nheq tễ mứt pahỡm,
   cớp cứq ngcuang máh ramứh án khoiq par‑ữq.
  6Mứt pahỡm cứq ngcuang Ncháu,
   hỡn tễ tahan ỡt kĩaq sadâu ngcuang yỗn chái poang.
   Hỡn tễ cũai tahan ngcuang poang tarưp.

  7Cũai I-sarel ơi! Cóq anhia ngcuang Yiang Sursĩ,
   yuaq Yiang Sursĩ ayooq níc anhia;
   cớp án bữn chớc têq chuai amoong anhia.
  8Lứq án toâp thái loah tỗp I-sarel tễ ŏ́c lôih alới khoiq táq.