140
Thov Yawmsaub pab tiv thaiv
Sau rau tus thawj coj hu nkauj. Yog Davi zaj nkauj.
1Au Yawmsaub, thov cawm kuv dim
ntawm cov neeg ua phem,
thov tiv thaiv kuv
ntawm cov neeg ua nruj ua tsiv,
2yog cov uas xav tswvyim
hauv lub siab ua phem,
thiab pheej tshum kom muaj kev ua rog.
3Lawv ua lawv tus nplaig ntse
ib yam li nplaig nab,
thiab lawv daim tawv ncauj muaj taug
ib yam li taug nab raj kub sai.
4Au Yawmsaub, thov tsom kwm kuv kom dim
ntawm cov neeg limhiam txhais tes,
thov tiv thaiv kuv
ntawm cov neeg ua nruj ua tsiv
uas ntaus tswvyim chua kuv kotaw.
5Cov neeg khav theeb
caws yej caws ntxiab tos kuv,
thiab cuab tsig cuab hlua rau kuv.
Kuv txojkev mas lawv
cuab hmab cuab hlua tos.
6Kuv hais rau Yawmsaub tias,
“Koj yog kuv tus Vajtswv.”
Au Yawmsaub, thov koj tig ntsej mloog
kuv lub suab taij thov koj.
7Au Yawmsaub uas yog kuv tus Tswv,
yog tus uas muaj zog cawm kuv dim,
koj roos kuv lub taubhau
thaum uas ntaus rog.
8Au Yawmsaub, thov tsis txhob kheev
cov neeg limhiam
ua tau raws li lawv lub siab xav,
tsis txhob kheev lawv
tej tswvyim phem tiav.
9Cov uas nyob vij ib ncig kuv
tsa lawv lub taubhau siab.
Thov cia lawv raug tej lus phem
uas lawv daim tawv ncauj hais.
10Thov kom cov ncaig taws uas kub heev
poob raug lawv,
thov cia lawv raug pov rau hauv hluavtaws
thiab poob rau hauv qhov ntuj
tsis txhob kheev lawv tawm los li.
11Thov tsis txhob cia cov uas iab hiam luag
nyob ruaj hauv lub tebchaws,
thov cia txojkev phem raws caum tau
tej neeg ua nruj ua tsiv.
12Kuv paub tias Yawmsaub tuav
cov neeg txom nyem nyuaj siab txojcai,
thiab tu plaub ncaj pab cov pluag.
13Yeej muaj tseeb, cov neeg ncaj ncees
yuav ua tsaug koj lub npe,
cov neeg siab ncaj
yuav tau nyob ntawm koj xubntiag.